ZKIZ Archives


有線變冇線 左丁山

2010-8-19 AD




 

英超開鑼,頭場 就係大富豪球會曼城作客熱刺,應該會係一場好波吖。曼城由中東超級富豪擁有,銀紙大把,全隊球員嘅轉會費加加埋埋共二億三千五百萬美元,只有車路士可與之 匹敵,淨係一個意大利青年軍巴洛泰烈(Balotelli)嘅身價已經係三千五百萬美元,係韋根全隊球員轉會費二千一百萬美元嘅一點六七倍。有咁多高價球 員,如果教練文仙尼唔能夠交出好成績,一定會好快聞到魷魚香,英國報紙放風話幕後班主阿布扎比皇室已經諗定掹英格蘭領隊卡比路過檔,假如文仙尼表現不濟嘅 話。

熱刺係上季第四名,並非善類,主場對曼城,肯定有睇頭,於是上星期六未夠七點四十五分,已經將有線電視校定六十一台。夠鐘開波嘞,點解 冇嘢睇嘅,急急校往六十二,六十三,六十四台,都冇噃,有線搞邊科?擒擒青拎張報紙望真啲,原來係由二○一台直播,㩒往二○一,冇噃,話明要另外俾錢,當 堂為之火滾,點解有線從來唔寄張紙仔嚟通知一聲嘅?自己係有線資深訂戶,睇住佢開台,至今每個月交四五百元月費,三年前英超由now轉播,自己又訂埋 now,就因為有線新聞台一個理由咁大把,冇cut到有線,今年英超回歸有線,左丁山大安主義,以為每月買足full package,實有得睇啦,世界盃都冇另外收費嘅啫,誰知就咁做咗笨蛋,俾有線走晒精面。

是日睇報紙,原來氣頂嘅有線訂戶,大有人在,唔止左丁山一個,記者G話Facebook上有好多人狂抦有線。一啲更加熱心球迷即時打電話熱線去磅水訂英超,根本冇法子打得通,令到球迷急到紮紮跳,如果球迷身兼有線股東,仲更扯火,班夥計點做生意o架!

 

俾咗咁多年錢,今勻真係激親,平時睇有線,只係為咗做得非常好嘅新聞台,其他頻道根本冇乜留意,呢次為咗順番條氣,一於咳有線嘅全套套餐,慳番四五百蚊一個月先,然後再斬件訂英超,每個月咪最多俾一百幾十,令有線電視嘅ARPU下降!


有線 變冇 冇線 左丁 丁山
PermaLink: https://articles.zkiz.com/?id=17559

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019