青笑怒罵：上市公司無便便改姓賴
1 :
GS(14)@2011-10-29 14:31:44http://m.sharpdaily.hk/detail.ph ... 5307&category=daily
雖然電視廣告都話：「便便係好基本嘅，全面發展先至係叻！」但係如果連基本都做不到或做得不足，那就真的要睇睇究竟係人嘅問題定係奶粉有問題，抑或係有其他問題。
大人無便便，仲話可以食幾粒西梅通一通，上市公司無便便——引小股東埋身、甚至伸完手後，唔肯長進擺番低幾両，無論股價抑或股息都一毛不拔，咁就真係完全唔值得原諒啦﹗
盈利升派息跌，I.T （999）已經有辦你睇；盈利升、派息升、可惜存貨周轉日也上升的利信達(738)，同樣係死罪，股價雙雙被洗倉，相信就算連同今天期指結算挾多一鋪，以回補空倉或執死雞為己任的反彈，相信都難以彌補缺失了的市值。
早前匹克（1968）中期業績也是盈利升、毛利升，但派息跌、存貨周轉日數升、淨利潤率跌，股價兩個月跌近六成，才跟博反彈敢死隊升些少，有人更賴說要預留資金在內地擴張。內需變內傷，概念從來都不是免死金牌。
派息升但比率跌屬死罪
然而，有時有便便又如何？都要觀察其形態是否健康，假如係屙粒粒抑或係屙爛屎。
據報載，有一位天天要長途跋涉、由深圳過境來香港上課的跨境學童，就係因為天天都要搭長途巴士往返中港，途中難免會人有三急，卻因學生巴士無法中途停車讓其解決，因日積月累、忍得多，最終變成便秘問題。
根據中大透過訪問調查的發現，有12%小學生有便秘問題，可是當忍便便變成習慣後，最終將演變成失禁，結果淪為「屎王之王」，生人勿近。
在本港上市公司當中，出現便秘問題的比例，肯定高於12%。所謂全面發展，營業額、盈利、毛利率、淨利潤率、股東回報、派息、股價表現，缺一不可。
次級債不計入核心資本金
若再深入分析，派息升同時派息比率跌，一樣可以係死罪。當然，賺錢的企業是否就是好企業，就是另一個更值得討論的話題，但可以肯定的是，好的企業肯定不止是一台賺錢機器。
正如散戶至愛的內銀股，相信一隻二隻會很快告訴你們，要為提升一級資金充足比率而減派息，羊毛出自羊牯身上，也許你會問：內地14家商業銀行，今年不是已經發行2076億元次級債嗎？還有未來兩年的缺口2305億元，為什麼又要打劫小股東？或許你有所不知，次級債是不計入核心資本金的，請準備繼續被宰割吧！小股東們！阿們！
胡孟青
獨立股評人