陳淑芬 風雲再起時
1 :
GS(14)@2016-10-30 17:31:132016-10-12 EW
已故巨星張國榮的金牌經理人陳淑芬（Florence），曾是梅艷芳、沈殿霞、羅文、陳百強、張智霖、草蜢等經理人，旗下粒粒巨星，但外界曾指她以張國榮生前經理人的身份，舉行形形色色的紀念活動，招來閒話。
訪問當日，甫提起哥哥之名，陳淑芬即眼有淚光，掏出紅手帕，嗚咽說：「呢個係我死穴，以前我提都唔可以提，一提就崩堤咁。自從搞五年紀念騷，我睇咗好多佢（哥哥）嘅嘢，嗰次之後個人就舒服咗啲。啲人覺得我利用佢搵到好多錢，咪由人講，話我喺十年嘅紀念騷淨賺二千萬吖嘛，如果我為賺錢，唔需要等十年至搞！」
上月，她宣布與馬榮成合作，號稱投資億元製作《風雲5D音樂劇》，找來鄭嘉穎、謝天華、呂良偉等演出。六十歲的她依然未言退：「我無做經理人好耐，唔想再簽人， 家希望做有意義嘅事，我好耐無為錢而做事嘞。」
當了四十年經理人的陳淑芬，擅於排難解困；即使常常是非纏身，她仍然笑看風雲變。
哥哥常報夢
陳淑芬剛完成哥哥的六十歲冥壽紀念活動，她是張國榮的最後經理人，二人相知相交廿二載，情如姊弟，早前她更為張國榮成立「哥迷會」。但要入「哥迷會」，要有心力和財力。「呢個會嘅門檻好高，除咗要畀五位數嘅入會費，仲要審批先至得，我唔想啲人喺網上寫好多嘢同收料，只係想畀大家一個平台去交流。希望吸納一班有組織能力嘅粉絲，喺呢個平台可以互相認識同溝通，保留Leslie遺留落嚟嘅物品。」
她吸一口氣續說：「張家嘅人好低調，鍾意過平靜生活，但呢啲嘢總要有人去做，我唔會因為怕人講，而唔去做我認為有意義嘅事。」
〇三年四月一日的傍晚，哥哥相約陳淑芬於文華酒店，似是託付她處理後事，更一躍而下死在她面前。至今十三年，提起哥哥，她眼眶即時一紅，嗚咽說：「咁多年都係咁，係我死穴。」
陳淑芬與哥哥識於微時，合作由零開始，二人關係親密得有如親人，傳聞張國榮有報夢給她，她直認不諱。「我都夢見過佢唔少次，每次都有啲啟示。佢走咗一年幾，有次我坐長途機，佢同我傾咗好耐，係一個好長嘅夢，我好少會醒咗之後仲咁記得，夢裏面佢同我傾偈。
「我初時抱懷疑嘅態度，但佢個樣就有啲唔開心，覺得我唔信佢，好失望。佢話：『若果一陣間落飛機，你見到一個熟人，叫你做一件事，你就知道呢個夢係真㗎嘞。』我去到海關嗰度，真係撞到一個好少見嘅朋友，佢又真係叫我做咗Leslie講嗰件事。」至於是甚麼事，她則說不便透露。
另一次報夢，是張國榮十周年紀念音樂會之前的晚上，他透過夢境為她排難解憂。說起故友，陳淑芬的聲音變得沙啞。「我嗰次要籌備好多嘢，有一條短片我欠一個獨白，我諗來諗去都唔知點寫。
「到開騷前一晚，我已經好攰瞓咗喺張牀度，突然聽到佢（哥哥）話嗰段獨白應該點樣點樣寫。迷迷糊糊之下，我喺牀頭拎起紙同筆，冇開燈係咁盡量寫，寫到亂晒籠 最後嗰段獨白出咗街。有啲記者聽一半唔聽一半，淨係話嗰段係哥哥最後嘅說話，真係激鬼死我！」
十三年來，陳淑芬為「紀念」哥哥不遺餘力，在他去世五年、十年也舉辦紀念演唱會和展覽，又推出一系列官方紀念品，因而被指發死人財。她逐一解釋：「我搞過五年同十年紀念騷，只係兩次！我應承自己十年一定會搞，要畀Leslie睇吓仲咁多人鍾意佢。至於搞五周年，係因為我心虛，唔知仲有無多五年命，世事無常好難講，我唔想自己走咗，心願仍然未了；十周年再搞，成為圓滿句號。外面啲人話我十年嗰場淨賺二千萬，其實所有income都唔到8位數，真係任人講！如果為賺錢，我都唔使等十年。」
學友不合作
人紅是非多，陳淑芬與張學友合作舉辦演唱會近廿年，去年四月原定合作舉辦的學友三十周年演唱會，突然煞停，後來學友單方面宣布二人不再合作。外界指二人因財失義，多次追問下，陳淑芬始說：「我同學友都仲有聯絡，首先我唔想提我同佢之間嘅關係，只有我哋兩個最清楚，出面講嘅，唔代表我哋真真正正嘅事，所以我唔想再講。
「其實唔係佢覺得我利用佢嚟promote自己，而係側邊嘅人講，加上佢又就快開騷，唔想啲人又同佢講我利用佢宣傳。我同佢兩個心裏都明白，我哋都係追求完美嘅人，唔合作唔代表係敵人。」
她否認因財失義，只解釋大家都是完美主義者。「我已經無再為錢而做嘢，但合作一定係同錢離唔開關係，金錢嘅利益會令人哋亂噏好多嘢，我同佢兩個都肯定唔會因財失義，只會為自己心目中的理想 今日嘅分開係畀大家更珍惜以往合作嘅點滴，珍惜大家嘅友情。出面嘅人講乜，都係閒話、是非，我哋心裏明白大家之間嘅真誠。」
她直認，多年來招人眼紅，並提高聲線說：「呢個當然啦！由我開始同佢合作，已經有好多人眼紅！（演唱會）唔一定要我做㗎，今次唔合作點解就一定係有啲乜嘢事？我覺得好奇怪，要合作就會合作，有時合作關係唔一定係永遠。
「同佢（學友）合作嘅人裏面，好多時都會換人，好似區丁玉咁，佢無用區丁玉又唔會講到咁大，同我唔合作點解講到咁難聽？我唔知發料嘅人為咗宣傳定乜嘢，我同佢之間點睇對方，我哋心裏明白。我唔會理出面講嘅嘢，唔提佢，係唔想畀人講我借佢宣傳，而唔係唔當佢係朋友，絕對不會因財失義。」
再做舞台劇
廿年前她跟學友製作《雪狼湖》，現在她則投入製作《風雲5D舞台劇》。「二十年前做完《雪狼湖》之後，我成日都想再做。呢個古仔（《風雲》）寫咗廿幾年，九八年拍成電影，一直keep住有寫，唔係舊故事，咁多年都咁受歡迎，好難得！」
不講不知，原來她是本地漫畫迷，「我係馬榮成讀者，好鍾意睇漫畫、武俠小說，有次去過『玉皇朝』創刊派對，佢哋送咗本《天子傳奇》畀我，我睇完之後，叫司機每個星期都買。」
她於三年前才認識馬榮成，二人的公司在同一大廈的樓上樓下，她知馬榮成封筆，會有時間做感興趣的事，二人一拍即合。之後她再出面力邀謝天華做聶風，鄭嘉穎當步驚雲，黎耀祥做泥菩薩，呂良偉飾演雄霸，還有譚耀文、鄭丹瑞等等，忠於原著又想以5D作賣點，務求極盡視聽、嗅覺、特技等，突破傳統舞台劇的框框。
「我哋用好多日本嘅設備同大型設計，都未計得掂條數，不過應該好難回本，希望呢個舞台劇可以長期咁做落去。呢個陣容班底，個個都獨當一面，最感動係佢哋事前無問過對手係邊個，對我好信任。」
陳淑芬的舞台劇經驗豐富，她任出品人的《雪狼湖》，於九七年在紅館連演四十二場，場場爆滿，難免會有比較。「好難比！所有人都會進步，又有多二十年嘅經驗，以前係實景， 家好多新科技，連地下都有場景，同以前冇得比。」
看得開，陳淑芬才能華麗轉身，焉知不是福氣。
鄭紹康（Francis）著名公關公司「天機」ＣＥＯ，每年主理超過二百個中港項目，有「天下第一關」之稱。在公身兼專欄作家、經理人；在私為不少名人、名二代閨密。藉本刊專欄「紹看風雲」，揭開名二代、名三代不為人知的一面。
文字處理☆俞倩欣 攝影☆蔡豪 化妝☆Terry Yu 髮型☆Tommy Leung @ ii hair nail 場地☆Sevva 設計☆林文俊