好不主席：軟力硬銷
1 :
GS(14)@2012-07-31 11:48:36http://hk.apple.nextmedia.com/financeestate/art/20120731/16561931
啱啱星期日嘅安排本來諗住可以做到換屆政府所講咁「無縫交接」（最終都真係得個「諗」字）。先安排一朝早練山，然後晏晝同啲家長去散步，預計人數上萬（卒之係近十萬），有排都要身在銅鑼灣，跟住可以抽身中途離隊，應好朋友之約去大球場睇「傑志對阿仙奴」。
點知行程出了狀況也耽誤了時間，最終只能直接趕赴球場。而當架車在堅拿道天橋上慢駛，眼見下面軒尼詩道一望無際都是平和齊整的遊行隊伍，還有很多的 BB車，正是有言在先，卻未能親臨十卜，心有所失。不過觀賞球賽期間，場內鏡頭竟然捕捉到一位「長毛」球迷的蹤影，連佢都會暫別示威，而選擇睇波這另一類型的群眾活動，足見足球，應該係「英國波」嘅魅力。
鬥軟實力 倫奧贏京奧
香港在過去百多年確實扮演英國殖民地歷史中的重要一角，除了創造了驕人的經濟奇蹟外，值得一數的成果當還有完善的法制、言論自由的空間和前朝「廉潔高效」的公務體系（只是回歸之後，不知怎地老是荒腔走板）。然承繼英式文化遺產的這部份卻是乏善可陳，我敢說獨沽一味能做到的同化就係追捧「英國」嘅足球隊，無論係國家隊定係 Big4（英超四大球會）。以人口密度計，香港睇怕都係英國本土以外，海外最多英超擁躉嘅地方。不過家陣世界嘅焦點都放喺倫奧，而其開幕典禮亦難免會和京奧那場史無前例的國力秀相提並論。
先唔計「使費」，據估算倫奧耗資只及三分之一，若論演出項目，其中獻唱英國國歌的是一大群兒童，這種陣式若是我國排演當然會更加鼎盛，不過點都唔會好似呢班細路咁着晒睡衣，喺張床上大唱大跳，而仲要其中好多都係病患或殘障小孩。國歌咁莊嚴肅正，承載的只有無時無刻不容放鬆的敬仰之心。想當日咪就有個不知天高地厚嘅學生，那來的幾生修道能夠同我國最高領導人見面，不但尊卑不分平起平坐，佢竟然身穿睡衣隻身赴會，真係成何體統，所以亦難怪執政者沉不住要出手教訓。
同時政府又怎會在這舉世矚目的一刻，安排那些不一樣的國民現身人前，既是強國，豈能以弱示眾，所以「老弱傷殘」固不用說，就算不過係長得不夠標致的女孩，亦只能化身幕後代唱。
對於事事講求「集體、形式」的共黨政權，要佢哋明白乜先係「尊人文、重人性」這些現代價值觀念，簡直就是緣木求魚。若然要啲領導人可以學似英女皇，我哋曾幾何時嘅事頭婆咁粉墨登場，與眾同歡，更加係妙想天開。堂堂天朝元首只會高高在上俯視黎民，偶爾落區視察民情已是皇恩浩蕩，點會做埋啲咁有辱國體嘅嘢。
說到底，奧運展現的並不只是硬國力，而是軟實力。
盧先亞