📖 ZKIZ Archives

香港黨委書記回憶錄

也是寫於2012年底的舊文，回帶。


被遺忘了的必讀中共天書

《本土論述》老編邀稿時要求，寫吓有關「李氏力場」及中資在香港的影響力，寫完上集「我的好友李嘉誠」之後，冇乜力再做大量資料搜集，與其講「中資」，不如直接啲，講吓「黨資」在香港的影響力。

今時今日的香港，嘈亂巴閉，好多人都話，之所以攪成咁，因為已經形成乜嘢「地產黨」惡鬥「共產黨」的格局，殺到埋身之後，票房毒藥開始變成票房保證，例如在舊年特首選舉期間突然爆出的《香港地下黨》，聽講非常賣得。真係想了多啲了解中共在香港的活動，查實有一本好多人唔記得咗的必讀天書，而且絕對應該精讀、一讀再讀，就係前新華社香港分社社長許家屯，出走美國之後所寫的《許家屯香港回憶錄》。

許家屯當時的另一個任命，叫做「中共港澳工作委員會書記」（港澳工委），亦即係「香港黨委書記」，由中共在香港「一把手」口爆而出的回憶，就算已經過咗三十年，對了解仍然以地下秘密組織在香港活動的中國共產黨，仍然好有幫助。

許家屯1983年6月30日以新華分社社長身份踏入香港，在羅湖過關時被記者追問嚟香港有乜貴幹，爆咗句「為祖國統一而來」，到1989年天安門事件之後「被退休」，元老級左派中堅人物吳康民，在自己本口爆歷史中，形容許家屯「專心幹上層工作，與大企業家、大資產階級打成一片，對基層工作一於少理」[1]。

對普通香港「基層」嚟講，當時香港面對前途問題信心危機；對「上層」的大孖沙，放在眼前的，變咗千億計的經濟利益再分配的大茶飯，為統一大業與中共連成一線對抗英國佬，組成史上最強的「政經義和團」，當然可以有更大「信心」更準「眼光」，「香港黨委書記」的回憶錄，雖然睇得出就住就住，亦揭露好多最高層的政商利益關係，斷估本書仔當日出版時，好多大孖沙第一時間買咗嚟刨，睇吓自己有冇「被爆料」，又或者用嚟研究吓，其他大孖沙「生意是如何做成」的成功之道。

順叔在1997年第一次睇呢本書仔，當時入世未深，冇乜感覺，近排再睇返，發現好多嘢其實歷久常新，最高層的政商瓜葛，萬變不離其宗，注意力由政治變到財經，更加有唔少新發現，其中一個最大「再讀後感」，就係雖然成功永冇倖至，不過唔少人上位發達、事業較同儕更易突破樽頸位、由百億巨賈變身千億富豪，同政治上正確埋堆好有關係。

絕對秘密的新組織

舉個例，根據屯叔所講，在1983年，在香港澳門有中共黨員六千幾友，其中大約一半係「當地黨員」，經過「六七暴動」之後，中共估計港英政府已好了解中共地下黨的情況，所以中共認為「有必要發展一個絕對秘密的新組織」[2]，在原地下黨組織裡面，篩選「一些估計港英可能沒發覺身分的黨員在社會中、上層做工作」，實行單線領導，採取地下黨的秘密做法。

呢個當時在地下黨以外的「絕對秘密的新組織」，而家唔知仲有冇存在，但係如果當時的組織成員，已經有人脈關係在香港的「中、上層做工作」，即係在1983年的時候，中共已經滲透咗唔少香港的政商精英，大家可以想像，呢班人廿幾年前上位的時候，有冇得到中共的幫助，又可以想像吓，三十年後的今天，當時的後起之秀，又有幾多已經變成香港建制的一線人物。

幫助中共黨員及統一戰線內「老朋友」的上位，可以靠中共本身的人脈網絡，亦有赤裸裸的金錢上的資助，好似屯叔所講，當日的華人資本家，唔少其實靠英國銀行支持發達，亦有一啲靠中國的支持，至於中國的支持，「有政治上的，但主要是商業上的支持」，「政商實際上很難分開」[3]。

支持華人資本家發財

「商業上的支持」，即係經濟上直接的利益輸送，幫人發達，屯叔講到明，佢老人家在香港坐館幾年，「直接支持了一批人不同程度地發了財」[4]，呢位「香港黨委書記」重要的工作，就係「支持華人資本家發展他們的事業」[5]。

最簡單最直接的例子，就係香港人都好熟悉的，土地供應及規劃。屯叔話根據鄧小平的指示，「九七年以前不能讓英國人把香港地皮賣光」，每年批地唔可以超過50公頃，除咗營造一個地產大孖沙開心都震的高地價政策環境，真正的利益輸送，極可能出現在包括中方代表的土地委員會，所有土地使用都要通過呢個委員會，即係香港最高的地政規劃權力機構，據屯叔所講，「有些大地產商同我們交往中，反復要求我們：土委會不能多批土地」[6]。可能因為佢哋捍衛香港土地供應有功，所以地產大孖沙係得到最多大紫荊水蓋的職業，不過大家可以諗吓，當時會唔會有好多晨早應該發展的地皮或者地產項目，因為同地產大孖沙的現有項目有利益衝突，在土地委員會過唔到關。

獲得中國的支持，又或者中銀的支持，過江龍都可以有本事打破「地產霸權」，好似信和伯爺黃廷方咁，本來活躍於新加坡，認識當時在中國銀行新加坡分行總經理、後來去咗中銀港澳管理處做副主任的薛文林，八十年代初獅城地產高潮過後，嚟到香港發展，「運用他同蒒文林的關係」，「中國銀行也積極給他融資」，黃廷方在「這樣的支持下，放手收購土地，面積幾乎與地產巨商郭德勝相等」[7]，香港地產「大好友」因而得名，難怪早在1983年，黃廷方就超高調咁公開表示贊成中國收回香港了。

當然啦，資本家本身冇咁上吓實力，中共又未必會睇得上法眼，所有大孖沙排成一行，最後邊幾個做終極辦事人中間人，亦取決於好多其他因素，好似中共選政治局常委的坐館，近年都睇年紀是否合適，太後生太浮躁信唔過，揸FIT人揸揸吓走去同馬克思揸手亦唔係咁好，香港而家一線幾個大孖沙，都係咁上吓年紀，未必完全係巧合。

據許家屯透露，香港「某巨商」，曾經攜同三位公子宴請佢，席間屯叔講到一國兩際一切不變，只係換支國旗，英皇委任港督變咗香港人選舉總督，其中一位公子爺，好唔順超咁反詰，「那不變成中國的殖民地了嗎？」，屯叔在回憶錄的評價就係，那位公子爺「那時腦袋中，已視香港非中國領土，自己是具獨立性的香港人了。」[8] 呢位「某巨商」係邊個，順叔都估唔到，不過八十年代有三位公子可以同大人同枱食飯兼駁咀的巨商，唔會有好多。

咁講啦，當年誠伯同許家屯有「兩人慣常的共同午餐」[9]，誠伯亦識得同屯叔表達好意，以屯叔的身份，應該以私人飛機往返京港兩地[10]，當年香港新華分社有一項為數二千幾萬、冇名稱的「小金庫」，更加係誠伯通過莊世平捐助[11]，俾新華社領導人使用，生意是這樣做成的，學嘢啦細侄。八十年代初，誠伯四叔彤叔食大茶飯的時候，大約係50歲，新地第二代三位公子在2000年食大茶飯，咬落而家IFC及ICC皇牌地皮的時候，亦係50歲左右，咩年代咩年紀的大孖沙食大茶飯，好似真係好有季節性因素。

新華社的及時雨萬應錢

「商業上的支持」，亦可以係救急夫危的「救火隊」，可以想像，當年唔少資本家明白本身在政治上的戰略地位，有乜冬瓜豆腐，就走去跑馬地新華社撳萬應錢，當年大孖沙小孖沙的信貸違約比率，應該係歷史低位。

舉個例，新地創辦人三劍俠之一的馮景禧，當時好有雄心壯志做投行大鱷，佢間新鴻基證券，一度係香港美林的大股東，不過1983年股災出現財困，去到新華社拍門，中銀集團本來唔想出手，屯叔說服當時港澳工委在中國銀行港澳管理處的負責人蔣文桂，幫助馮景禧重組，馮景禧好「高興地去休息旅遊」，在遊輪上不幸中風去世之後，中共「繼續支持他的公子」接掌事業[12]。

另外仲有一次「姓馮的香港世家」，公司發生財務危機，又去新華社兼港澳辦拍門，佢係「中國的老朋友」，不過香港中銀、北京總行都唔同意借錢，最後由許家屯拍板，在中央撥俾港澳工委的「特費」，「撥出他們要求的數字」，存入中銀作抵押，再由中銀借錢俾呢位「姓馮的香港世家」。斷估呢筆錢數目唔少，重點係，港澳工委竟然有呢個數目的「特費」，認真巴閉，呢位「姓馮」的資本家係邊個，屯叔冇爆響口，不過既然唔係馮景禧，份屬香港「世家」級，「姓馮」又係「中國的老朋友」，身份已經呼之欲出，總之唔係馮寶寶啦[13]。

講到「世家」，香港最有錢的「李」，只係去到第三代富貴，啱啱可以叫「世家」，最Blueblood的「李」，肯定要數東亞銀行李國寶的家族李氏家族，五代皆昌，不過就算人脈神通廣大如李國寶，當年都曾經搵救苦救難新華社撲華應錢，屯叔話當年東亞主要股東中，有人因為對香港信心的問題，想撤出資金（順叔懷疑係創辦人家族之一的簡銳強，七十年代尾行政局首席非官守議員），股東之間發生糾紛，法國某銀行想借機收購，李國家搵中銀救助，並到新華社撲水，結果由中銀出手購入東亞股票，幫李國家渡過危機[14]。

當年江蘇省一年的財政收入，都係七十億人民幣左右，以當時中國的經濟實力，未夠班透過國企控制香港經濟命脈，亦冇商業人才在資本主義世界直接競爭，唔收購香港企業，可以收購人脈，在資本家財困的時候，借錢救急扶危，等如做咗大量「政治天使投資」，仙天散花式的投資在多個資本家，適當時候收割，政治回報可能大到不能量化。

打救港澳兩位行政長官

中國透過「中資」、「黨資」收購「人脈」，有乜著數，有好多經典案例。

在1983年，兩位「中國的老朋友」，澳門中華總商會何賢，及香港中華總商會會長霍英東，一樣患上癌症，霍英東聽咗許家屯意見，去北京救醫，中國「集中了全部的名醫」幫佢發功，結果大步檻過，返香港以「再生之德」四個字感謝許家屯；何賢去咗美國醫，冇幾耐去世，之後「家庭內有糾紛，事業上也碰到一些困難」，結果又係港澳工委出手，幫助何賢的公子「解決銀行的麻煩」[15]，呢位何公子，正正係日後的首任澳門特首何厚鏵。

霍英東的家族事業，一路都冇上市，但一樣做得好大，斷估因為背後得到好多中資黨資的幫助，互惠互利之下，霍英東盤生意冇上市，冇公開帳目，幫中共進行政治上的商業任務亦更加方便，例如在1986年，東方海外財困，正正由霍英東出手，投資近10億港紙幫助東方海外避過破產危機，當時東方海外的老闆，就係老船王的公子董建華，亦即係後來的香港特首。在許家屯回憶錄中，完全冇提及呢單「政治期貨」的交易，甚至董建華的名字亦冇出現，可能涉及「國家機密」，屯叔冇爆響口，另一個可能，就係由更高級的中共組織力量推動，連「香港黨委書記」都不知情。東方海外及老船王董浩雲，同台灣關係密切，霍英東的投資令東方海外色彩太「紅」，1992年重組，發行可換股債，引入李嘉誠長實的資金洗底，持股最高接近10%，商業投資？政治期貨？

可以見到，香港及澳門兩個行政特區的第一任特首，董建華及何厚鏵，都係在八十年代中，因為中共的幫助渡過財困，呢啲就係真正的「中資」的影響力。

拖住英資、穩定港資、壯大中資

據許家屯透露，當時內地到香港的資金有兩種，一種係國家或地方政府撥款，數量有限，最大幾筆，包括國務院撥給中信及光大兩間金融改革的「窗口」，但唔超過5億美金；另外一筆就係撥予新華分社（可能係上文提及的「特費」）的1億美元，地方政府及中央部委分別唔會掉撥超過1億美金，即係真金白銀流到香港的「中資」，大約只有10個億美元；當然會有灰色地帶，例如中國資金在香港投機倒把做生意，賺咗錢，一部分上繳阿公納糧，一部分繼續在香港滾存，亦有人穿櫃統的「正常現象」，加埋呢嚿灰色資金，許家屯估計，由內地流出到香港的「中資」，頂峰都只有30億美元[16]，同當時香港經濟活動比較，只係九牛一毛，冇特別大影響力。

在1983年9月，許家屯向中共中央提出22個字的香港經濟工作方針，「拖住英資，穩定華資，爭取外資，團結僑資台資，壯大中資」[17]，之後冇耐，港澳辦開咗一個關於港澳經濟工作的會議，出席者包括中央所有部委，仲有同外貿有關的省市負責人，當然唔少得港澳工委及中資機構負責人，一個針對香港、咁大規模的全國會議，前所未有，由港澳辦代表國務院主持，唔使問阿桂，就係港澳辦用嚟拖許家屯後腳的大龍鳳，當時有份文件， 作出多項政策性規定，不準炒外滙、不準炒地產、不準炒黃金等，中資外滙不準存放外國銀行，必定要存放在中國銀行，據許家屯所講，呢份「九不」政策，主要精神就係陳雲有關「肥水不落別人田」的指示，對中資在香港的發展，設置重重障礙。可以想像，如果政策落實，所有在港澳活動的中資黨資，冇晒撈油水的機會，個個當然喊晒口，結果許家屯使橫手，走去見趙紫陽，建議唔會下發有關文件，老趙冇表態當「默許」，結果不了了之，最少文件冇由中央下發到香港，中資黨資避過「九不」一劫，繼續在香港大炒小炒[18]。

當時改革開放進行咗只有幾年，改革及保守路線仲充滿意識態的衝突，更擔心太多「肥水」落咗香港呢塊「別人田」，影響內地本身的發展，所以「壯大中資」的步伐，其實受到非常巨大的政治限制，中共最能控制自如、在香港最關建的「黨資」窗口，其實係銀行，即係當時在香港的中銀。

當日中共可以靠統戰一批華資大孖沙，主導香港多個經濟領域，唯一冇代言人可以取代的地方，亦係銀行，即係滙豐銀行的地位。

與滙豐分享經濟利益

滙豐早期在香港金融市場，壟斷咗多個重要戰略位置，名義上叫做有競爭，但滙豐其實享有中央銀行的特權（又無需付出中央銀行的義務），可以發鈔，更加係結算銀行，其他競爭對手盤路走唔出滙豐法眼，根本冇得爭，更重要一點，香港唔少大孖沙靠滙豐發達，滙豐既是英資，但同時同華人資本家建立咗你中有我的利益關係網。

中共要處理滙豐在香港的利益關係，其實同處理英國在香港的利益關係一樣，冇可能好似1949年咁共他的產連根拔起，一時三刻亦無法取代，所以唯有拖，拖住的時候，就要分享利益，對滙豐如是，對英國亦如是。

舉個好簡單例子，制訂基本法時，香港特區從冇打算設立本身的中央銀行，1997年後仍保留滙豐部分央行的「特權」，可以繼續發鈔，就係「拖住滙豐」[19]的策略，分享利益等大笨象繼續有錢賺，唔會撤出香港，甚至讓滙豐進入內地市場，出現壞帳，許家屯更出面交涉幫蒲偉士追爛數[20]。

同撈同煲「分享利益」的經典例子，出現在1987年的股災，港英政府、中銀及滙豐，齊齊出手救市，事後有人八俾許家屯知，滙豐「借救市獲利甚豐」，「香港某巨商也獲巨利」[21]。滙豐終於肩負多少中央銀行的「義務」，救市獲利，無可厚非，邊位「某巨商」同滙豐咁熟，某神通廣大知道呢個中英合作救市大計，大家可以估吓。

既然中國肯在香港分享利益，前途談判期間的港英政府，亦做咗唔少嘢，明益中資。

舉個簡單例子，1982年8月，即係戴卓爾夫人訪問北京展開香港前途問題談判前一個月，港英政府以10億港元價錢，將現時中銀香港總部土地，賣俾中銀集團（應該冇公開招標），講緊再半年之前，置地買入現在交易廣場一期的土地，需要付出破記錄的47億港元，就算地產市道陷入低潮，位置冇交易廣場咁靚，都冇理由咁平，仲唔係明益中銀？

當中銀在商業中心平價取得地皮，準備建立總部在香港大肆擴張的時候，1982年底，滙豐率先推出20年按揭，跨越「九七大限」，呢個其實滙豐將自己前途重注押落香港的重要動作，多數華資大孖沙其實係滙豐或者恒生一手一腳湊大，包玉剛食九倉、李嘉誠吃和黃，都係因為滙豐向華資大孖沙傾斜的「造王」結果，所以滙豐有別於類似怡和的一般香港英資，可以更直接感受到當年中國的政治脈搏，亦更有條件，在過渡期的香港，分享經濟利益，「拖住」滙豐，作用同「穩定華資」異曲同工，不過滙豐更明白，食完大茶飯就應該起身走人的道理。

1982年前的滙豐，在香港這個眾所久之的經濟奇蹟之地，擁有近乎中央銀行無可代替的壟斷地位，明乎其實係一盤印銀紙的生意，其後15年的過渡期間，亦在中國的祝福下，繼續分享經濟利益，呢個其實係「有買貴；冇買錯」、「最叻買滙豐股票；最蠢存錢落滙豐戶口」等經典街坊智慧的最佳政治詮釋，其他乜嘢管理一流作風審慎，曉，攞嚟講矣，君不見在廿一世紀初，中銀集團合併為一，在香港上市，「拖住英資」變成全面「壯大中資」的時候，滙豐就要死去美國買次按買CDO，買落間Household，埋下2009年世紀供股伏線，管理真係咁一流，曉未？

銀行係百業的老母，坐住一盤銀行生意，等如掌握咗一個重要的商業網絡，邊位資本家生意唔掂，同咩人咩公司有錢銀往來，好容易透過銀行掌握，所以銀行咁重要，所以當年滙豐計劃同英國萊斯銀行合拼，驚動到戴卓爾夫人，要托美國國務卿基辛格帶口訊去北京，澄清此乃滙豐商業決定，並非英國人的陰謀[22]。

井水不犯河水的楚河漢界

咁即係話，涉及銀行控股權的交易，背後多數有政治考慮，或者擺脫唔到政治的干擾，掉轉頭講，如果中國及中共，要加強對香港經濟的控制，亦必定要進一步在金融市場「壯大中資」的影響力。

所以近年有香港銀行賣盤，多數成班中資國企搶住要，例如2007年永隆銀行賣盤，招商銀行高價奪得心頭好，排隊搶住要，冇諗住買都埋嚟睇吓的中資巨企，仲包括工商銀行，同埋中國人壽。
四大國企銀行當中，中國銀行有中銀香港，建設銀行2005年收購咗美國銀行的香港業務，工行亦已經私有化咗工銀亞洲，唯一未在香港插旗的，只有農業銀行，不過農業銀行在2012年，一掟50個億港元，以破記錄28,000蚊一呎的價錢，買咗干諾道中50號做香港總部，想在香港建立根據地的意圖，已經相當明顯，如果再有香港銀行控股權出讓，農行多數會撲出嚟要。

以前江澤民坐館，講過「井水不犯河水」，1997年的時候，搵董建華做香港總辦事人，斷估其中重要考慮，就係睇中董建華及老船王董浩雲的台灣關係，配合當時利用香港做一國兩際的「示範單位」，推動兩岸統一的春秋大業。

在1997年至2003年的六年期間，國企嚟香港上市集資以萬億銀計，不過大部分運返大陸發展，冇話在香港有乜收購，連中國海外呢間老牌地產公司，都寧願海外變海內，專注內地發展，當年大陸經濟起飛，搵錢易過香港，不過中資在香港，基本上持守住「井水不犯河水」的楚河漢界。

不過唔知係咪董伯伯特別黑仔，一國兩制變咗香港跳晒掣，六年通縮經濟大亂之餘，香港仲變成間碟天堂，連中聯辦秘書長（即大內總管）蔡小洪，亦在2003年因為涉嫌長期為外國情報機構提供中國國家機密被查處，被判監15碌，中聯辦跟住重組架構，北京亦全面調整香港政策，CEPA自由行，開始全面推動中港融合，內地資金亦開始隨住自由行及投資移民等資金流，湧入香港，維港兩岸商廈的大型廣告招牌，以前仲有「三九惠泰」之類的香港企業，而家見到越來越多的國企招牌。

中移動收購萬眾進入電訊市場，國企巨銀紛紛在香港插旗，收購香港銀行或重要地皮做總部，連華潤的便利店及超級市場亦越開越多，都係在2003年之後出現的趨勢，甚至開始進入能源市場，例如2003年開始，特區政府改變油站招標方式，將幾幅油站用地，合拼招標，等新進入市場的玩家，可以擁有更具效益的經營規模，所以近年見到越來越的中石化及中石油的加油站。

1997年前後，中資企業在香港金融市場攪攪震，借殼上市大炒特炒的例子甚多，例如今日的中信泰富、昆侖能源等。在1998年，中航工業總經理朱育理，同李嘉誠「商談合組一家公司，藉此支持內地航空工業發展」，1999年透過中航技術進出口總公司，收購遠東鋁質借殼上市，變成今日的中航國際香港，據講當時的國務院總理朱鎔基親自批示，呢類中資借殼活動，「這是最後一家」[23]。

即係話在1997至2003年的，中資要在香港金融市場搞搞震，絕對唔容易，吓吓要去到國務院最高層搵朱總劃圈，但呢條在財資市場的重要楚河漢界，在2012年開始甩晒色，中資國企在香港借殼上市，好似再冇禁忌，例如中紡集團收購福田實業、中國建築收購遠東環球、中糧集團入主僑福集團，國企央企資金開始在股市自出自入，四大老牌內地地產公司「萬保招金」，即係萬科、保利、招商及金地（保利地產及招商地產都仍算係「國」控資產），更加先後在香港取得上市公司的融資平台。

1997年後的香港，已經變咗自己的地方，中共在香港的經濟工作方針，重點由「穩定華資」，向「壯大中資」傾斜，最代過渡期間的華資大孖沙，換上直接控制的央企國企黨企，斷估都係發展大方向，問題係有幾快咁解。

要分析呢個發展趨勢有幾快，有幾個好有象徵意義的G點，捽多幾吓，香港政界商界可能好多人好興奮，出現唔少奇怪動作，建議大家留意吓，見到相關的新聞，多啲從唔同角度思考。

第一：東亞的控股權。

1997後東亞的李氏家族，可以話係中共最依重的政治代言人，幾乎人人位高權重，李福善參選特首，曾經以為自己有機會；李國能做首席大法官；李國章係中大校長，後來做埋教育局局長；李國寶就更加唔使講，三點不露但長坐立法會金融界功能屆別幾廿年，又做過行政會議，幫曾蔭權籌款助選，成為兩屆特首選舉的造王者。

2013年的今日，呢個李氏王朝，已經冇乜邊幾個高能量代表人物，2012年李國寶諗住再做「造王者」，幫唐英年競選特首，結果衰咗俾梁振英，其後的立法會選舉，李國寶決定唔再連任，立法會金融界代表，由中資銀行體系的吳亮星出任，大家已經知道乜事。

上文講到，八十年代東亞銀行出事，搵中銀出手解困，近年大馬僑資的國浩打咗口釘落東亞，市場成日唱國浩有意狙擊東亞，李國寶再面對失去東亞控制權的危機，以佢老人家在中國的人脈，竟然冇再搵中資銀行幫手，反而走咗半個地球，先後向西班牙及日本的股東撲水，查實好有象徵意義，即係今時今日，李國寶呢類遊走中英之間食咗幾十年兩家茶禮的代言人，在北京眼中已經冇咁吃香，在李國寶心目中，分分鐘驚中銀黃雀在後，多過國浩螳螂捕蟬，嗱嗱嗱，滙控賣平保股權，竟然係在國家開發銀行支持下，賣俾泰國華僑集團，拖住英資，穩定港資之後，可能都係時候團結下僑資，壯大中資。

在香港中小型銀行當中，東亞銀行仍然由家族控制並「世襲」管理權，但李氏家族亦冇控股權，加埋持股都係10%左右，亦即係最容易的狙擊目標，李氏家族可以保住東亞的管理權，主要來家族的政治能量，人人俾臉，如果東亞的控股權，最後落入「僑資」，甚或「中資」手中，查實等如向外界宣布，過去幾十年在中英港三角地帶最受重用的政治代言人，開始失去策略價值，大家有冇留意，從政幾十年的李國寶，竟然同你講「搞政治完全係浪費時間」[24]。

當然啦，中資銀行要加強在香港金融市場的影響力，唔係吓吓做收買佬，香港目前最重要的策略價值，就係做人民幣國際化的緩衝區、實驗室，人民幣業務的清算工作，落在中銀香港手中，人民幣在香港的普及，甚至好似澳門咁，出現當年港幣取代澳門幣的情況，中資銀行的影響力亦會大大增加，呢方面的競爭優勢，其他銀行冇得比。

第二：兩電一煤的壟斷地位。

兩間電力公司，仲有煤氣，都因為壟斷地位在香港賺足幾十年，每年賺幾十億計，但呢幾盤最賺錢最冇風險的生意，唔係必然的，政策上少少改動，足以動搖根基。
而家的新住宅樓盤，例牌幫你駁埋煤氣喉，有冇諗過，點解冇選擇？

唔係咁多人留意，幾十年前的香港，查實有其他選擇的，舉個例，作為地鐵第一代的住宅樓盤，杏花邨唔係燒煤氣的；七十年代尾開始建設的愉景灣，亦唔係燒煤氣的，以前港英政府做嘢，應該考慮到外資能源公司的競爭能力，今日成日講西氣東輸，香港同中國亦已經簽定天然氣供應的諒解備忘錄，中華煤氣在香港的壟斷地位，並非必然。

2003年加油站用地招標方式，一項少少的修改，已經足以為中石油中石化打開市場，在住宅燃氣市場，查實一樣可以，例如只要政府在新批出住宅用地時，加入簡單的條文，需要預留地方做中央石油汽或天然氣儲存設施，就算只針對公屋居屋的土地，亦可以即時威脅到恒地旗下的中華煤氣的壟斷地位。

香港有兩間電力公司，地域上各自壟斷半壁江山，已經改名做電能國際的港燈，地盤受香港島海岸線所限，市場亦想當飽和，唔會有乜特別的自然增長；中電就唔係咁講，例如新界東北的新展區，落成之後，多咗幾廿萬用戶，可以咁講，新界的發展，對中電嚟講，其實係好吸引的增長潛力。中電的地頭，地理上同內地天然相接，中港邊境發展越發，中電亦有更大市場增長空間，甚至在內地有更大發展，所以如果北京想推動中港進一步融合，絕對有誘因拉攏中電的支持。

中電的嘉道理家族，可以在香港企得住腳，唔似得港燈咁被華資吞併，除咗因為嘉道理家族冇顯露乜嘢爭霸稱雄的野心，嘉道理家族處理北京關係亦肯定有一手，例如1986年在香港的大亞灣核電廠項目，曾經賣咗一個大人情俾李鵬[25]，嘉道理家族亦係中國同英國溝通的重要中間人，例如1989年天安門事件後，北京市游泳運動員楊洋，聲稱恐怕回國後被政治清算，申請政治庇護，港英政府容許楊洋去美國，違返咗中英之間有關遣返逃港人員的外交協議，中國結果亦拒絕接收中港邊境的偷渡客，鬧得咁僵的時候，許家屯搵包玉剛出手，港英政府都不為所動，結果許家屯要請嘉道理家族「運用他的影響」，一日之後，嘉道理就同屯叔講「你要我做的事情，已經做好了，等消息吧。」[26]港英政府後來果然透過南華早報頭版重申承諾，無意讓香港成為顛覆中國的基地。

中電在2012年宣布，有意在埃克森美孚手上，回購青山發電60%股權，呢嚿香港最重要的電廠資產，價值幾百億港元計，中電表示，中國的南方電網在後期加入洽溝，如果成事，將會成為中資國企進入香港電力市場的最轟動大刁。打破電力市場的壟斷，唔單止係香港的議題，內地亦有強烈聲音要改革由兩間電網公司壟斷的電力市場，中電及南方電網合作，會唔會一舉打破中港兩地市場的壟斷，定係齊齊分享利益，應該好快有分曉。

第三：大型地標式的地產項目

1997年之後，香港轟立新建的最突兀地標，當然係維港兩岸最高的兩楝商業摩天大廈，國際金融中心及環球貿易中心，過去十幾年，在香港地產市場，關係到大孖沙利益再分配、勢力範圍重整的最重要交易，就係呢對雙子塔，港鐵機場線香港站及九龍站的上蓋項目。

以前中環的大地主，叫做置地，在金鐘，叫做太古，租金收入最豐厚的，叫做九倉，擁有尖沙咀海港城及銅鑼灣時代廣場兩大皇牌零售物業。IFC同ICC落成之後，新地的租金收入，一舉超越晒置地太古九倉，成為全香港租金收入最豐厚的包租公，一年袋接近100億港元，而且擁有無可匹敵的無形價值，例如而家內地遊客必到的景點，除咗山頂老襯亭，就係彼岸相對的SKY100，令新地的招牌，在內地響徹雲霄。

所以話，在市區黃金地帶，一塊大型地皮的出現，一個地標式項目的出現，對地產商的勢力平衡，影響可以好大好深遠，如果閣下係既得利益者，好可能會千方百計的阻止新地標的出現，係咪？
所謂「地產霸權」，有時好可能會以「反地產霸權」的形象出現在公眾的眼前，例如近年好流行、好正義的保育聲音，又或者環保、文化團體咁。

呢度唔係話兩者必定存在因果關係，而只係想指出一個好殘酷的現實，過去唔少所謂環保組統、保育團體，在地政規劃戰役上取得表面上的「勝利」，或多或少，進一步鞏固咗「地產霸權」的某部分壁壘。

香港由下而上、爭取民間聲音在規劃公共空間話語權的經典戰役，出現在皇后碼頭係咪？當時絕食示威的一班後生仔，應該叫「維港英雄」徐嘉慎一聲師兄，呢位前城規會成員，本來係三號幹線公司高層，幫新地打工，啱啱遇著剛剛，被老母當頭喝醒，毅然要保護維港反對填海。唔好忘記，IFC同ICC都係填海得來的大型黃金地皮，建成全港最高的屏風樓，雄霸360度海景，做成香港海岸線最激動的「建築物後移」現象，啱啱遇著剛剛，維港唔可以再填海，IFC同ICC永遠唔會出現「建築物後移」現象，永享維港景色，更加唔會再有大型填海地皮，同佢搶奪租客。

為咗保育，上海街曾經有「三級架步」，一夜變身「一級文物」。估唔到呢個「三級」變「一級」的凸變，亦出現中環，政府合署西座，幾經爭議，政府最後決定唔會清拆重建，保育團體又獲得大勝啦係咪？

不過，大家可以諗吓，當日添馬艦地皮，政府決定改變土地用途，唔拍賣起摩天商廈，查實已經明益地產商，避免中環的一級寫字樓供過於求，結果幾經轉折，賣又唔賣，最後決定起新政府總部。好喇，政府搬屋之後，原來的政府山，包括美利大廈、政府合署咁，本來可以成為中區商業中心最重要的大型新地皮，有可能成為另一個IFC式的新地標，而家乜都唔準拆，呢個保育團體獲得最後勝利、老少咸宜的「一級」神話，背後有冇啲「三級」故事？又有冇地產霸權無間道推波助瀾？

以上問題，順叔通通都唔識答，不過唔知點解，凡係黃金地段有大型地皮推出，凡係有新地標可能出現的時候，規劃上硬係拖拖拉拉十幾廿年，例如合和在灣仔的「MEGA TOWER」，就唔知乜事搞了咁久，在2012年先過到關。

大型地皮拖拖拉拉十幾廿年的最經典例子，當然要數西九龍乜差文化區，呢塊香港有史以來最巨型的地皮，晒太陽晒足十幾年，菜都種唔到一條，唔通真係因為香港藝術家文化人咁有影響力咩；又好似郵輪碼頭，搞咗十幾年，大眼雞都見唔到一隻，之唔係因為在西九南九呢兩塊重要地皮，拆唔掂數，就係咁簡單。
從呢個角度睇，西九南九未來可能出現的大型新地標，由邊個香港地產商獲得，對華資大孖沙的利益再分配好有啟示，如果一個唔覺意，有中資國企分到餅仔，到時再講「共產黨」惡鬥「地產黨」都未遲。

共產黨惡鬥地產黨？

如果政治經濟可以分開，歐美呢啲民主國家自由市場，企業及商家佬可以瞇埋眼做生意，唔使搞咁多政治捐獻，掉轉講，政治上的出現權力的突變，跟住必定出現大量的經濟利益再分配。
講到政治上的權力突變，香港主權回歸，就係最極端的例子，而且係發生在一個舉世公認的經濟奇蹟上的權力突變，仲有長達廿幾三十年的蘊釀期，期間出現的經濟利益再分配，自然係一舖可一不可再的超級大茶飯。

香港面對前途問題，中國要「拖住英資」，同滙豐得英資勢力分享利益，依賴滙豐當年在金融市場無可代替的力量，結果獅王變身「有買貴冇買錯」、識飛的大笨象；要「穩定華資」，統戰資本家確保香港繁榮安定，結果一班營商有道又有敏銳政治觸角的大孖沙，與香港經濟的起飛同時起飛，變身超人。

那些年，中國共產黨同香港大孖沙打成一片，今時今日，斷估都唔會輕易出現「香港黨委書記」出走美國的情況，就算再有中共高層走佬，斷估亦唔再需要出書搵外快，當年有《許家屯香港回憶錄》，展現中國共產黨及香港大孖沙的互動關係，今日中共在香港的經濟工作方針，係咪終於到咗「壯大中資」的時候，普通香港人唯有在種種政經脈搏中靠估。

好簡單咁講，如果四四六六撐掂晒，大茶飯你一啖我一啖齊齊開心，社會自然歌舞昇平，肯定唔會有咁多核凸嘢浮面，好似負責規劃地政的發展局局長，糧都未出就被人收皮，又好似免費電視牌咁，政府搞到彈弓手話發又唔發咁肉酸。

當日的中國經濟未起飛，國企未成氣候，香港的英國政治力量根深蒂固，要收回香港的主權及經濟主導權，唔單止要同英國政府講數，亦要同香港資本家甚至親中的英資分享利益；今日中國大國崛起，政治上完全控制香港，唔少中資企業更加係市值萬億銀級的巨企，真係共產黨鬥地產黨，邊度有得打，似乎係各自鬼打鬼多啲囉。


[1] 《吳康民口述歷史》，2011年，P.98
[2] 《許家屯香港回憶錄（上）》，2011年版，P.76
[3] 《許家屯香港回憶錄（上）》，2011年版，P.235
[4] 《許家屯香港回憶錄（上）》，2011年版，P.131
[5] 《許家屯香港回憶錄（上）》，2011年版，P.239
[6] 《許家屯香港回憶錄（上）》，2011年版，P.237
[7] 《許家屯香港回憶錄（上）》，2011年版，P.242
[8] 《許家屯香港回憶錄（上）》，2011年版，P.90
[9] 《許家屯香港回憶錄（下）》，2011年版，P.444
[10]《許家屯香港回憶錄（下）》，2011年版，P.35
[11]《許家屯回憶與隨想錄》，1998年，P.131
[12] 《許家屯香港回憶錄（上）》，2011年版，P.131-132
[13] 《許家屯香港回憶錄（上）》，2011年版，P.132
[14] 《許家屯香港回憶錄（上）》，2011年版，P.238
[15] 《許家屯香港回憶錄（上）》，2011年版，P.139
[16] 《許家屯香港回憶錄（上）》，2011年版，P.256-257
[17] 《許家屯香港回憶錄（上）》，2011年版，P.59
[18] 《許家屯香港回憶錄（上）》，2011年版，P.246-253
[19] 《許家屯香港回憶錄（上）》，2011年版，P.233
[20] 《許家屯香港回憶錄（上）》，2011年版，P.233
[21] 《許家屯香港回憶錄（上）》，2011年版，P.200
[22] 《許家屯香港回憶錄（上）》，2011年版，P.232
[23] 《星島日報》，「朱總：最後一家紅籌買殼」，2000年9月11日
[24] 《星島日報》，「李國寶引退撐吳亮星接棒」，2012年5月14日，http://www.singtao.com/yesterday/loc/0514ao01.html
[25] 《許家屯香港回憶錄（上）》，2011年版，P.204-205
[26] 《許家屯香港回憶錄（下）》，2011年版，P.407