ZKIZ Archives


香港銀行跨行轉帳有排執 中環客

來源: http://hkcitizensmedia.com/2016/09/09/%e9%a6%99%e6%b8%af%e9%8a%80%e8%a1%8c%e8%b7%a8%e8%a1%8c%e8%bd%89%e5%b8%b3%e6%9c%89%e6%8e%92%e5%9f%b7/

中環客喺香港經常見到一個奇景,就係有班人,將一疊現金由A銀行提出嚟,然後人肉搬運到B銀行存入去,或者為咗幾舊水都出張支票嚟俾錢,呢種奇景喺第二啲國家都唔會發現。

香港之所以搞成咁,因為香港嘅銀行跨行轉帳貴到傻,比銀行業無香港咁發達嘅臺灣仲落後。喺臺灣,跨行轉帳講緊手續費係十蚊港紙左右嘅事,所以喺臺灣小額帳目都係ATM或者網上嘅WebATM過數算數,但喺香港,因為跨行轉帳講緊成五十蚊,甚至更加貴嘅服務費,而且唔係即時到賬,所以大家事無大小,都係將啲現金用人手搬嚟搬去,所以各大銀行嘅現金存鈔機,總係會搞到爆棚的。

香港搞到咁騎呢,全因香港嘅金管局基本上既唔鼓勵銀行間自己搞唔同嘅清算系統相互競爭,得銀行公會同金管局自己聯合搞嘅系統玩曬,一間清算系統獨大不倫不類,結果香港人要做錢銀嘅轉帳工作,都係要用啲極其騎呢嘅方法去進行。

金管局都知係有問題,所以2018年要求各大銀行要做到實時跨行轉帳,因為香港話係亞洲主要金融中心,呢方面連臺灣同新加坡都不如,街上成棚人係咁搬運現金,實在太騎呢。近排都有銀行開始識趣,唔收網上跨行轉帳費用,或大幅減少相關費用。俾著你係銀行,我諗寧願可以做到自動結算,好過要招呼一大棚現金客,特別依家好多現金客啲錢銀來歷不明,係咁收現金,始終係有洗黑錢監管嘅問題。話就話你有之前嘅提款收據,可以用嚟做啲錢乾淨嘅證明,只不過,啲提款收據唔跟銀紙冧把,你一張收據喺唔同分行多次咁用都吹唔漲,所以可以喺系統基建上減少人手現金交易需要,相信係皆大歡喜。

中環客

PermaLink: https://articles.zkiz.com/?id=214457

Next Page

ZKIZ Archives @ 2019