|
位於堅尼地道三十三號一幢有六十七年樓齡的唐樓，今年初以一億五千六百萬元出售予太古，這宗交易帶出富貴人家的無奈，原來業主正是被基金追擊的中巴（26）主席顏家大小姐顏潔齡。 正所謂腰纏萬貫最終也「帶唔到落棺材」，這幢億半舊樓是一九七二年由其獨身的姨母黃卉卿，贈予顏潔齡的「禮物」，這位慷慨姨母於七八年以八十四歲之高齡過身，顏潔齡一直作為收租物業，時間飛逝轉瞬間又四十多年，顏大小姐已八十有三且膝下無兒女，亦要為名下資產費煞思量，卒之把「禮物」售予太古。所以話基金佬盯上中巴，企圖逼管理層賣盤是不無道理。 白頭任倒戈 唐營猛將白頭任撐林鄭，令人側目。話晒都係財金系統出身，手指拗出唔幫鬍薯片，仲唔係倒戈？乜事呢？眾所周知，煲呔係薯片嘅伯樂，帶佢入官場，一路照實。煲呔做財爺之時，理論上係白頭任老頂；點知有人恃才傲物，唔多老黎。及至四萬掛冠，煲呔頂上，財金在行之阿松做白頭佬嘅老細；某人有幾多斤兩，一清二楚，出手修理。點知阿松偷步買車，某人命硬大步?過。及至薯片做財爺，其時某人已屆公務員退休之齡；以退為進，問薯片點辦？答案係「照公務員規矩辦事囉」，形同要佢即刻起身。幾經動員，除咗一士諤諤，委員會班大孖沙出手挽留，某人方得以再坐一會。娥姐與薯片對壘，新仇舊恨，換轉你係某人，你會企邊面啦？ 中環寸嘴：包間大deal房爆粗都得 喺舊中銀樓上有間行會員制嘅西餐廳，食晏都唔少人；銀行佬傾大買賣通常喺銀行會議室，再柯打高級酒店的外賣到會招呼客仔，次一級嘅deal，都可以來這間西餐廳，訂間VIP房一邊開會一邊食，不過銀行佬向上頭寫報告攞間房同客食飯都有好多重手續，正所謂面就人哋俾嘅，架就自己丟，最緊要一注本錢，「醒」幾單生意佢做，唔係話死咕咕，吓吓做定期存款就俾人「×」，其實我見銀行佬同銀行妹都麻木晒，有生意就傾多兩句，冇生意就係咁先，反正我拋個身出嚟都係搵錢啫！年廿八訂呢間西餐廳食晚飯，我唔係有咩大deal傾，喺入面吹吓水，貪呢度大大聲講吓粗口冇人聽到，我最憎啲乜乜會，物物會，入到去懶proper咁，講嘢唔得豪放，喺呢間房食唔知幾過癮；我事先㩒住班朋友，叫佢哋唔好帶酒去，唔係無面o架，咁即係話人家餐廳啲酒唔掂？況且喺呢啲會所食飯已經唔係貴，仲要帶埋酒水去唔幫襯吓咁cheap咩！呢間餐廳冇乜咁特別啫，用啲木、雲石搞古老裝修，食氣氛，菜式清清哋，不過就啱晒貪慕虛榮嘅友仔去，實開心，食完有得同人講嘛！ 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 大陸金融猛人蒲點 以往大陸金融界人士喜歡聚腳於港島香格里拉酒店五十二樓酒吧，隨着愈來愈多強國金融猛人，似得肖建華要長居四季酒店服務式住宅，四季酒店coffee shop成為他們的聚腳點；每到下午三點三就會「蒲頭」，與經紀、銀行佬車輪轉傾幾輪，要食飯兼「鬥地主」則選擇銅鑼灣的「飯堂」，這間高檔食肆傳聞是前廣州市市長黎子流的兒子黎亮開設，黎亮同樣活躍於香港股票市場，背景之威猛與肖建華不相伯仲，一幫人等且十分啱嘴型；而近年的新蒲點則是灣仔的「古琴臺」，此私人會所裝修得古色古香，老闆雖名不見經傳，但一班國內富豪的蒲點，又豈會是普通食肆？搞手是來自遼寧省大連市的劉江湲，她是弘達金融（1822）的董事，公司正拓展哈爾濱市的網絡金融借貸生意，呢位東北大姐來自遼寧省大連市，在港設私竇招呼客人，睇嚟是大茶飯了。 | ||