| ||||||
幾年前家住渣甸山的雲翔，他家天台能俯瞰整個中區及維港兩岸，未幾他賣樓拍戲，搬到山下的北角生活，「啲人以為我住呢區好唔掂，但我一樣有景，呢度三百三十度景觀，好過舊時。」他還打趣說：「買頂樓係方便朋友，入升降機按最高個層就係我屋企。」說穿了是他有天台情意結。咁有錢住頂樓，冷不防聽他大呻香港生活艱難，「我的電影最難在香港上，其他國家唔阻我，就係自己地方咁對我，你唔覺香港就嚟窒息？每日都CY、林鄭，好disgusting。我唔打算再拍戲，無乜意思，亦不再買樓，呢度係最後一次。」愛做廳長 雲翔家連天台花園有三千多呎，五年前以三千二百多萬買入，但他對家居設計卻很隨心，室內裝修不太講究，事關全屋落地玻璃外的風景已夠照，「我本來就家徒四壁，傢具從來不會買貴嘢，最多幾萬蚊，曾經為十幾萬B&O音響心動過，但呢啲通通是消費品，但樓不同喎，是投資會升值。」他家主要用黑、白色，偶然用上紅色傢俬點綴，「依家簡簡單單，令我想起澳洲間屋。」導演說他童年世界是單色調，上手的渣甸山玩過色彩設計，現在人老了，對花花世界無特別眷戀，只追求簡單生活，有時朋友到訪，他更大方到讓出主人房，自己瞓梳化，「無所謂啦，我瞓得幾多啫，一年無一半時間在香港，朋友識自己上來開派對，傭人無咁悶可以下廚，大家無額外付出又多咗歡樂，幾好。仲有呀，行雷閃電一晚幾千個閃電都睇得好清楚，喺度睇鬼片特別刺激，早上太陽曬醒，感覺幾好，所以好多時我都做廳長。」 不再拍戲 為照顧老友需要，他又設酒吧位方便大家把酒言歡，在自家電影《愛很爛》用過的道具，又當裝飾吊在吧枱上，正如雲翔話齋，用得唔好嘥嘛。導演喜歡分享，就連在客廳間出玻璃房當書房，他都擺了兩張書枱，書櫃頂上設上格床，讓公司的同事隨時來開工及休息。不過提起工作，他再次大吐苦水，「我住咗香港三十年仲有感情，但一個人活到咁上下會反省，我拍戲都唔係為錢，為自己夢想，咁辛苦拍完卻無被尊重，仲要俾人說三道四話我啲片難明，發行商又留難我，所以我將會拍埋手上部《烏托邦》就收工，可能寫吓書就算。 樓價速遞 最新成交：一二年同大廈高層1,300呎單位，成交價2,400萬（實用面積985呎 / 實用呎價$24,365） 樓價升跌：本週香港區中原城市領先指數是145.02，較上週下跌0.96%。 | ||||||