|
||||||
|
利豐（494）主席馮國經低調就人人都知，但估唔到為咗避開記者追訪，噚日喺利邦（891）股東會後，使出一招「密室」軟禁，唔畀記者離開股東會會場。 雖然華華同一眾行家衝破障礙，追住馮國經，但說時遲那時快，睇落好大份嘅馮國經，十足魔術師大衛高柏飛一樣，一兩個身影，就喺大庭廣眾下「消失」。 同瑞銀開火 成追問焦點 其實，大家都明白政經界大紅人馮國經貴人事忙，以往都唔會就公司業務呢啲小事回應。不過，上個禮拜因一份報告，佢罕有同瑞銀開拖，咁華華點都要請佢親口講番一兩句，點知結果佢都係唔講，仲連環使出兩項特技。 真係唔只記者對開拖單嘢有興趣，噚日喺股東會上，就有一名股東舉手話，佢有揸利邦，又有揸利豐，好想知瑞銀單嘢會有乜影響。 身兼兩間公司主席嘅馮國經，只係叫股東唔使擔心，因為單嘢對利邦冇影響，但就話唔方便喺利邦個場講利豐嘅嘢。 馮國經「突然消失」，華華交唔到差，好在最後搵到佢千金、利邦執行董事馮詠儀講咗幾句，佢話暫時都會留喺利邦，唔會過去利豐度。咁又啱嘅，利邦手上咁多名牌，當然好玩過利豐啦。 李華華 |
||||||