ZKIZ Archives


棄出版搞補習 左丁山

2010-9-18  AD




 

消費者委員會調 查顯示,中學生平均買書開支係2,016元,以今年全港有360,000中學生計算,總支出係七億二千五百七十六萬元,整個中學教科書市場就係咁大,比高 峯時期(2000至2002年)有學生494,000人計,市場萎縮咗有28%至30%,唔怪得一位資深出版書商呻到樹葉都落晒,佢話學生人數繼續少落去 嘅話,何止中學要殺校,出版商也要「殺社」,首當其衝嘅會係本地資本中型書商。

左丁山同佢講笑話,唔做書商不如去開補習社啦,以「明愛青年 義工」調查計,七成中學生每個月用一千元交補習費,三十六萬中學生乘七成乘一千元,等於每月有二億五千二百萬元,一年十個月計,市場體積高達二十五億二千 萬元,直情係recession proof(抗衰退)嘅工業,而且補習費加價,冇消委會過問,冇家長抗議,冇教育局干預,呢個市場比中學生教科書市場大三點五倍,甚或更大,從生意眼嚟 睇,冇理由坐困愁城而唔轉型搞補習社嘅噃?書商惟有苦笑。

香港出版嘅教科書,聽講有國際水準,外國讚賞。不過香港好多事情就往往係外國人 讚,香港人鬧,令到香港人以為教育好唔掂。其實英國美國嘅中學,只係貴族式私立住宿學校好掂啫,佢地嘅官立中小學,大都不堪聞問,水準極差,學生索K打 架,閒過立秋,香港本地學校當然難與Eton、Harrow、Winchester、Deerfield、Philips Academy等英美名校相比,但係本港津貼、官立中學與英美嘅政府資助學校比較,平均水準一定有過之而無不及。

呢日見到一位老資格人物S 先生,佢係華仁港大產品,從未出外留學,佢講起時下不少中產、富有階層教小孩,好以英語交談,要佢地入英文小學,讀完就送去英國寄宿中學,以為咁樣係培養 子女嘅最佳途徑,起碼英文會叻好多。但S先生指出,當今中國興起,教育下一代,務必要兩文三語並重,老早過份側重英文,而且中文比英文難學,他日子女唔識 寫中文,閱讀有障礙嘅話,難道不會影響工作前途?S先生眼見不少朋友子女自英國大學畢業歸來,有優良學位,偏偏中文唔掂,紛紛惡補中文,上北京學普通話, 讀得辛苦,請各位家長注意吓喎!

 


PermaLink: https://articles.zkiz.com/?id=18130

Next Page

ZKIZ Archives @ 2019