ZKIZ Archives


湯彥麟上位 左丁山

2010-12-14  AD




 

國泰航空公司真 巴閉,推出空中服務員新制服、商務艙新座椅、機場貴賓室新裝修,都可以請到政務司司長唐英年到場主持,並試坐商務位,謀殺不少菲林(或者現在要講:消耗不 少記憶體)。當然,呢個新產品介紹會並非簡單,左丁山現場估計要用起碼一百萬元,後來碰到一位國泰文膽,問佢用咗幾多錢,佢毫不猶疑咁講:over a million。

介紹會於十二月七日在會展新翼大展覽廳舉行,應邀到場人士有傳媒代表,馬可孛羅會鑽石級級數會員,睇落起碼有二三千人,場 面盛大,新產品面世前就有來自澳洲嘅雷射人(Laserman)作雷射激光舞表演,之後由即將退休嘅行政總裁湯彥麟致詞,指出國泰係香港的航空公司,擁有 飛機超過二百架,未來十年會投資百五億以上嚟擴充機隊及貨運站,係香港經濟一大力量。

國泰已發盈喜,國泰、港龍員工齊齊加人工,早已脫離航空業艱苦時期(例如陳南祿當政時之九一一後遺症與沙士),做乜有國泰李察基爾之稱嘅湯彥麟要辭職走人呢?呢個時候做國泰總裁好容易領功嘅噃,咪益晒繼任人史樂山?

呢, 有事唔識就要問。前輩W老早坐在大堂中座嘅高腳櫈上嘆緊白酒,左丁山幾年前到福岡旅行,住在君悅酒店,早上吃早餐時見到前輩W一家三代齊集,呢次係第二次 遇上。同前輩W講起呢個問題,前輩W話:「唔好睇小IATA總裁呢個職位,呢個組織在國際航空界好有地位,二十幾年前我知道國泰行政總裁M退休之後就想入 IATA做呢個位,但當年亞洲經濟未壯大,國泰唔算係大航空公司,歐美航空界唔想畀國泰退休高層做IATA總裁。現在唔同晒嘞,國泰有二百架飛機起碼,歐 美航空公司未曾破產嘅就要互相合併,或搵政府救亡,邊度有國泰、新航咁威風吖,JAL都要破產保護啦。故此今次湯彥麟把握機會,提早退任去做IATA行政 總裁,雖然人工花紅未必有國泰咁高,但地位超然吖嘛!」前輩W果然識得提點,正是,好位不常有,有位就要立即上,湯彥麟今次夾啱天時,得到退休後嘅 Dream Job,恭喜晒。


PermaLink: https://articles.zkiz.com/?id=20229

Next Page

ZKIZ Archives @ 2019