| ||||||
世紀貪污案，選陪審團一波三折。上星期有陪審員因「小腸氣」而申請退出。許仕仁嘅代表律師質疑小腸氣係咪辛苦到要退出呢？法官就幫陪審員講好話，仲話律師：「You're too young!」因為，佢都係過來人嘛！ 喺商界，原來不少人都曾患有小腸氣，當中包括孫明揚、田北俊及恒豐酒店老闆李德義等。孫明揚一向多病痛，計有腎病、退伍軍人症、右肩骨裂外，仲有小腸氣，因此入醫院做過幾次手術；而田北俊七年前亦都中過招。小腸氣，又稱疝氣，患者天生腹股溝塊膜薄弱，又或年紀大嘅男士，成日郁動腹部，令該部分肌肉鬆弛，啲腸從腹肌壁的缺口向外凸出，起咗個泡，通常就在男性輸精管位置，有啲分分鐘成個足球咁大！小宗問過泌尿科醫生傅錦峯，佢抵死話，腹股溝就好似「坑渠蓋」，被人打開咗，腸臟就會好似隻腳差錯落坑渠，凸晒出來，所以要做手術補番個渠蓋。其實小腸氣最令男人尷尬嘅（唔排除有男人羨慕噃），就係陰囊會比平時脹大數倍或以上，好鬼觸目。唔想出街時俾人「另眼相看」，最好快啲做手術囉！ 職場秘笈最令老細討厭的對答 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。老細叫你做嘢，最怕聽到的回覆是什麼？之唔係「但係」和「不過」。這些模棱兩可的答案最乞人憎。譬如老細要求你向另一部門跟進工作進度，讓他部署下一個工序，你答：「但係我已經催促過。」不如說：「好，我今天已經催過，明天再催！」又如，老細說你的設計普通，可否想清楚再做，你答：「不過我已經做咗十次，再做就第十一次。」不如改說：「好，雖然我已經做了十次，我可再做一次吧。」同一樣的意思，前者消極，後者積極，老細聽落感覺已大不同。其實，老細叫得你去做，當然不想聽到有拒絕味道的用語，奉勸各位答問題時，先答：「好！」才慢慢解釋吧！其實還有不少職場禁忌用語，如「好似係」、「唔肯定」、「盡量啦」。老細問你：「星期一能完成工作嗎？」你答：「盡量啦。」即是得定唔得？這樣的答案，令他難以部署下一步工作。得就答得，唔得就答：「星期一唔得，星期三一定得。」好讓他心中有數。當他問你：「對手搞咗件新產品，是嗎？」假如你答：「好似係。」即是有定無呢？這樣不負責任的答案，千萬不要說。如果真是不知道，改個答法：「我唔知道，我而家即時去find out。」 螞蟻搬家唔見十幾萬！ 曾經放生玳瑁、好鬼識宣傳嘅鉅龍酒家老闆吳伯恩，最近頭都痕晒。佢去年九月喺荔枝角買鋪開嘅分店，唔夠九個月已要頂手俾人。其中一個原因，係搞唔掂班八十後伙記。據吳伯恩話，廚房佬一向難管，早已換了一批又一批。去年一批因不滿加薪幅度而拉大隊走人，吳伯恩於是喺同行請番一批八十後，貪佢哋無以往廚房佬陋習，點知，仲衰！「我舊鋪同呢間新店只係打對面，兩邊廚房佬夾埋，成日話自己管嗰間唔夠貨，要向對面鋪借。結果將啲龍蝦、帶子、龍躉呀，推車仔搬來搬去。我月尾對數，先發現唔對路，原來佢哋一直暗暗將啲貨推走埋！」這招螞蟻搬家，令吳伯恩損失十數萬，成班廚房佬炒晒，又要搵過。他唉聲嘆氣指：「無咩心機，有人想頂手就讓出來。個鋪三千四百萬買返來，有人交租，鋪價過多兩三年又升值，咁我咁辛苦做乜？」小宗聽完，都覺得買鋪可以養三代，揼石仔就煩完得個桔；香港點畸形，有辦你睇！ 本週圖片 識度size，梗係咁度！（攝於元朗） 金牙大狀講嘢香港危矣哉 機管局主席張建東決定唔再坐一回，提前一年卸任，佢空出嚟個位由上海姑爺羅康瑞頂上；但只係做一年貨仔咁多，事關主席一職老早已經預咗俾着．蘇澤光坐，而着．蘇坐開之貿發局主席嘅位到時則輪到由上海姑爺去坐。整出呢一輪嘅音樂椅，皆因着．蘇有私人理由未做得機管局主席住。呢一回上海姑爺可以話的而且確係鬼佬所講之seat warmer。霸位暖櫈嘅下欄功夫都肯制，認真難為姑爺佢。此又不禁令人要問：成個特區七百萬人，莫非只有着．蘇一個人至坐得機管局主席個位？亦都只有上海姑爺至坐得貿發局主席個位？若然人選確係剩得咁多，咁香港咪危矣？ 中環人語迷你版 | ||||||