📖 ZKIZ Archives

獅子山學會晚宴 左丁山

http://hk.apple.nextmedia.com/template/apple_sub/art_main.php?&iss_id=20110918&sec_id=12187389&art_id=15622807&cat_id=255&coln_id=22

獅子山學會辦周年晚宴，今年特別隆重，居然邀請到 2002年諾貝爾獎經濟學獎得主 Vernon Smith教授來港出席，做晚宴主講嘉賓，又有特區行政長官曾蔭權做主禮嘉賓，講番幾句。問獅子山學會行政總監皮蛋王：「究竟史密夫大教授到時會講乜嘢題 目？」皮蛋王笑曰：「點解你唔問特首講乜？」左丁山話：「官方嘉賓，講話自有既定說辭，所謂 Line to Take，有特首辦打點好晒，除非曾先生到時有新聞爆，另作別論。但史密夫教授就唔同，佢係著名實驗經濟學派創始人，今年八十四歲咯喎，乜嘢未見過，難得 佢仍然做研究，做教授，到場嘅嘉賓梗係想聽佢講乜嘅。」
皮蛋王透露，史密夫教授在九月二十日晚於北角油街海逸君綽酒店（ Harbour Grand）嘅獅子山晚宴有香港加拿大商會、加拿大商會、國泰航空、中華電力以及電能等機構支持合辦，聲勢比以前完全唔同，到時還有一個加拿大頂尖智庫 Fraser Institute（即是 Economic Freedom of the World Report嘅出版人）宣佈自由市場度嘅調查。好嘞、好嘞，史密夫教授嘅演講題目就是：「 Freedom, Markets, and Wealth Creation: Setbacks Threatened by Economic Crisis」，嘩，好大條題目，既然獅子王邀請左丁山出席，到時要洗耳恭聽。

 

未到晚宴之前，獅子王又在君綽辦一個午餐飯局，請傳媒與史密夫教授見吓面，當係洗塵，出席 嘅有華爾街日報、 TVB，及其他報紙嘅財經版人物，左丁山忝陪出席，有機會梗係乘機問幾句史密夫教授嘅經濟思想，原來佢係不折不扣嘅市場派，佢話教書五十幾年，每年教學生 供應、需求、均衡嘅理論，如果單係得個講字，未免悶親學生，所以佢要學生入實驗室，分成兩組，一組買貨，一組賣貨，兩組學生作模擬買賣，作市場談判，賣方 務求清貨，買方務求以值得的價錢買入，學生玩得高興之餘，明白市場供求價格均衡之條件，然後先至讀書本理論，印證自己嘅實驗。佢依家在 Chapman University教書，做咗一個停車場電子收費計劃實驗，效果相當理想，但難以推行，點解，明天再講。

PermaLink: https://articles.zkiz.com/?id=27760
Next Page
ZKIZ Archives @ 2019