|
||||||
|
近年超人父子成日俾大陸傳媒窮追猛打，話佢哋喺大陸囤地，果真樹大招風。 同樣經常俾內地傳媒追打嘅，仲有女俠徐楓（圖）。內地《每日經濟新聞》報道，徐楓旗下嘅湯臣集團喺上海囤地，而且仲囤咗17年，破晒上海紀錄。 報道話，早前湯臣透過旗下合營公司，同上海市浦東土地發展控股簽咗份《資產置換協議》，涉及湯臣喺浦東嘅一幅地。 原來幅地早喺94年就由湯臣集團轉咗畀旗下嘅合資公司，到家陣17年，都未起樓。 報道仲引述當地嘅地產代理話，按照94年嘅土地價格，當時每方米樓面頂多幾百蚊，家陣呢？每方米超過萬三蚊人仔，身價升咗幾十倍喇！ |
||||||