| ||||||
| 馬主Ｐ打電話畀左丁山，要求澄清：「喂，好多朋友睇『GG細語』，知道馬主Ｈ去澳洲幾乎因為簽證問題而上唔到機，打電話嚟笑到我面黃，話我冇料。喂喂喂，馬主Ｈ份簽證唔係我間旅行社做嘅，唔該你寫清楚！」 馬 主Ｈ就話唔關馬主Ｐ事，佢係由秘書搵一間旅行社搞澳洲電子簽證嘅。點解馬主Ｐ啲老友有此誤會呢？原來馬主Ｐ係旅行社老闆，做好多馬主生意，佢又有份去澳洲 出席神奇百萬拍賣會，故此啲老友以為佢代辦所有馬主團員嘅旅遊簽證，包括馬主Ｈ在內。馬主Ｐ係德國籍，媽媽係上海人，在香港長大，廣東話好到不得了，在家 就講上海話同阿媽溝通。問佢點解講廣東話講得咁叻，馬主Ｐ話：「我係喇沙仔嚟o架，點解唔識講廣東話？不過我唔識睇中文，因為在喇沙係讀英文與法文嘅，我 講法文仲好過講德文。德文又係難讀啲嘅。」左丁山讀過兩年半德文，畀啲「性別」der、 das、 die（男性、中性、女性）搞到一頭煙。一張紙、一件衫、一隻碗，都有性別之分，一定要死背，背到暈暈地，所以見到郭益耀教授、關信基教授兩位留德博士， 真係非常佩服佢哋嘅德語能力。聽關教授唱德國民歌，會聽出耳油o架。 馬主Ｐ在尖沙嘴經營旅行社，自不然歡迎西九做高鐵總 站。基本上，旅遊行業最希望他日高鐵能每日帶來大量廣東兩湖遊客，在尖沙嘴大手筆購物，呢樣關乎佢哋行業利益，唔支持高鐵至奇。小記者Ｇ前星期去東京，辦 妥入境手續後，日本關員突然用普通話同佢講一聲：「謝謝！」小記者Ｇ為之愕然，因為去過東京咁多次，都係第一次聽到啫。後來去池袋西武，一啲售貨員掛上中 文名字名牌，係大陸人識得講普通話嘅，記者Ｇ話：「佢哋以為我係大陸遊客，特別好招呼，搞到我要講普通話，學足曹仁超！」日本人學嘢最快又好禮貌，服務一 流，如果香港唔爭氣，啲肥水流咗去東京都唔流嚟香港！溫哥華有家長推動雙語教學，以普通話代替法文，為何如此？理由簡單到唔使講。香港仲有啲家長送仔女去 英國寄宿學校，唔培養仔女中文底子嘅，他日必會後悔。 | ||||||