ZKIZ Archives


胡蓓蔚上海會杏兒

1 : GS(14)@2016-09-17 17:52:59

豹哥單立文與老婆胡蓓蔚向來形影不離,昨日下午他們現身機場,大方任影。豹嫂表示此行回鄉去上海,好姊妹胡杏兒正值上海演出舞台劇,她表示會順道探班,更準備月餅助興:「我特登帶埋嘉麟樓月餅,應吓節呀嘛,同成班好姊妹追月,好開心。」豹哥表示要去捧同劇江美儀場。另外,楊明與龔嘉欣亦現身機場,結伴到馬來西亞登台。




來源: http://hk.apple.nextmedia.com/entertainment/art/20160917/19772795
PermaLink: https://articles.zkiz.com/?id=309478

李居明預言唔生仔會有小三胡蓓蔚急操fit造人

1 : GS(14)@2016-12-28 08:12:19

57歲嘅「豹哥」單立文同45歲嘅胡蓓蔚08年結婚,婚後過住二人世界,但原來佢哋對生育問題一直存在分岐,有指豹哥其實恨仔恨到發燒,提議過老婆做人工受孕,但胡蓓蔚就好抗拒落晒閘,曾經為咗呢啲事而起爭執,最後豹哥都乖乖就範。但昨日有周刊報道就話,單太太嘅態度180度轉變,話佢好努力咁操Fit身體準備生B之外,仲向多仔公胡諾言求教生仔心得。咁因乜事胡蓓蔚會突然轉軚想做媽媽呢,原來係因為玄學家李居明,事緣早前單立文到李居明主持嘅電台節目做嘉賓,李居明就批年屆57歲嘅單立文明年雞年有望做老竇,仲講明如果佢兩公婆再唔生,2020年男方身邊會出現第三者,咁恨做老竇嘅豹哥當然就有機會同老婆施壓,據報道嘅知情人士講,話豹哥好想做爸爸,但老婆就唔制,仲講到豹哥恨仔恨到講晦仔說話,話唔通自把自為咩,咁O依家李居明咁講,豹哥就借啲意成日話惟有要「小三」唔要「小朋友」,咁胡蓓蔚就寧可信其有咁努力造人,一向有做開健身同跑步嘅佢,除咗加倍努力外,仲請教多仔公胡諾言,仲約埋佢同陳山聰一齊跑步。知情人士仲話,胡仔老婆陳琪剛生完第三胎,所以胡蓓蔚都好積極向陳琪請教生仔秘方,特別係男人食乜好,睇嚟真係好想幫豹哥生個慈姑椗。




來源: http://hk.apple.nextmedia.com/entertainment/art/20161228/19879243
PermaLink: https://articles.zkiz.com/?id=320342

為箍單立文 胡蓓蔚操FIT追B

1 : GS(14)@2017-01-02 16:50:41

2016-12-28 EW

五十七歲的單立文,與四十五歲的胡蓓蔚拍拖十一年,終於在〇八年拉埋天窗,可惜婚後八年仍未有所出,兩人有感年紀唔細,索性表示「封肚」唔生,享受二人世界。

據知,單立文其實恨生仔恨到發燒,但老婆大人一直「唔嗲唔吊」,直至日前他聲稱獲玄學家李居明狠批,明年夫妻若果再唔生,數年後他身邊會出現第三者。難怪,胡蓓蔚近日對生育問題急轉軚,除了積極操fit身體準備生育之外,還向「多仔公」胡諾言請教生B秘方。

生育分歧

單立文(豹哥)於〇八年娶胡蓓蔚(Paisley)至今八年,婚後繼續過二人世界,雖然新婚初期揚言生仔順其自然,晚晚不設防,但肚皮一直冇聲氣。近年,兩公婆已逐漸轉口風,揚言年紀不輕,寧願享受歎二人世界,單立文曾笑言:「我已經係個大細路,生多個,老婆就要照顧多個仲辛苦,何況我都就快六張嘢,養到個仔女出身,起碼捱到八十歲,好慘啫!」

據知,單立文和胡蓓蔚在生育問題上一直有分歧,他其實恨生仔恨到發燒,更曾向老婆提議試做人工受孕,但胡蓓蔚卻相當抗拒,更試過為此事兩公婆起爭執,老婆「落閘」話唔生,單立文惟有無奈就範。不過,造人問題最近突然出現新轉機。據知,單立文早前上電台,擔任由玄學家李居明主持的風水命理節目做嘉賓,而大師竟批算他明年雞年有望生B,而且,講到明他兩公婆若再唔生,二〇年男方身邊便會出現第三者,節目中更勸單立文把握最後機會「生番件」。

單立文果然把握今次機會「借題發揮」,向老婆施壓配合生育,密友透露:「之前豹哥想生、老婆唔制,佢已經成日呻話冇晒符,仲晦氣話唔通自把自為,佢自己生得出仔咩?家有李居明咁講,佢梗係借住個勢啦,成日講笑咁講,惟有要『小三』唔要『小朋友』,其實係靠嚇,想Paisley着緊啲。」而胡蓓蔚亦似乎寧可信其有,近日終於肯的起心肝「造人」,向來做開運動長跑、健身的她,較從前更加落力,就是想操fit身體,除提高受孕機會,也為佗B做足準備。

請教胡仔

日前,本刊發現,胡蓓蔚跟向來熱衷長跑的陳山聰和胡諾言,晨早結伴出動到將軍澳海旁練跑。不過,她跟男子組鬥跑,體能明顯力有不逮,全程大部分時間都大墮後,見她臉容扭曲跑到上氣不接下氣,不時更自己一人走到旁邊歇息回氣。期間,胡蓓蔚又捉住胡諾言(胡仔)「吱吱斟」傾密偈,密友坦言:「胡仔老婆啱啱生咗第三胎,所以Paisley都會請教佢生仔秘方,特別係男人最好食乜唔食乜之類,似乎真係有心同豹哥生番個。」為了箍實老公,豹嫂實行雙管齊下,自己積極操fit身體,而老公則飲食補身,高齡「造人」惟有加倍努力喇!

撰文☆錢慧 攝影☆楊北鉅 設計☆美術組
PermaLink: https://articles.zkiz.com/?id=321102

胡蓓蔚爭抱等生B 胡諾言陳琪囝囝福星

1 : GS(14)@2017-01-24 03:00:15

■胡蓓蔚(右)抱過BB後,陳琪即預祝她快添丁。



胡諾言、陳琪夫婦前晚在迪士尼樂園為囝囝胡澔錕(Jayden)舉行百日宴,加上大女胡芷苓(Jay)、細女胡芷悠(Jacey)一家五口影全家福,氣氛熱鬧。吳家樂、陸詩韻、梁靖琪(Toby)、陳庭欣、沈震軒及胡蓓蔚等過百賓客到賀。


為子接廣告

小名「波仔」的Jayden偕爸爸胡仔以父子裝亮相,波仔趣致可愛,現場嘉賓爭相抱他,陳琪趁胡蓓蔚抱起波仔時,即笑說:「抱過就會生㗎啦。」至於盛裝打扮的陳琪則笑謂:「台慶都冇着到咁靚,原來搞百日宴辛苦過結婚,感覺似預演娶新抱咁。」胡仔夫婦大讚囝囝腳頭好,出世後夫婦工作各樣都變得順利,最近更為囝囝接洽一個嬰兒用品代言人廣告。陳琪並分享一單趣事:「有次胡仔抱囝囝出街,有街坊要求合照,但原來只係想同囝囝影,搞到胡仔好尷尬。」胡仔即笑謂:「唔緊要,希望個仔第日名與利都比我好。?家我好投入做湊仔公,希望佢可以帶旺我哋。」問到是否三個夠數?陳琪直言:「夠皮,因為生小朋大責任大。」



■胡諾言和陳琪夫婦前晚為兒子舉行百日宴,與兩女一家五口影全家福。

■百日宴以Jayden的BB踢死兔fondant cake作回禮。

■陸詩韻表示有男仔追,但堅稱單身都好幸福。

詩韻老皇妃

此外,單身的陸詩韻坦言眼見相識多年的胡仔一家幸福,回想自己卻仍然原地踏步:「單身都有單身嘅幸福,家庭當然都想擁有,但冇得強求,一切都整定,我相信緣份。有男仔追,但要觀察吓先,?家嘅年紀要求穩陣,唔會心急同任性。」至於有份拍無綫劇《深宮計》,飾演皇妃的她,被外界譏笑與一班妃嬪年紀都大,詩韻即笑說:「咁咪實力強勁囉。」採訪、攝影:卓寶花




來源: http://hk.apple.nextmedia.com/entertainment/art/20170123/19905627
PermaLink: https://articles.zkiz.com/?id=323815

胡蓓蔚唔幫姊妹 撐展鵬媾單文柔

1 : GS(14)@2017-03-24 17:08:06

蔡卓妍(阿Sa)、胡蓓蔚(豹嫂)、李靜儀(Heidi)、黎紀君(Christy)、黃芷晴等昨日在中環出席Dior派對,王宗堯一年前被Christy飛,最近他跟Heidi被影到撐枱腳,女方即刻劃清界線,兩女前後腳抵達現場,結果Christy以不同公司為由,拒絕跟Heidi合照。


「唔會講大話」

最近陳展鵬被踢爆山頂夜會落選港姐單文柔,胡定欣遭受打擊,開工都愁雲慘霧,作為定欣好姊妹的豹嫂,反而偏幫展鵬,問她有否安慰定欣?她說:「唔需要,佢同展鵬係銀幕情侶,冇話過一齊。」但展鵬被踢爆跟單文柔拍拖後,仍自稱單身,會否跟定欣都是地下情?她說:「你哋問吓囉!我哋咁friend冇講過話一齊,一定冇咁嘅事。」會否因定欣想感情穩定才宣佈?她斬釘截鐵說:「人哋都話冇開始,點穩定呀!」單立文最初曾指展鵬和定欣的關係是「姣婆遇着脂粉客」,豹嫂說:「老公講嘢好信,真係天真!」現在展鵬被指一腳踏兩船,她說:「人哋冇話開始過,佢唔會同我講大話。」問知不知展鵬和單文柔拍拖?她說:「真係唔知。」對於展鵬被指講大話否認拍拖兼單身,卻又被拍到和單文柔買傢俬和上山頂嘆外賣,豹嫂再唱好說:「外賣好,餐廳咁多人,上去傾吓偈,我哋用祝福態度係咪好好多,男未婚,女未嫁。」



■蔡卓妍昨日否認好姊妹阿嬌是第三者。

■王宗堯的緋聞女友李靜儀,遭王的前度黎紀君(右圖右)拒絕合照。


阿Sa撐阿嬌

此外,穿上露肩裝的阿Sa,被問到好姊妹鍾欣潼(阿嬌)是第三者,她說:「唔使回應,行得正企得正,知做緊乜就得。做咗呢行咁多年,人講乜由佢,一部份人睇,人生唔係睇呢啲人面色,繼續enjoy life。」不過,講到阿嬌在綜藝指曾借錢給阿Sa舊愛陳偉霆,阿Sa說:「冇睇,睇標題都唔想睇,唔知上文下理。」採訪、攝影:羅慧敏




來源: http://hk.apple.nextmedia.com/entertainment/art/20170324/19967794
PermaLink: https://articles.zkiz.com/?id=328666

Next Page

ZKIZ Archives @ 2019