孫佳君情陷羅兆輝 濕吻照最轟動
1 :
GS(14)@2016-09-10 13:54:44明日就是孫佳君42歲，當年20歲嘅佢當選新加坡小姐冠軍，隨後更代表出賽環球小姐。其後孫佳君加入娛樂圈，首套參演嘅港產片就係同周星爺合作嘅《百變星君》，其後仲有《孟波》、《愛在娛樂的日子》等，而佢唔止演搞笑片，佢喺《花樣年華》中做過周慕雲（梁朝偉飾演）嘅太太，又演過日本男星淺野忠信主演嘅《殺手阿一》，仲有，舊年喺《雛妓》中，孫佳君更做女主角蔡卓妍個阿媽，戲路都廣嘅。選美冠軍出身嘅孫佳君，曾先後同星爺等多位男伴傳出緋聞，但最為人熟識嘅，係佢同有「神童輝」之稱、已故商人羅兆輝嘅戀情，有報道指佢哋喺95年8月邂逅，其後傳出佢哋關係密切。到97年6月，羅兆輝與太太鄭黛芬正式離婚後，孫佳君被拍到同羅兆輝一齊出入；到98年7月，孫佳君同羅羅兆輝聯名買下嘅物業被銀行入稟追討按揭欠款，令兩人親密關係再爆光。雖然孫佳君一度因為羅兆輝投資失利期間，與對方劃清界線撇關係，但到99年2月，佢揸住架寶馬Z3跑車撞毀，經查證後發現，登記車主同羅兆輝及孫佳君有關，證明2人未斷纜。00年12月羅兆輝喺遊艇上燒自殺獲救，孫佳君喺楊受成陪同下趕去醫院探望。到02年，羅兆輝高調接受傳媒訪問，不停大爆與圈中女星情史，並承認同孫佳君有親密關係，其後羅孫2人嘅濕吻照同孫佳君嘅沖涼相被先後公開，同年羅孫2人被追討1,600萬債。孫佳君於03年起淡出娛樂圈。不過，孫佳君嘅新聞並未停低，佢喺05年，有傳佢高調自爆嫁畀富商劉志坤及生子，令尚未註冊嘅劉志坤逐佢返星洲。到09年7月，孫佳君遭商人男友劉貴喬家暴，佢哋當時已育有兩名分別為4歲同6個月大嘅囝囝。而孫佳君雖然已為人母，但佢身邊嘅男伴仍0氹0氹轉，舊年佢高調拖法國米芝蓮大廚男友Olivier出席電影首映等活動，更當街親熱，但係最後都係分手收場。
來源:
http://hk.apple.nextmedia.com/entertainment/art/20160910/19766622