|
||||||
|
上到陸羽飲茶， 幾位老友已在討論米芝蓮星級食肆。「蘋果」最為報導詳細，全部名單落齊，大家互相挑戰，睇吓邊個去得上榜名單嘅食肆最多。唔好以為左丁山成日飲飲食食，可 以贏到牙骹，原來細看之下，左丁山去過嘅食肆，集中於一星至三星，名列「米芝蓮車胎人美食」嘅餐廳之中，只係去過元朗大榮華一間，於是俾老友記噓一輪，話 左丁山唔得深入群眾。呢樣要認，因為自己最怕坐位擠逼，地方狹小，兼要輪候排隊，上述三樣俱備嘅食店，左丁山一定唔會幫襯。 討論焦點在新同 樂獲得三星，我地以前去過銅鑼灣店，冇咗好耐啦，突然以為呢間老店已經消失咗o忝，憑過往經驗，醫生C話：「食過福臨門，仲使乜去新同樂呀？」或者我地住 得背都唔定，新同樂拿三星而陸羽不上榜，係超越我地嘅想像力，好似威靈頓街嘅麥奀記唔上榜，反而永吉街嘅麥奀記（忠記）上咗，亦都超越我地食物常識範圍， 最令大家一致感到驚奇嘅係半島酒店嘅餐廳名落孫山，喂，以銅鑼灣富豪酒店富豪金殿，沙田楓林小館算有一粒星為評審基準，半島嘉麟樓係唔係至少值兩星呀？除 此之外，半島Gaddis又係完全冇份，簡直搵嚟講，唔怪得西報訪問一位食評人，佢話當中或有秘密，只有半島酒店與米芝蓮先至知道詳情。 老 鼠跌落天秤，自稱自，左丁山在本欄寫過三間食肆，十月十三日講「留家廚房」、十月二十五日講MIST，十一月二十五日講8 1/2，估唔到齊齊攞星，8 1/2係兩星，其他兩間攞一星，自己覺得有眼光之餘亦怕以後更難訂位咯。「留家廚房」係專欄作家、藝評家劉健威做老闆嘅，立即送出短訊恭喜佢，劉兄即時回 答：「一定會加倍努力，為大家多創美食。」至於點解得星，米芝蓮食評人何時到訪，佢自己都唔知。有咗米芝蓮星，是否生意一定多啲？好有可能。上個月，移民 加拿大多年嘅會計W夫婦與兒子回港，一切行程由兒子按照米芝蓮「星級」餐廳行事，在澳門，香港及東京，一日三餐幫襯有星餐廳，到筲箕灣排隊，毫無不耐煩之 意，兒子將今年嘅花紅食晒，先至返加拿大。之後會計W搵左丁山食飯，咪帶佢去冇星，不上榜嘅上海總會囉，一味龍鬚桂魚，食到佢讚口不絕！ |
||||||