何柱國：曾非習近平指定
1 :
GS(14)@2017-02-19 12:19:26【本報訊】上屆特首選舉支持唐英年、選前大罵梁振英的全國政協常委何柱國今屆提名林鄭月娥選特首，又表示「曾俊華唔係習近平指定嘅人」，即使曾俊華的理念較為適合商界，也不如林鄭月娥的工作經驗般全面。曾指「一世唔信人哋政綱」的何柱國指，51位政協是看過各參選人的政綱、比拼其經驗、能力及誠信後，傾向支持林鄭。
「我做財政司叻過佢」
何柱國昨出席一個電視節目時指，曾俊華的理財理念較適合商界，「對佢好滿意」，但「一個人識得踩單車，同揸跑車係唔同，全面性唔同」，更自言「你今日要我做財政司，我一定叻過曾俊華，叻過唐英年，但你叫我做特首，咁多範疇，我冇本事，又要房屋，又要民生、養老」，他大讚林鄭工作經驗全面，較具備當特首的能力。對於有傳人大委員長張德江據報曾南下，與商界及建制派選委會面，並表明林鄭月娥是中央唯一支持的特首人選，何柱國指自己並無就特首選舉與張德江會面，但認為張德江南下是為了要闢謠，「有人同我講，曾俊華係習近平欽點㗎喎，你見過幅相啦，又揸過手，出面啲人話張德江話政治局都唔算，要習近平核心出嚟，呢啲係死無對證」，何柱國指習近平不會欽點一個人。被問到誰才是「被選中的人」，何則說：「曾俊華唔係習近平指定嘅人，咁其他4個，你鍾意揀邊個咪自己諗吓囉。」■記者姚國雄
來源:
http://hk.apple.nextmedia.com/news/art/20170219/19933273