首先要同全民媒體的讀者，講聲唔好意思，太耐無寫文，過左成個幾月先再寫，一來忙，但主要原因與同屬全媒作者的老孤貍一樣。股市太旺、通街都「股神」，人人有內幕、個個俾NUMBER，好多股明明個價已經爆到好明顯係要搵人接貨之階段，突然又有人，好突然咁唱好該類股票，這時代老千蕓蕓，莊家搵食，唯有獨善其身，做自己，我行我素。
最近某圈子的女神級群眾不約而同地搵在下求救，事源是仿間流傳了無數Whatsapp, WeChat群組，內裡都是一群無知的羊群，不求知識、但求Number、而且陣容頂盛，一group都有兩三百隻羊，等做小肥羊，被劏。幾個大型GROUP，在下一看之下供number的頭目又係個幾位……幾個group同屬一系，股票號碼也是源出一脈，真的是巧合？真係火……都黎埋，係時侯引用一下《家有喜事》，君如姐對的士陳的一句金句：「又係你啊，陳生！」
講到咁上下，點到即止，完。
過去幾年，成交低迷，氣氛平平、市場無咩東風可借，無咩人講股票，投資風氣係隻揪隻，單打獨鬥，每星期明顯升幅的爆股不多，咁就高下立見，高手過招，現在投資氣份熱烈變成群體活動，隻揪變圍毆，分出高下的地方就是倍爆的倍升升幅！
過去兩個月見有些行家到處收風，收到連在下的風都要打探一二，試問在下只屬一個普普通通、無大機構、無金主、無莊家的支持，只係普普通通、樂善好施、正常不過、滿頭白髮、低調投資者，邊有風俾人收……
咁又變成向在下，風繼續吹，放風話咩咩號碼、點點點、在下係首本著作《股壇練兵》寫得清清楚楚，在下的要經過連串分析先會買入股票，人地俾得在下的號碼，十居其九都係陰謀(直覺上)。
在下足不出戶，隱居世外，展轉啲風卻又吹番落在下度……就係上星期，只係工作見過幾次面，數位全職model的女神，話說要同在下食個晚飯，咁在下例牌都係唔出席，因為成件事係無任何人生意義何言。(一般黎講，都係「雞同鴨講、(溝)通唔到」，在下無話人做雞，亦當然唔係講緊自已係做鴨，只係一句成語，更加無話溝人，咁低俗。只係根據客觀分析連同數字統計，一個人類，好地地有好野，係唔會諗起你，同益你，咁係正常人類行為，加上在下一向業務繁忙、與世無爭、連電話都放係助手度，普普通通無咩特別事都唔會有人打擾，應該係得我搵人、人地搵唔到我，先係比較正確的說法。)
但今次因為推得太多次，始終都要出一出，地點當然只係普通一間頂樓的五星級酒店意大利餐廳……(因為夠近在下的居所)，在下非常準時，只係遲足一個鍾先到步，果然即時時間調整得巖巖好，你老闆，好在在下係「估」神，住左香港半年，都估到香港的靚女9成9都係要「扮」遲到，這種獨特文化真係道地。
一坐底，連想叫杯紅酒既時間都未俾我，一行幾人齊齊隊部手機出黎，「依隻買唔買得啊？依隻睇幾多？？依隻係朋友俾我，話會升幾倍？？？」在下睇股票多過佢地食飯，在下一眼望落去，依幾個號碼係老郭搞的，依類股老周搞開，依幾隻傳媒吹得太勁，隻隻股都唔多掂水。
望下望下，你老闆，依幾隻股在下早一個月先講完，至今已經升左幾倍，早幾日先「食八成」止賺離場，邊個仲叫你地入，明益實。
千叮萬囑，千其唔好入！只要信、不要問！
跟住佢班入身未深，不知股壇兇險的美人們，依度又話阿邊個邊個俾，佢地好勁好勁……號碼與股神之傳言，滿天飛。
根據在下觀察，這類被有心人利用的極品水魚級數的全職接貨模特兒有以下特徵：
1) 除左個number，間公司名都唔記得(或者根本無記過)
2) 儲埋唔少錢、但唔識投資
3) 朋友話有內幕、或某勁人推介
4) 人買佢買
5) 投資組合混亂
6) 次次賺少少、一輸輸獲金
7) 成日問number，買到成手都係貨
8) 日日起身睇股票、時刻緊張、以為睇住就無事
9) 分析方法係同人傾計、周圍收風
食左塊牛扒、因為在下略有名氣的關係，紅酒半價，在下免費做左一晚投資顧問，十足十平時開talk一樣，唯一分別係，仲要埋單，都話成件事係無任何人生意義何言，當然成件事點都一定有下文……
個下文就係，當日其中一隻叫佢地千其唔好入的股，就是數字王國00547.HK，當時股價約$2.7-3水平，現價低與$0.9，三日跌近7成！在下與一眾fans早兩個月入貨當然賺到唔少牛扒錢，兩個月後另一批人入貨，從人類的派別，入貨與出貨的分別，都睇得出莊家派貨的市況，時機錯過，結果大不一樣！
至餘個幾位model最後有無入貨？
因為在下無抄牌的嗜好，所以這點難以為讀者跟進。
F-方新俠
如大家有興趣，歡迎大家加F-方新俠的FANPAGE交流下啦
https://www.facebook.com/Fsh.club?fref=ts