|
||||||
|
繼本地「卡王」梁永祥請辭恒生（011）後，華華收到風，另一位資深銀行家兼財資交易專才黃遠輝（Stanley），原來做埋呢個月底，會離開工銀亞洲。無獨有偶，兩位賓架都話發展個人興趣。 在銀行界打拼37載 華 華打畀行內向有「好好先生」稱譽嘅Stanley問吓，甚少托傳媒手踭嘅輝哥，好誠懇話，自己行年都五張五，加入工銀亞洲亦已經7載，比原來計劃做5年嘅 時間更長。舊年底該行完成私有化，行務將踏入新一頁，自覺亦係時候退下火線，過吓一直想過而無暇享受嘅生活，包括讀書耕種、推動環保，同埋繼續出任公職回 饋社會。 下任特首開始「跑馬仔」預賽，江湖傳聞，擁有豐富金融經驗嘅Stanley，會協助其中一名黑馬候選人出戰。輝哥即刻否認：「梗係無咁嘅事啦」，仲頻頻話自己「何德何能」。 Stanley 係最早一代本地外滙專才，聽前輩講，佢睇日圓走勢好拿手。自74年加入渣打，迄今從事銀行界已經37載，95年佢獲升做渣打銀行東北亞地區司庫，01至 03年轉戰內地，出掌渣打中國區總裁。04年轉投工銀亞洲任副總經理，同年8月獲委任為該行執行董事兼替任行政總裁。 與剛宣佈年底離職嘅恒生執董梁永祥一樣，Stanely亦係周身才藝，泡茶看書，下田種菜，瓣瓣皆有研究，身居銀行要職外，亦曾任房委會委員，現任城規會成員、香港舞蹈團主席同地球之友榮譽司庫。 李華華 |
||||||