工程要快廢環保
1 :
GS(14)@2012-05-13 11:52:06http://hk.apple.nextmedia.com/su ... t/20120511/16326039
睇完林瑞麟司長頒冠軍一哩賽獎盃俾「軍事攻略」馬主羅傑承之後，碰到馬場常客惡佬明，大家哭一輪馬喪，因為第一大熱門「都市風光」跑咗去邊呀？第二大熱門「雄心威龍」跑第四，等我地中曬腳冇錢收，冇癮之至。
見到林瑞麟行將掛冠冇得撈，醒起前一日梁特首在電台訪問話：「香港好多事冇得拖，例如興建公屋點解要七十個月先至落成？將工程壓縮一個月，半個月得唔得？」梁特首好心急，做事一味要快，要短期內見到成績，跟住佢嘅五司十四局大員唔該勤練跑步，加快步速，聽號令就向前衝呀，衝呀！
惡佬明冷笑一聲：「我都有聽到梁生話要壓縮工程時間，我都負責過監督公屋地盤工程，要快就好簡單啫，俾多啲錢囉，叫屋宇署工程師唔好咁多指指點點囉，驗收工程時間唔好拖囉，梁生係測量師，佢知㗎！」唓，活力先生講過，公務員文化係遵守廉署規矩第一，程序為本，目標為次，講效率貪快隨時害到自己冇咗份工，跟足程序指引逐步逐步做，一定唔會累親自己，份工好穩陣。
梁生好似唔係幾鍾意講咁多程序嘅噃，一聲喝停2013年雙非孕婦配額，那管得他日可能有人司法覆核。惡佬明啲工程行家呢日亦有入場，一位基建工程師講：「要壓縮工程時間，好易嘅啫，第一件事就係廢除環評；第二件事就係唔准環保署干預我地開工，成日話我地製造噪音壓縮我地開工時間，唔准開夜工；第三件以後在地區開工，唔駛區議會同意，梁先生有魄力壓得呢三座阻礙工程進展嘅大障礙嘅話，我地啲基建工程可以提早三年完成㖭。點止壓縮一頭半個月呀！」想死咩，環評、環保、區議會討論，係既定程序嚟嘅喎，點可以為咗貪快而廢除！基建工程師未免想創個心！基建工程師騎騎笑：「我都知唔得，但環評可以阻你一兩年，環保署可以阻你幾個月，區議會最煩氣，拖拉拖拉沒完沒了。不過梁先生真的要加快香港工程進度嘅話，問嚇麥齊光囉，如果麥齊光真係做運輸及工務局局長，佢知道曬邊啲程序最阻住地球轉㗎！」
左丁山