胡孟青：金融過客最風光
1 :
GS(14)@2012-03-02 22:39:47http://www.sharpdaily.hk/article/index/15307/20120302/61549
投行揀蟀，不成文規定，男要身家女要樣，最完美係得天獨厚樣樣齊。有大型投行更要在新人入職時填表申報家庭資產規模，博乜？心照啦！以前做銀行何須企出門口街邊拉客申請信用卡，或者凍打Cold Call三唔識七問對方要唔要清卡數或者攞現金，曾幾何時，阿媽話畀人知仔女做銀行好風光，o依家連佢都擔心你份工隨時凍過水，唔敢買樓，費事突然失業被迫斷供；唔敢去旅行，免得回來冇咗個位。
行家有層樓在堅尼地道，上一輪金融海嘯，撞到正租客係雷曼員工，今次以為租畀一個宇宙最強投行做了十幾年嘅賓架，誰知都要起埋身，還想提早中斷租約，行家話今次又中伏。外資大行中坐得最穩應該係班富二、富三代，因為佢哋擺明係入嚟過一過場，將來美其名又係投行出身，有幾多個真係成功學滿師？好成疑問。
回港做Intern建立關係
況且由第一天起，銀行都已有齊心理準備佢哋唔會做得長。反正過門都係客，隨時更要係大客，對方父母肯安排喺你銀行學嘢，係睇得起你，由其暑假回港做Intern開始建立關係，分派到各部門，醒唔醒目還是其次，部門主管反而會先行起底，費事一個唔覺意，開罪「金菠蘿」得失人家成個家族就無謂，所以會特別客氣，給予難度最低、最難出錯兼最冇殺傷力的工作，但又唔可以畀影印佢做，怕對方知你睇佢唔起，當然亦要趁機會為其洗腦，讓佢覺得這家銀行天下無敵，將來叫伯爺將副身家搬過來；剩下來要做的，就是要Keep Fingers Crossed、望暑假快快過完，一切回復正常。「En唔Enjoy」呢種生活無所謂，有時發現要見嘅客原來係世叔伯，對方也許會畀番多少面，生意做唔做得成還是其次。
話說幾年前，港股熱炒直通車之際，美資大行就曾經以幾位氣質美女，齊齊向一位城中富豪兜售，在小島酒店一邊享用法國菜，富豪一於猶如老竇教女，其中一個真係世姪女，全程有佢講冇你「搭嗲」，食完飯吩咐你們把資料放下，待回去後再看清楚才決定買唔買，文件拿回公司給旗下相關部門員工研究，結果公司內部一班會計師員工，好坦白告訴富豪老闆睇極睇唔明，既然如此，結果好彩無累世伯老闆中伏。
胡孟青
獨立股評人