ZKIZ Archives


港產App王賣腦撳$2億

2014-06-12  NM
 
 

 

這是記者一年內和Cherrypicks老闆趙子翹(Jason)做的第三次訪問。不過,資訊科技走得太快,之前兩次訪問未及出街,他的風頭已被其他新聞蓋過,文章最終放在槓底。今次,這粒車釐子,終於食得,而且好大粒。上週互聯網公司網龍(777)宣佈以二點四億元,現金加新股,收購Cherrypicks。本週一,Cherrypicks老闆Jason聯同網龍香港發展總監周榮春(Terence)接受本刊訪問。Jason跟Terence說:「多謝曬喎。」他笑言為合作愉快,亦為訪問終於出得街而感謝。

說本刊現實,但科技世界更無情。靜待失收滋味,Jason已嘗盡。他是香港Startup的先鋒,早在二千年已創辦Cherrypicks搞科研,一開波便經歷科網爆破,四千萬由有變無;他與facebook同期研發社交平台,怎料資金又火速燒光。時機,總差了點,他更要按樓套現。行得太快令他「死幾次」,但他依然堅持,他引用馬雲說的金句:「領先百步死,領先半步生。邊個知?我寧願做行得快嗰個,至少唔會後悔。」捱足十四年,終於泊到大碼頭。趙子翹Profile

年齡:43歲

學歷:滑鐵盧大學電子及電腦工程一級榮譽畢業

家庭:已婚,育有一子一女

履歷:

94年加入德勤,99年晉陞至董事,是德勤當時最年輕的董事。

00年創立Cherrypicks

03年研發手機接駁鈴聲變成亞洲通用制式

07年創手機社交網絡「優點」

11年推出結合AR技術的O2O電子優惠券平台iButterfly

12年開發TVB港姐決賽全民投票失誤,躹躬道歉。

14年網龍以$2.4億收購旗下移動業務

收購是由一餐飯開始。「我一早識網龍首席財務官任國熙,舊年年底喺香港同佢食飯,雙方就有呢個想法。」Jason說。網龍香港發展總監Terence則說:「當時我哋剛賣咗91無線(內地手機程式發佈平台),一直搵緊其他發展方案。我哋知Jason想帶Cherrypicks入中國,需要資源去發展技術;而我哋亦想借Cherrypicks嘅技術去發展產品,有機會走入國際。」網龍去年七月已把91無線售予百度,作價一百四十七億,相對今次花費只是兩億多,可謂濕濕碎。但對於Jason來說,「今次係一個肯定。好多香港科技公司發展到一定程度,再發展嘅一係返內地,一係衝出國際,我哋希望可兩者兼顧。」意義重大,收益更大,Jason坦言:「啲錢我未諗點用,但其中一部分,會用嚟reward番班同我一齊捱咗好耐嘅高層。」二億四千萬元的收購金額當中,兩億元屬現兜兜付款,其餘為網龍新股,網龍亦額外給三千多萬予Cherrypicks擴大技術研發。Jason說:「而家我哋嘅收入近一億,網龍支持下,預計一五年收入可以去到五億!」

失敗鞠躬

今次交易,網龍買入的是Cherrypicks「移動方案業務」,即是幫客人設計及開發應用程式服務及技術,如滙豐手機銀行、馬會即時投注,乘搭港鐵路線規劃及計算車資等技術,都是出自Cherrypicks,「好似馬會個app,馬迷可以最後一秒先下注。為咗個app,馬會upgrade埋馬場嘅Wi-Fi!」再舉一個例,讓「牛頭角順嫂」都明白什麼是「移動方案」。兩年前,港姐決賽,TVB玩綽頭讓觀眾透過TVB fun投票,公投選港姐。那個全民投票的功能,就是由Cherrypicks及Microsoft合作研發。可是選美當晚,伺服器「打柴」,名次改用評判評分,令坐擁高民望的朱千雪冠軍變季軍,全城鬧爆。事後,TVB高層余詠珊召開記者會,向公眾道歉。TVB表示懷疑有黑客入侵,Jason認為「打就要企定」,故一同向公眾鞠躬。經一事長一智:「做全民投票係一件難事,唔試過唔知,感激有呢個機會。」Terence亦說:「吸收咗教訓,之後就唔會錯。」兩人指創業忌「睇番以前,最緊要係fail forward(即是僕,也要向前僕)」。他看看科技公司研究報告,指日後流行「教育科技」,他與Terence已磨拳擦掌:「未來趨勢係learning(學習),mobile solution(解決方案業務)同enterprise software(企業軟件)三者嘅結合。」

四千萬一鋪清

由細到大,Jason都是高才生,讀男拔攞8A,再於加拿大滑鐵盧大學電子及電腦工程系畢業,加入德勤,廿七歲成為最年輕董事。但二千年,他選擇了一條比打工難行的路,就是創辦Startup公司Cherrypicks。事實是,路,比想像中更難行。當時他已跟創投基金籌得五百萬美金(約四千萬港幣),打算開發手機營銷服務。豈料尚未起動,科網熱爆破,「科水」的創投基金通通執笠。一夜之間「錢無曬」,路也要繼續行,他改做成本較低的手機營銷服務,第一單刁是為教育局提供中六學位空缺資訊服務。「用戶放榜前選定十間心儀中學,當日我哋每半個鐘SMS用戶報告最新情況。」那還是Nokia 3310的年代,Jason算是行得好前。他拿著這份只有一項的「履歷」,再次敲門搵「天使」(Venture Capital)。他主動找在德勤工作時認識的台灣電訊公司Far Eastone及南韓SK Telecom,幸好兩者都願意小試牛刀,各打本一百萬美金。Jason用作搞「手機接駁鈴聲」,他憶述:「手機接駁鈴聲由韓國SK Telecom發明,我哋有技術將佢變成亞洲通用嘅制式。」 但發展期間正值沙士,公司一直捱打,Jason說:「當時搭飛機入境問題複雜,但我哋啲客喺曬外地。」他心急如焚,他找香港諾基亞幫手,「佢肯安排我哋同新加坡諾基亞開視像會議,個會新加坡電訊商M1都有份開,最終M1買咗接駁鈴聲服務。」這單「刁」是他的轉捩點,之後訂單不停湧入,賺了過百萬美元。以為成功了嗎?故事未完。

兩億一場夢

剛有成績,他又有新搞作,就是手機社交網絡。當年,facebook在地球另一邊才剛「萌芽」,他已在內地搞了個「優點」,「其實就係類似手機上嘅facebook。」他向「天使」籌了兩億資金。當時,內地有二百所大學參與,用戶人數有五百萬。然而「優點」的燒錢速度竟出乎意料的快。他說:「當時無諗過點去轉化客戶為收益,有諗法就衝去做,無盈利模式可言。半年後仲發生雷曼事件,無可能籌到錢。」兩億「話咁快」蝕光,他自覺愧對投資者,「覺得唔好意思,當日已經盡咗力,每一個策略都有同投資者商量。facebook都要到一○年先賺錢,而且佢哋籌嘅錢遠遠唔止兩億。」「見過鬼怕黑」,「以後諗乜,都要有個盈利模式先去做。所以,我一世都做唔到WhatsApp。」他向投資者回購公司股份,背上一、二百萬元美金的債。他家住跑馬地蔚雲閣,翻查土地註冊處記錄,○七至○八年,他前後兩次把自住單位加按,估計套現逾五百萬,「呢樣嘢每一個創業家都經歷過,俾咗好多壓力家人。創業嘅人係自私嘅。」當時,公司員工走得就走,剩下只廿來人。剛好,蘋果推出iPhone大賣,他們便轉型寫手機應用程式。

行得快好世界

其後Jason一方面寫手機程式搵錢;另一方面研發新技術——AR(擴展實景Augmented Reality),並率先進軍O2O(online to offline)銷售平台,Jason自信地說:「根據高盛報告,一四年就係O2O主導!Google Glass用緊嘅都係AR技術。」用這技術,他旗下最為人熟識的app,就是iButterfly。iButterfly是一個電子優惠券平台,用戶在手機下載程式後,在程式中捉象徵優惠券的蝴蝶,在現實世界中使用捉到的優惠,「iButterfly推出咗三年,不斷都有公司搵我哋幫佢哋搞,今年有恆隆名店坊同亞洲萬里通!iButterfly每年只係賺幾百萬,但好多大客都係因為佢而搵我哋,如馬會及滙豐等。」不是「大project」不接,Jason說:「我哋要揀過先接,要預留空間發展自己產品。」而發展產品的最終目的,「與網龍合作只是其中一步,希望兩年後可以上市!」

《神魔之塔》或撻Q

今年三月,雲遊(484)公佈以五億五千萬,即七十倍市盈率,購入開發網絡遊戲《神魔之塔》的Madhead母公司Magic Feature兩成股份。《神魔之塔》被外間笑稱為《神抄之塔》,收購令Madhead估值提升至二十七億元。《神魔之塔》創辦人曾建中及曾建豪兄弟一夜致富,全城譁然。但雲遊五月十九日卻發公告指,該宗收購有可能違反台灣政府「禁止中國投資者在台灣從事線上和手機遊戲營運」規定,令交易蒙上陰影,市傳交易「撻Q」的消息甚囂塵上。雲遊的股價,亦由公佈消息後近六十元高位,急跌至本月九日的二十八個二。

港產 App 王賣 賣腦 腦撳
PermaLink: https://articles.zkiz.com/?id=102053

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019