富事通：伯南克要多謝德拉吉
1 :
GS(14)@2012-09-07 09:54:37http://www.sharpdaily.hk/article ... 7%E6%8B%89%E5%90%89
落筆呢一刻，歐央行仍然未公佈究竟會做乜嘢。不過，已經有人話，今次係歐洲央行行長德拉吉嘅榮辱一戰，再唔出招，佢就真係「得個橘」。
另外，德國央行亦已經打「開口牌」，話反對。再者，德國憲法法庭，仲有一個星期先至判，究竟歐洲穩定機制（ESM）係咪合法。換句話講，德國陪你搞場大龍鳳ESM，德拉吉o依家又唔放在眼內，話買債就買債，投機者可以解讀成：一，歐洲真係好大鑊，再唔放水會有銀行死；二，歐洲除咗德國之外，幾乎其他所有國家嘅財政同金融機構，一個月之內都會缺水。
又假設，歐央行一如傳聞所講，真係無限量買短債，但係同時又沖銷（Sterilize）買債造成嘅貨幣增長，結果又意味乜嘢呢？沖銷，就係話，央行一方面買債，歐元流入市場，債就泊入歐央行，另一方面，歐央行又沽售外幣，買入同等歐元，令歐元唔使貶值。呢個做法，其實會令買債冇乜效，因為呢類公開市場運作，本來目的就係要增加流動性。
另一個角度睇，如果歐央行真係咁做，即係無端端幫美元增加流動性，其實對市場一旦出現恐慌，資本湧入美元區打咗底。
如果我係伯南克，我會講聲多謝。今年Jackson Hole央行年會德拉吉冇去，下年，可以搵佢主禮，如果，佢仲坐緊歐央行。
李兆富