📖 ZKIZ Archives

全靠內需 左丁山

http://hk.apple.nextmedia.com/template/apple_sub/art_main.php?&iss_id=20110821&sec_id=12187389&art_id=15541593&cat_id=255&coln_id=22

付貨人協會執行總幹事何立基對蘋果記者講，今年出口旺季不旺，走歐美綫嘅貨輪有大把吉位，唔係幾好消息噃。睇 出口數據，已是滯後，後知後覺，付貨人（ shipper，出口商也）與貨輪航運公司先至係先知先覺；佢地知道嘅消息，係一手消息，快人一步。既然出口旺季不旺，表示咗聖誕節訂單（現在係交貨付運 日子）十分疲弱，推論落去，啲上市出口股及航運股嘅下半年業績，點會好呀，唔怪得呢啲股份股價表現疲弱。
八月十六日，國泰航空發出一份新聞稿，標 題係：「七月份客運量上升，載貨量下降。」為出口疲弱狀況提供多一啲證據。據國泰講，國泰港龍兩公司合併計算，今年七月份運載貨物及郵件共十四萬零五十公 噸，比去年同期減少 11%，運載率為 66.9%，下跌 9.4個百分點，今年頭七個月嘅載運量就下跌 5.2%。
出口海運差，空運亦差，在在 表示下半年經濟增長放緩，但通脹率繼續上升，一個唔好彩，香港就會跌入滯脹（ stagflation），好鬼影響民生，但特區政府無法可施噃，美國歐洲一團糟，當地失業率高企，人民消費信心已失，人人驚失業，雙手 㩒住荷包唔敢使錢！即使貸款利率奇低，都唔願借錢消費，我地嘅出口自然唔會掂。

 

呢日與舊日廣告行家在灣仔一間老牌海鮮酒家食午飯，行家 R話最正係食茶葉薰雞、白灼豬腰與泥鯭粥，三者果然正斗，但左丁山叫一兩味其他菜式，麻麻啫。酒家只得地廳，無一樓或閣樓，一眼睇晒，只有三枱客共九人， 左丁山話：「點捱皮呀？」行家 R講，「唔駛戥老闆驚，此乃老闆自置物業，冇租金壓力。」話係咁話啫，除咗租金，還要出糧嘅噃？行家 R話：「夜晚就旺嘅嘞，最緊要有內需──內地人民需求好大好大嘅啫，佢地成群人行入嚟，專食貴嘢，老闆開顏，靠我同嗰啲港燦嚟食就死咯！」拎個套餐價睇 吓，最便宜嘅十二人一席菜要五千三百，仲要加一，另茶芥酸菜連埋酒水，怕六千五百元冇得找，最貴套餐要萬二蚊一圍，唔，呢啲就係內地客需要嘅，唔怪得行家 R話：「現在最緊要講內需，靠出口唔掂㗎嘞！」

PermaLink: https://articles.zkiz.com/?id=27078
Next Page
ZKIZ Archives @ 2019