📖 ZKIZ Archives

慾望與 OPM 左丁山

http://hk.apple.nextmedia.com/template/apple_sub/art_main.php?&iss_id=20110927&sec_id=12187389&art_id=15649066&cat_id=255&coln_id=22

世界金融秩序大亂，市場動盪，分析師Ｍ教左丁山：「最好揸住港元現金，一年後你就知道自己係英雄。」死啦，揸港紙冇利息收，點算好，都係羨慕人地揸住不少 iBond嘅人士，可無驚無險收番五至六厘利息（按通脹率計算），當初一啲百彈 iBond嘅所謂投資專家，今日匿咗去邊？
上星期二嘅獅子山學 會晚宴，有諾貝爾獎經濟學獎得主 Vernon Smith教授演講，佢有備而來，讀演辭連講解，超過半小時，算係交足功課，並不欺場。史密夫教授之演講，由亞當史密、休謨（ Hume）兩位十八世紀學術大師嘅學說講起，內容似足大學課堂講義，引述不少大師名言，對好多在座飲紅酒白酒，嘆鵝肝牛扒嘅商界人士嚟講，好似「重量」得 滯噃。一位政府副局長對獅子王講：「唔該你地將大教授講義整理後上網，等我地下載慢慢閱讀，先至可以消化！」
由古代講到現代，教授說今天金融市場 問題在於人的慾望不受管制。休謨講過，人類之慾望（ desire）乃是本性，合理（ reason）只是情緒（ passions）之奴隸。亞當史密又講過兩大問題，一個係 OPM（ Other People's Money他人銀紙），與 OPF（ Other People's Freedom），佢話只要我地係運用他人之銀紙，就往往愛冒風險，唔得謹慎，而個人自由應受他人自由制約。即係話我地嘅行為要顧及他人感受，不可以假自 由之名，以自我為中心，言行亂咁嚟。今天之銀行、金融機構為滿足顧客之慾望（如買樓），就亂咁運用 OPM（銀行存款），借俾一啲連首期都交唔出嘅顧客去買樓，呢類顧客就係只知自己有買樓置業自由而夠膽向銀行借錢，視存款人士之自由（財產保障）如無物， 兩者合併起來，就埋下金融海嘯之伏筆，一有危機因素觸發，便不可收拾。史密夫教授認為事已至此，如須固本清源，便要讓若干銀行、家庭破產，重整資產負債 表，甚麼 QE3只是化粧術，唔會有實質效果，不過佢開嘅係苦口良藥，明年適值大選之年，冇政客會採用嘅。

PermaLink: https://articles.zkiz.com/?id=28127
Next Page
ZKIZ Archives @ 2019