| ||||||
出名風流，自言曾與過萬女人約會的卓能集團主席趙世曾，近十年只鍾情北方佳麗，而且全是散拖形式幾個月就換畫。年屆七十七的他人老心不老，前幾年贊助首屆中國小姐選舉，在趙苑舉行比賽，名正言順目及女。 食髓知味，今年他又贊助國際旅遊小姐選美，還極速中十九歲的港女Givanna，二人一拍即合，唔使一個禮拜，港女更搬埋入趙苑同居，與趙世曾另一強國女友Dora兩女侍一男。 只不過趙世曾如意算盤打不響，據知每次趙公子想濕吻，港女都借機閃開，唔多聽話囉。一拍即合 呢位十九歲、中文名叫鄧寶怡的Givanna，本來跟其餘九位港女一齊比賽，「三星期前，趙生見過班女仔，傾過偈，佢話Givanna幾乖巧溫柔，想要栽培佢。」過幾日，Givanna已從選美行列中脫籍，跟住趙世曾出席他的山頂樓盤活動，趙生仲向傳媒介紹：「佢係公司的公關小姐，負責搞今次旅遊小姐的項目。」 不過這種掛名職位，其實是趙世曾安置女友的伎倆，由以前馬慧、鄔仁，到目前所謂深圳寫字樓市場部經理Dora，都話在卓能集團打工，問她實質做乜？她先支吾以對，繼然走人，避免露出馬腳。 而港女Givanna就高中畢業，來自單親家庭，跟母親住奧海城，之前曾選過中華文化小姐，今次又參加國際旅遊小姐，終於未選先得米。表面上唔多出聲的她，其實不知幾主動，向趙世曾撒嬌話想搬屋，從而搬入趙苑，「趙生同Dora住主人房，Givanna不介意，更好天真話住得入屋就當她是家人。」爆料人更話︰「趙生真係帶佢同家人食飯，Givanna開口埋口叫趙博士，又主動夾餸，同Dora又唔爭寵，令趙生好開心，總之話有初戀的感覺。 唔肯open 雖然趙生讚她斯文，但亦開始嫌她不夠open。據知同住一屋的Givanna，遲遲不肯俾趙世曾嘴嘴，「有次趙生想法式濕吻，佢就用手擋，之後每次見對方趙香口膠，Givanna都敬而遠之。」上週六，趙世曾提供遊艇、直升機俾著住比堅尼的旅遊小姐上天下海，陪坐的國產Dora好識做，一上船就除褸露事業線，任由趙生攬實，反觀Givanna守身如玉，全程著住外套，短裙下仲要著對黑絲襪打底，就算趙世曾多次叫她除褸，她都扮聾，最後知趣讓步，亦不過只係將領口拉開少少咁多。記者問趙世曾是否跟Givanna同居？他笑話：「我哋趙苑好多地方，咁佢做項目，會容易招呼人，又唔係同我住埋一齊。（唔肯俾你錫喎）吓？邊有呢啲嘢？你搞錯。」而Givanna亦辯稱：「我哋有幾個女仔住得遠，係方便做嘢先暫住（趙苑），做完個活動我哋會搬走，趙生已經有女朋友Dora啦。」 | ||||||