http://hk.myblog.yahoo.com/alexwongkwokying/article?mid=14765
（原載於東周刊15/2/2011）
之前說過，投資高手，察覺大勢「大風起於萍末」時，悠然買進，到普通人「眼見方為實」、「恍然大悟」一刻搶買，乘勢獲取鉅利。現再作補充。
街上promoters，時有叫賣。所售產品，千奇百怪，配合賣者的聲線、形體動作，大有擁躉。美國電視購物節目主持,波沛爾(Ron Popeil，下稱波哥)，可謂promoter之王。
不明用法不下注
波哥家族，專營廚房用具，自產自銷，出名新奇又好用。問題在於，人多畏新，未明點用，冒險買嚿垃圾，阻訂又花錢，常人不為。所以波家上下三代，例必自銷，唔明sell到你明。功力之深，據自述：「我班親戚，吉盒都賣到。」
要「表演」叫好叫座，瘋湧搶購，一字記曰：「明」。當年啱啱有錄影機，其實好正，唔使限時限刻追劇，又可翻睇。但初期滯銷，何解？賣機商戶，齋講：「新產品，正！睇說明書，實識用！」說明書枕頭咁厚，唔知頭唔知路，你試唔試？波家深明此道，只會親身直銷。
表演之初，先用感覺，而非道理，刺激觀眾。「你哋點切蕃茄？係咪一拮、一切，跟住一手都係？」風趣幽默，跟手產品出籠：「呢部萬能切菜機，嗱！睇吓個蕃茄！幾齊幾多片！一粒核都無少到！」
購買慾已初燃，但不明用法，觀眾仍不會「下注」。跟着就將步驟拆細，重覆又重覆，務求觀眾明白，卸下心防。「睇唔睇到？放喺呢度，嗱後面嘅朋友睇唔清楚，再示範多次…」最後成功說服買家，此機原應天上有，急急磅水，攪掂。
其實，普通人買股票，跟買廚具，實無差異。說明書，等於公司財務報表，資料最齊最真，但艱澀難明，看得五分鐘後，睡魔急call，口吐白沫。只有極少怪人，如芒格、是川銀藏，痴迷會計及商道，不嫌苦悶，才會畢生刻意練習分析之技。這些「看見別人看不到」的「FA達人」極寡，所以縱有公司，否極泰來，谷底回升時，股價只會是緩穩上升。
現實股市中，波哥的角色，分別由分析員和財經評論員擔當，務將艱澀難明的「說明書」，化成故事。分析員服侍基金經理，故事等於「研究報告」，重點：財務模型(financial models)、評論及目標價。而評論員，對象是普羅大眾，最有效之法，一如波哥賣廚具，必為刺激觀眾、易明的故仔，而非數字和商業模式。
古仔不斷重複
欲刺激觀眾，故仔的幻想空間，務須極其宏大，起碼升五倍、十倍。題目最好有「新」(新能源)、「網」(車聯網)、及萬能的「中」字。此外，老嫗能解，如「波斯登(3998)賣羽絨，逢冬天要揸」，和「故仔說一萬遍便成常識」，不在話下。重覆販賣SEXY古仔，撻著散戶，恍然大悟，瞓身押注，股價爆升，當是必然。摸頂坐艇，羞愧怒斬，在劫當難逃。
「授人以魚，不如授人以漁」。兔年心願，望多分享分析財務三表的經驗，大家不用幫襯波哥。