2015-07-16 NM
香港地，要出頭就要自己諗計！升職加薪非人力控制，中港股市升跌又睇唔透，80後唔想成為他人眼中 的「廢青」，就要靠自己奮鬥。八十後夫妻──阿霆與Vennis，食正澳元低水，兼睇準炒賣《迷你兵團》貨品的黃金機會，憑運氣及眼光，成功賺到人生第一 桶金。只要夠青春又捱得，誰說後生仔成不了大事？又一證明，學歷唔會限制人的發展，眼界才會。開檔搞代購
我讀人力資源管理副學士出身，畢業就喺網購公司做倉務，識咗做採購嘅女同事，而家做埋我老婆。兩公婆每個月夾埋搵三萬幾蚊，辛苦儲落三十萬，前年搞結婚就 清袋。婚後我哋同我屋企人一齊住屯門，雖然相處融洽，但你問我想唔想過二人世界，點會唔想？問題係樓價咁癲，要儲番筆首期，幾年之內應該都無乜可能。
我知，要搵錢就要搏命，我唔係無搏過，但有咩回報？以前見公司生意唔錯，但到年尾就話賺唔到錢，我再勤力都無用。曾經有上司搭晒膊頭、話幫我爭取加人工，但最後都唔成事。我老婆話齋，邊個八十後無野心，自己係男人，自細幻想做老闆有話事權，賺幾多、蝕幾多向自己負責。
我有個中學死黨阿Man，十幾年前移民去澳洲，而家响嗰邊專做網購生意賣手機配件。佢住布里斯本，日日見住唔少大陸人、台灣人做代購，大手入貨賣返大陸，呢門生意應該有得諗！
今年三月，我同老婆飛去澳洲度蜜月探佢，大家又傾開，澳元係咁跌，做代購應該有優勢，我哋又熟網購運作，終於的起心肝去做。
阿Man喺澳洲負責入貨、郵寄，我同老婆負責喺香港分銷，實行兩邊拍住上。最初諗法好簡單，開個免費嘅facebook 專頁，有客落單先入貨，基本上係零成本。五月開檔時無乜生意，畢竟澳洲代購多人做，預咗要慢慢儲客。點知一個《迷你兵團》浪潮湧埋嚟，我哋嘅機會就嚟喇！
食正《迷你兵團》狂熱
今年暑假《迷你兵團》套戲上畫，電影發行商第一季尾已經開始宣傳吸客。美國出《迷你兵團》Tic Tac糖，澳洲都有貨。阿Man去超市狂掃貨，佢話好多貨架都被人掃清，就知呢隻嘢幾勁，好彩我哋入到小量貨，六月中就運到港。之後喺facebook做 宣傳，零售價賣二十五元一盒，估唔到客人超好反應，訂單多到停唔到！剛剛起步，就有咁多生意湧埋嚟，我哋有啲慌，因為怕唔夠貨俾客，唯有直接搵澳洲供應商 攞貨。但向供應商直接攞貨，其實貨價仲貴啲，貴過超市價一成，但點都叫做應付需求，做咗個勢先，最終我哋淨係Tic Tac糖都賣咗七千盒。個勢咁好，我哋決定再下一城，引入《迷你兵團》3D眼鏡。呢件貨，當時香港未有得賣，一開始我哋响澳洲玩具反斗城掃貨，之後就向澳 洲生產商攞貨。起初生產商嫌訂單數量太少，話要二千五百副起單，我哋同其他行家夾份要貨，但無人肯制。最後死纏難打之下，成功氹掂生廠商開生產線造貨，攞 咗一千八百副。呢個係好搏嘅決定，因為當時香港無人識呢件貨，我哋要自己做宣傳，最後諗到同團購網合作，借佢哋平台推出市面，估唔到即刻有客爭住訂貨。我 哋飲咗頭啖湯之後，而家香港都有戲院開始有得賣，我哋做唔到獨市，不過起碼我哋都已經賺咗第一筆。先有Tic Tac糖、再有3D眼鏡，計埋同期賣緊嘅《迷你兵團》其他產品，例如POP figure，我哋第一個月初步估計已經有三十萬營業額。
《迷你兵團》熱賣產品點好賺？
觀塘租劏房office
老實講，我哋生意多到做唔停手，晚晚收工返屋企執貨，每日瞓得兩、三個鐘就返工，好鬼辛苦。老婆之前一直都想轉工，睇見呢檔生意個勢咁好，佢索性辭職瞓身 睇檔，我哋亦開始認真諗點樣做得更好。之前我哋只係响住宅區收貨，但其實好唔方便，所以我哋第一步就喺觀塘工廠區租個「劏房」辦公室，月租五千蚊簽一年 約，辦公室接待處可以代為收貨、發貨，方便客人拎貨之餘，有門市做聯絡商譽都好啲。我哋同阿Man夾份投資五萬，預先買入熱賣貨品，客人一落單就有貨收。 我哋仲有個優勢，就係港、澳兩地有人長駐可以每日返貨，客人唔使遷就截單時間，想幾時買幾時訂都得。我哋咁做，雖然運費成本會貴啲，但密食當三番一樣有得 賺。其實，我唔係特別鍾意《迷你兵團》，不過有客人幫襯幾次、每次都買成千蚊貨，瘋狂程度超乎我想像。我覺得《迷你兵團》可塑性好高，同其他品牌 crossover創作又好夾，將來若有新產品推出市場，相信仲有唔少粉絲捧場。
港女至愛Pandora
當然我哋都有諗，套戲已經上畫，暑假後可能熱潮減退，所以我哋而家已經積極搵其他代購產品，例如港女至愛嘅Pandora首飾，澳洲門市定價一向平過香 港，就算香港會員價有九折，亦平唔過澳洲，香港賣一粒六百元嘅鏈墜，澳洲其實只係四百元。雖然澳洲Pandora有網購，但唔送國外，加上部分貴價款式， 要客人親自去至買得到，所以做代購，一定有得諗。我計過，就算我用香港價錢打個七七折，都仲會有得賺。另外，我哋亦開始搜羅澳洲零食、保健食品 Blackmores同埋潤膚霜Lucas Papaw等，部分產品香港市面有得賣，但我哋個價可以再做得低啲，務求吸引客人一買再買，公司長遠至有發展。我哋好彩，其實而家投資成本都只係五萬，但 單賣《迷你兵團》產品已經回本，仲賺到未來一年嘅資金。不過我都知道，而家我係食正澳元跌破六算，個價先可以做得咁靚，日後如果匯率升番上去，生意優勢就 會消失，所以，呢檔生意長遠會唔會變做事業，仍然係未知數。不過我有信心，有朋友做後援，兩公婆一齊做，辛苦都會捱落去，起碼，我而家都叫做掘咗第一桶 金。
其他代購產品