好不主席：梁門女將
1 :
GS(14)@2012-11-06 00:29:36http://hk.apple.nextmedia.com/financeestate/art/20121105/18057927
都不下多次，有些與我不熟稔的人會好似發現咗新大陸咁問我：「乜盧太仲要返工咩？」作為一位上市公司主席夫人返工又有幾齣奇呢？「攞嚟辛苦」嘅程度最多咪拍住我要日日寫專欄咁上下。我既唔打golf，兼冇做政協，且少有同模互動，所以盧太又好難可以分庭「伉儷」咁要馳騁波場、做總理、同流連名店嘆high tea，即係點都要返嚇工打發日辰，當然咁高尚嘅工作情操又點只係買花戴。
有些不識趣的還要再問：「咁盧太點解唔係喺你間公司返工呀？」我差啲就會按捺不住，你以為我嗰間係海味舖呀？家爺仔乸不假外求？當然本地仍有唔少的家族企業，冚家玩曬，不過自問連管理一般同事都深感不易，更何況係皇親國戚，恕我無心無力，敬謝不敏。再者，公司之內已有深得太座之心的小秘─Joycelyn為我打點一切，又何需盧太費神。除非我有朝好似前排有位，據報神經狀況出現問題嘅上市公司主席咁，要勞煩佢太太暫代夫職。
高官太太 齊表演攬上身
講心嗰句，我對與太太共事的最大避忌，其實係無謂畀啲公司同事知道，盧太比我更加精明能幹。論工作能力，我心裡清楚確係有所不及，幸好門面功夫尚能應付得了。如果佢喺公司常伴左右，其夫露底不過指日之事。其實成功男人背後點會冇一位女人，已故美國總統列根咪一樣有南茜夫人，還未計嗰位一度有機問鼎總統寶座的第一夫人。
香港雖然冇南茜，我亦懇請各位記著以下名字：蘇載玓、許步明、唐青儀，當然少不了郭妤淺，若然仲係冇印象，或可叫番佢哋做林（奮強）太、陳（茂波）太、梁（振英）太同唐（英年）太。因為我們應該心裡有數，她們才是從政之才，值得委以重任，履行上至特首，下至局長的職責。不然怎麼每每老公有事，未能對輿論交代清楚，釋除公眾疑慮，就要勞煩一眾太座出嚟解畫，或根本不過係要當眾同時表演「攬上身」同「啃埋佢」兩項雜耍。
所以家陣政圈最火的轎車牌子，除BMW外，不作他選，因為個個男人，一有乜濕滯嘢，就出動「Blame My Wife」呢架座駕，諗住可以鬆人。我深知自己太座從來不會如此「溫婉順人」，任得我予取予攜，若然有日我真係咁睇唔開，心想棄商從政，我自會向盧太請示，如非得其首肯……日後為我背鍋（孭鑊），我定安份守己，不會越政治雷池一步。再者，如我誓要一試，盧太必然大條道理開動內地版嘅BMW以示警戒，咪即係「Bie Mo Wo（別摸我，以後咪掂我囉！）」
最後謹祝林生林太休假愉快。
盧先亞