ZKIZ Archives


義助朋友做宏峰董事呂大樂處男下股海 李華華

2010-12-30  AD




 

潮流興講企業管治,上市公司如果搵到個得高望重嘅人做獨立非執行董事,唔好講咩,至少打底有50分形象分!

噚日華華睇招股文件嗰陣,就發現出年1月打頭炮喺創業板掛牌、做珠寶鐘錶貨源搜尋(即係sourcing)同採購嘅宏峰太平洋(8265),原來搵咗同佢哋風馬牛不相及嘅港大社會學教授呂大樂,做佢哋嘅獨立非執行董事。

希望服務嘅公司正經做生意

呂教授其實喺9月27號已加盟宏峰,任期3年,根據招股文件嘅介紹,呂教授嘅職責,係負責監督公司嘅財務滙報同內部監控原則,兼做埋董事會旗下審核委員會同薪酬委員會成員。

堂堂一介書生,呂教授何以處男下海勇闖金魚缸呢?佢同華華講,純粹係義助朋友幫吓手咁咋。但正所謂「缸」湖凶險,唔通教授一啲都唔驚?教授就咁講,佢話希望自己服務嘅公司,係正正經經做生意,佢都唔想俾人話係炒炒賣賣喺度呃股民!

出書引發「八十後」話題

咁又係呀,好多嘢係非佢所能夠控制,所以惟有寄望奪去教授第一次(做獨董)嘅宏峰管理層,要做好佢哋份工嘞!

話時話,呂教授係「欄王」一名,而且佢寫嘅嘢仲好有影響力,好似嗰本《四代香港人》,就引發咗「八十後」呢個社會話題。

至於佢啲專欄,話題都好多元化,唔知佢做咗獨立非執行董事之後,會唔會寫企業管治呢個topic呢?

李華華

LiWaWa@AppleDaily.com


義助 朋友 宏峰 董事 大樂 處男 股海 華華
PermaLink: https://articles.zkiz.com/?id=20810


ZKIZ Archives @ 2019