ZKIZ Archives


中環在線:西遊記一定有小豬 李華華


2011-7-14  AD




 

「星爺」周星馳號召力有幾高?就算唔能夠同天比高,都肯定唔嘢小!

自從佢入主比高(8220)做上市公司大股東後,market中人日日盯到實,睇佢有咩能耐舞得起呢隻細價股,雖則比高家陣都未有咩實質表現,但只要星爺稍為有少少動作,都會成為刺激股價敏感消息!

繼呢個月8號星爺做導演同監製嘅《新大話西遊之除魔傳奇》開鏡,第二日比高應聲升11%之後,噚日娛樂版手足話星爺會落埋場再做孫悟空,比高即刻又升7.26%!

9月拍完最快出年有得睇

華華同比高執董陳昌義Quattro傾開呢單嘢,佢話:「星爺o依家喺橫店拍西遊記嘛,佢做孫悟空,你哋報紙話小豬(羅志祥)冇得拍,其實冇啲咁嘅事,佢約都簽咗,一定會拍,之不過角色仲未定,可能係豬八戒,又可能係做少年時代嘅孫悟空,你知啦,你估佢(星爺)唔到嘛!」

Quattro仲話,投資者知道星爺親身上陣後,都爭住加碼掟錢落部戲,套戲本來budget係1億,o依家反而太多錢搞到唔知點用咁話!

講到咁勁,部戲幾時上先?佢話套戲大約9月會拍完,之後做後期,預計出年下半年就會上……幾驚佢話如果要畀一個上畫期限,希望係一萬年!

李華華


中環 在線 西遊記 西遊 一定 有小 小豬 華華
PermaLink: https://articles.zkiz.com/?id=26276


ZKIZ Archives @ 2019