📖 ZKIZ Archives

業績簡評 - 龍記集團 (0255.HK) PARTIPRAL 派得好

http://partipral-hk.blogspot.com/2011/03/0255hk.html

營業額26億, 同比升16.3%; 材料成本10.8億, 同比升5%; 僱員支出4.96億, 同比升26%; 其他支出4.2億, 同比升29.75%; 折舊1.68億, 同比減少15%. 基本上除左折舊以外, 全部支出都係升得比營業額勁, 幸好佔總成本最大比重既材料成本升幅奇少, 另外稅率亦由31%回落至29.5%, 結果純利比去年急升44%, 賺3.19億創歷史新高.

當然上年係金融海嘯後第一年, 營運數字肯定未如理想, 單睇同比增長幾多幾多其實冇太大意義. 反而係如果單同上半年比較, 龍記既表現又如何呢?

	2010 1st	2010 2nd
營業額	1,290,575.00	1,321,008.00
材料成本	539,592.00	541,171.00
材料成本/營業額	41.81%	40.97%
僱員支出	235,344.00	260,310.00
僱員支出/營業額	18.24%	19.71%
折舊	89,191.00	78,935.00
折舊率		24.59%
董事酬金	-	-
除稅前溢利	208,967.00	248,626.00
稅項	(65,679.00)	(69,426.00)
稅率 %	31.43%	27.92%
純利	141,986.00	176,839.00
純利率 %	11.00%	13.39%
固定資產	682,312.00	683,834.00
流動資產	1,744,972.00	2,115,910.00
應收帳	606,768.00	580,470.00
存貨	521,967.00	620,020.00
營業額/存貨
現金	585,068.00	869,956.00
應付帳	364,037.00	429,706.00
長期債項	0.00	0.00
短期債項	46,804.00	258,101.00
總債項	46,804.00	258,101.00
經營現金流	-	-
已繳稅項	-	-
增添固定資產	-	-
員工	7,200	6,300

收入同上半年比有輕微增長, 但比起08年時仍差些少, 可視作持續復甦狀態. 材料成本比上半年控制得更好, 管理層應記一功. 僱員方面請少左近千人但比起上年全年仍要俾多1億, 情況似乎頗不妙, 管理層對此既說法係 "另一方面，中國國內不少生產商正面對勞工短缺問題，尤幸集團持續優化機器設備和重整生產流程漸見成效，生產模式漸趨向自動化和批量生產，雖然勞工成本不斷上漲，集團的人均效率和產值均取得正面增長。",如 果屬實的話, 僱員支出上漲可能反而係好事, 可以加快行業汰弱留強. 題外話, 今次請少左人但支出多左或者反映緊自己第一次分析龍記時話佢將利潤隱藏於僱員支出既說法並不恰當, 呢度要作出更正, 但唔代表我改變認為龍記有隱藏利潤既睇法, 只係唔知佢收埋左響邊度而已.

純利率比上半年有所提升, 主因係稅率同折舊減少, 基本上同營運無關, 所以唔需要過度興奮. 業績報告話早前提過既新廠會於2011年底落成, 即係同葉氏一樣, 2012年產能會有所提升而成本亦會更有效控制. 當然此美好願景最後會否實現就到時先再講, 但起碼叫有得憧憬下.

成份業績比較礙眼既部份係多左兩億短債, 但可以參考番舊文, 以前龍記既債項其實比依家恐怖得多, 反正手頭現金有近9億而且派息亦闊綽, 呢兩億暫且俾佢過骨.

總括來講, 如果有睇開本BLOG既網友都應該知道呢份業績只係屬於個人預期之內, 對自己來講其實冇乜太大驚喜. 市場點睇佢就要等星期一先知喇, 但話哂龍記都係我開BLOG後第一隻分析後而買入既股票, 可以達到自己預期都算係成功架喇.

輪到估值部份, 每股盈利$0.5077, 每股全年派息$0.41, 以今日收市價$5.12計, P/E 10倍息率8厘, 以中型工業股計估值算幾合理, 如果市場氣氛轉好的話, 結合埋2011年盈利預期上到15倍P/E都唔出奇的, 當然息率你唔可以要求佢年年都有8厘, 始終特別息的意思就係將來就算冇派你都唔怪得佢, 但60%以上的基本派息率係絕對應該可以繼續保持的.

龍記街貨好乾導致買賣差價通常都好闊, 如果有心人要追貨的話通常都會比正常價MARK高左幾個%, 所以奉勸各位網友就算星期一想買貨都要謀定而後動, 計好哂最高買入價先好出手. 個人來講梗係唔想佢星期一大升啦, 只怪自己認識得龍記太遲了.