ZKIZ Archives


中環人語

2016-10-06  NM

大劉自製五福臨門

大劉雖然要一星期洗腎三、四次,但雄風猶在,只是口味轉咗啦,後生時疊水自然疊女,估唔到老來就疊「廚」,大劉昔日幫襯的富豪飯堂灣仔福臨門,早排為節省成本安排咗五個「老廚」榮休,大劉立即將五個廚私有化,今鋪自製「五福臨門」,仲威過坐喺福臨門開餐,其實五個廚都唔係好見使,一個俾甘比,一個俾呂麗君,有時仲要放假頂更。

唔好以為個廚被「私有化」好過癮,煮得唔好食,喺福臨門俾大劉最多鬧兩個鐘,登堂入室去煮,有乜差池,咪鬧足成日?加上大劉病咗,要食少鹽少油嘅「特別餐」,唔易煮o架,你估被大劉包咁過癮呀!

張松橋榮升JP契爺

家純同王穎妤的骨肉——洋名JP(John Paul Cheng),出世時跟母姓王,後來獲「阿爺」彤叔首肯,改番姓鄭,話晒都係個「孫」嘛,其實一睇JP堂眉就知係鄭家之後,可以話「一眉相承」;而純官的「鋤D會」核心成員——張松橋認真有遠見,早就契咗JP做契仔,咁同純官關係又何止Dee腳呢,所以話要擦掂純官,先要擦掂王小姐;唔少闊太家陣都要巴結王小姐o架,雖冇鄭太之「名」,但有鄭太之「分」。

中環寸嘴坡佬管家唔醒胃

喺我會展寫字樓望過去,灣仔間St. Regis酒店動緊工,早排住過新加坡間St. Regis,呢間酒店以每層有個butler(男管家)隨時stand-by而出名,我「超」,新加坡呢間St. Regis同泰國級數差不多,搵個黑卒卒麻甩佬做管家,又鈍鈍哋冇啲笑容,真係唔醒胃,同New York City間St. Regis個Lady in waiting(女管家)冇得比,人哋話晒都係東歐金髮洋妞,英文口音都過得去,有啲優雅咁,世界級嘅business traveller酒店即係世界級,新加坡呢間真係唔及人,行到身水身汗返酒店,我叫杯凍檸茶,撥入room service收費,成八十蚊港紙,butler service淨係咖啡或茶免費喎。唉,個早餐算係咁,間餐廳Brasserie Les Saveurs,樓底都夠高,有buffet之餘仲可以有幾款特色套餐揀,如日式、印度或者健康餐,我梗係整多個魚子醬奄列歎吓,不過呢度啲魚子醬就大粒咗啲,唔及信和黃志祥做老闆嘅Fullerton Bay酒店,嗰度早餐魚子醬細粒啲,味道清啲咁囉!國慶日高等學府掛晒「香港獨立」banner,計我話早前東華三院甲寅年總理中學啲學生率先塗鴉港獨先夠「前衞」領導潮流,本人作為該校1/20捐獻者後人都要發吓聲,個校長唔使死㩒,應該列出港獨嘅害處方能服眾,咁搞法,學生同校長都會攬住死,因為個校長都要向「吳得掂」叩頭 認錯!

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

馬會有賭未為輸

各位賭仔輸錢唔好怨馬會,因為馬會自己都賭輸,截至今年六月底的財政年度,馬會投資失利蝕咗九億三千萬,其中股票基金蝕三億、債券基金又蝕兩億八,較上年贏十五億半,相差一倍半,上落咁大,估計同馬會自己下海釣大魚,風高浪急有關。兩年前CEO應家柏打破馬會保守傳統,直接揼十億美金投資落去兩家「花底」對沖基金,一家係被美國司法部懷疑是利比亞獨裁者有份投資的Och-Ziff Capital Management Group,其股價由兩年前十二美金跌至現時四蚊,馬會揼落去嘅錢最少跌咗六成。另一隻對沖基金就係○五年因虛假交易被美國證監罰款一億八千萬美元的Millennium Management,Millennium正是近日陷入財務危機德意志銀行嘅客戶,上週才急急從德意志撤資抽身。不過馬會咁多錢,唔通放槓底咩,馬會可能係長線投資,輸都係賬面數,所謂有賭未為輸。

 
PermaLink: https://articles.zkiz.com/?id=221113

Next Page

ZKIZ Archives @ 2019