ZKIZ Archives


避開SSD盤 左丁山

2010-11-27  AD




 

特區政府打地產 炒家,呢次不是狼來了,而是餓虎擒羊,徵收最高達15%嘅額外印花稅,炒家唯有退避三舍。政府呢招係幾夠辣,但令人不解嘅就係唔肯講明額外印花稅由賣家負 擔,搞到地產代理不知如何是好。根據報導,中原地產內部有指引,叫代理講明,額外印花稅由賣家支付,但中原嘅勁敵美聯就跟鄭汝樺局長行事,叫代理拉埋買家 賣家雙方談判如何攤分。中原仲立即為一啲須要繳付額外印花稅(即持有期少於兩年)嘅樓盤加上SSD印記,稱之為SSD盤(Special Stamp Duty),提醒代理特別留神。

左丁山特登打電話問吓地產代理極資深人物地產W,問吓佢意見,SSD究竟應該由邊個俾?地產W答得斬釘截 鐵:「如果我係買家,SSD一個崩都唔俾,梗係要賣家負責啦,鄭汝樺局長冇膽兼腳軟,唔敢講明要由賣家負責,抵鬧之至,打老虎就打老虎啦,使乜含糊其詞, 叫買家賣家商量啫,根本冇得商量,SSD一定要賣家俾晒。」

有冇術出呀?地產W話:「依家都有嘅嘞,譬如豪宅印花稅高達4.25%,咪有買家賣家故意以較低價格成交,餘額唔寫入買賣合約,私底下搞掂囉,但稅務局對此早有經驗,吼到實晒,隨時會追查番嘅。有埋SSD之後,相信故意㩒低成交價嘅交易,會有所增加,稅務局要留神啲嘞。」

現 在去買樓,用家最好避開啲SSD盤先,唔好沾手,以免交易時麻煩多,淨係拗SSD由邊個俾已經夠煩,即使地產代理已說服賣家繳付SSD,仍然未必信得過, 地產W話:「可能本來係一千萬元嘅樓,賣家要賣一千二百萬,交咗一百八十萬SSD,佢仍然袋多咗二十萬,買家做咗羊牯。」如此市道下,賣家有冇辦法加價出 售,將SSD轉嫁到買家身上呢?表面睇就比較難,除非買家係儍仔,但係轉嫁到一部份,實在不足為奇。故此地產W認為點都係忘記啲SSD盤,係市面上仲有大 把唔駛交SSD嘅二手樓嘅啫。


PermaLink: https://articles.zkiz.com/?id=19688

Next Page

ZKIZ Archives @ 2019