阿仙奴週記：「我唔係怕洗錢，我只係怕俾人搵笨。」 人在中環
http://manincentral.blogspot.hk/2013/08/blog-post_18.html等咗幾個月，終於等到英超開季。估唔到只係第一場既比賽，就害我響九十分鐘裡面不停咁爆粗。好彩，重案組仲未有派人嚟查我，應該算係行運了。
輸「三比一」其實唔係乜嘢大不了，一場波，都只係三分聯賽積分遮。聯賽仲有三十七場，輸一場，真係冇乜嘢值得發牢騷的。問題係，三比一背後所隱藏既問題，所反映出既管理層思維，先至讓球迷勞鬼氣。
上季季尾既時候，球隊經歷咗一次十二場不敗，千辛萬苦先勉強拎到個歐聯附加賽既席位番嚟。咁你話呢班波，掂唔掂呢？如果你問我，我大概會用「四平八穩」去形容。你話呢班波好勁，咁肯定唔係架啦。你話班波好差咩？單計下半季既阿記係聯賽既得分王，你話好差咩，似乎又講唔過。隊波既Starting XI，儘管唔係星光熠熠，但我覺得，其實係合格的。唔合格既部份，係Starting XI之後既一班後備，質素同人數（真係可以派落場先計數，幼齒唔計），查實都唔足夠，而且個別位置直頭係冇backup可言。阿仙奴上季季尾之所以能夠打得好，比較合理既推斷係，佢地老早已經乜盃都出晒局，幾可肯定又一鑊四大皆空了。球季後期佢地要應付既，就只有聯賽爭前四一項。相比其他前列球隊，佢地要應付既球賽數目其實偏少，因此儘管正選陣容異常單薄，響比賽量不多既情況之下，還是可以打到好成績的。
打上幾個球季，球隊響off season既時候，都必定遇上兩個問題：1) 大牌球星離隊；與及 2)財政緊絀。剛過去既off season，係球隊近年第一次冇主要球星離隊（ok，唔好串我住，我都知，今年之所以冇人走，係因為阿記既大牌球星，其實老早就走清光…）。財政方面，簽咗Puma既新sponsorship deal，再加上慳家多年，今年大概係球會近年，最冇財政壓力既一年。所有球迷都期望，off season既時候，球隊會有適當既增兵行動。剛過去既暑假，阿仙奴同N個超級球星扯上過關係，最後個個都買唔成。問心講，我其實好懷疑，阿記既球迷們，其實係咪真係咁期望有個超級球星加盟呢？有，當然係更好，但冇既話，至少，響「合資格」既後備兵源既數量上面，起碼都要買番夠數。結果呢？
買唔到利記既梳亞雷斯，我唔怪佢地。買朗尼？我估即使係最樂觀既球迷，都知道其實係吹水。但係買唔到希古恩同加斯達禾，我就有啲條氣唔順了。希古恩係一個典型既阿仙奴式轉會災難：傾到實牙實齒，個個都以為只係爭最後簽個名，交易就可以完成。殊不知，對家坐地起價，明搵你笨。「聰明」既阿仙奴，唔肯做蠢仔俾人搵笨，於是自以為型爆咁walk away。轉個頭，件貨就俾人高價買咗。
球隊既高層，大大聲話自己唔介意洗錢。呢句statement，我其實係相信的。但我睇到既情況係，儘管佢地真係唔怕洗錢，但佢地卻異常害怕俾人搵笨，對「被人當傻仔」顯得異常抗拒。
阿記既transfer activity，讓我諗地我一個朋友早排既經歷。朋友係個有錢人，而且係個孝順仔。佢一直同父母同住，直至佢同太太生咗兩個小朋友，又要請外傭幫忙照顧，原來住緊間屋，忽然變得唔夠住。咁啱響果陣，佢屋企隔離有個細單位放售，朋友覺得，假如將間屋買下來，讓父母可以住響隔離，呢個安排就perfect了。隔離屋既業主，當知道朋友既情況後，自然覺得朋友係「必須」要買自己層樓，於是乎，坐地起價，加價10%。朋友唔肯做傻仔，於是便放棄買賣，去附近尋找其他地方安置兩老。結果呢？朋友一直搵唔到合適單位，佢父母亦因為家裡唔夠地方，而選擇搬走，而且一搬，就搬到老遠。朋友呢個孝順仔做唔成，而隔離既單位，亦被新既買家買咗，短期內再冇機會放售了。
或者讀緊呢篇文章既你，覺得呢個故事跟足球並不能扯上關係，但商業社會裡面，「坐地起價」既事情多不勝數，特別係賣家睇中你「有需要」既時候。情形就好似，當某個地方發生災難既時候，當地既求生物資既價格必然會被炒高一樣。賣家有本錢坐地起價，係因為知道你實在有需要。冇人喜歡俾人搵笨，但人生有太多時候，選擇做一次半次傻仔俾人搵笨，會比有型地做個「聰明人」來得合情合理。
或者講得遠了。
命運往往都係咁樣的，越窮越見鬼的。你越唔肯買人，越唔肯做傻仔，你諗住靠原班人馬搏大霧勉強捱得過咩？一場波，就傷你三幾件正選，仲要集中響晒條後防線度。話時話，禮拜三果場歐聯，湊唔湊得夠十一個人開波？
三比一完場之後，Emirates Stadium內噓聲震天。情況有如當日輸比曼聯八比二既一場波一樣，今日既敗仗，好可能再次換嚟轉會窗完結前既大手掃貨。這樣既panic buying到底會係好事還是壞事？對上一次既panic buying，為我地帶來了阿迪達同梅迪薩卡，但同時亦附送了朴主永跟山度士。是福是禍，還看未來兩個星期。
阿仙奴週記：圍繞著你而建造的團隊 人在中環
http://manincentral.blogspot.hk/2013/08/blog-post_26.html經過開季首場災難式輸俾維拉之後，響大量球迷（包括我）都睇淡之下，歐聯作客土耳其既賽事，居然可以輕勝三比零，個人覺得已經係超額完成了。
我係個膚淺既球迷，只係一場勝仗，我對球隊既悲觀情緒的確係舒緩咗唔少。我雖然係膚淺，但我都唔係傻既。球隊既兵源問題，其實仍然嚴峻。好運一啲既話，球隊未來幾週若果冇再增加傷病既名單，短期之內，憑住隊員從上季尾起已建立出既默契，我估，往後幾場既成績還是會合格的。但球季漫長，球員亦唔係鐵人，增兵既情況假使未來幾日再冇改善，三幾個月後，班球員捱得殘殘地，怕且又會再嚟一段崩潰式既低潮期，然後到季尾十場又要破釜沉舟地去全力爭第四了。
我心底裡面比較樂觀既一面話俾我聽，未來既一個星期，「應該」會有新球員加盟的。這是阿仙奴的老習慣，唔去到轉會窗臨關閉既一刻，都唔簽啲球員返嚟。今年我覺得情況會更加「緊張」，理性推測係，要過埋禮拜二晚，confirm埋歐聯淘汰費倫巴治之後，先至有機會簽到新球員。兼且近幾年阿仙奴既滑落，令阿記實際上已經跌出咗歐洲頂級球會既行列。呢個status多少讓佢地響轉會市場上面變得更加被動。呢一刻，阿仙奴既轉會策略，大概只能依賴其他頂級球會既轉會動作。人地新簽一個球星翻黎，原本陣中果個可能失去必然正選既資格，難聽一點講，阿記就只能食人家「食剩」既球員。好似巴利將要簽皇馬，阿仙奴就即刻打迪馬利亞主意，車路士準備買入韋利安，阿仙奴就去求購馬達。或者咁樣係一個聰明既做法，但呢個被動既轉會策略，副作用必定係會延誤自己既組軍時間。
咁結果我地會見到邊啲新面孔？賓施馬？馬達？米祖？又或者係卡巴耶？呢一刻，對阿仙奴最終會有球員加盟呢個議題之上，我係樂觀既。我認為，worst case (其實響阿仙奴身上，worst case係經常發生的)，都必定最少有「一個」球員會加盟的，果個球員，叫做法明尼。
一毫子轉會費都唔駛俾既嘢，不嬲都係阿仙奴杯茶。
*****
星期六晚，阿仙奴三比一作客打贏富咸，為我帶來一個甜睡既晚上。
三球入球當中，其中兩球屬於普多斯基。
前年季尾，普多斯基轉會阿仙奴既傳聞鬧得熱烘烘。阿記既球迷，都熱切期望，由雲佩斯、禾確特再加上普多斯基所組成既進攻組合。最後雲佩斯離隊，球迷既期望落空。唔知大家有冇同感：普多斯基響三十歲唔到之齡，代表德國超過一百次，點計都應該係個有料球員丫。不過睇咗佢踢成年，唔係話佢唔好，但總係好似…總之就冇想像中咁好。
有人話係雲加唔識用佢，事實上，以一個國腳級既球員，卻經常徘徊響正選同後備之間，查實都算係有啲冇面架啦。如果唔係張伯倫長抖，星期六打富咸，怕且正選都仲未輪到佢。
好多人都寫過，普多斯基既問題響邊度。射術好，把握能力強係佢既強項。但走位、off the ball同隊友配會，個人覺得佢就明顯比較弱。普多斯基未轉會阿仙奴之前，係踢德甲既降班隊科隆。相比阿仙奴，科隆既規模自然係細一截。以普多斯基既質素，響科隆呢類細規模既球會裡面，球隊既排陣以至戰術，好自然會圍繞住普多斯基呢位明星球員而設計，一切都以佢為中心。當成個團隊既編排，都圍繞住你而安排既時候，你既缺點，自然亦較難暴露出嚟。但係當你去到大球會，情況忽然由「球隊遷就你」變成「你遷就球隊」既時候，一個球員既「適應能力」即時受到考驗。當然，呢個係我估既遮，冇乜數據作為根據，不過當年普多斯基敗走拜仁，被逼回流科隆，唔知係咪都係同一個原因。
認識好多好聰明，好有talent既年輕人，當大家都認為，呢啲年輕人長大後必然響事業上會有一番作為既時候，呢啲年輕人，卻一個又一個咁響事業上遭遇挫折。未出嚟社會做事既時候，在家庭中得到萬般寵愛，家人、朋友總係圍繞住你團團轉。一踏出商業社會之後，reality check好快就出現，由「人家遷就你」，霎時間轉變成「你遷就人家」，對年輕人既適應能力，自然係極大考驗。商業社會係一個考驗「適應能力」既地方，其實呢一點，我覺得多少跟球員既情況一樣：一個球員如果只能響特定環境同戰術之下，先至能夠有好表現的話，佢既成就，必然亦會有所限制。
最近有傳聞話，阿仙奴打算將普多斯基借俾德甲既史特加。但願只係一則吹水新聞吧。
阿仙奴週記：In Arsene we...? 人在中環
http://manincentral.blogspot.hk/2013/09/in-arsene-we.html先講倫敦打比。
呢場波開波前，我係好擔心的。阿仙奴個陣，殘到甩皮甩骨。幾日前先打完歐聯，體力已經輸人一截，仲要呢個又話傷，果個又話撞親。莫講話係熱刺，咁既狀態，對手怕且係候城都未必有把握。
最大既擔心係，對家洗咗過億鎊去增兵，阿仙奴呢？成個summer流流長，一毫子都冇洗過，淨係免費簽咗兩件返嚟。差距之大，作為阿記Fans，個心係好唔舒服的。
呢場一億鎊對零鎊既比賽，零鎊以一比零取勝。膚淺既球迷如我，忽然心裡面又響起果句「In Arsene we trust」。
當然，一場比賽，唔應該去否定熱刺既增兵成果。事實上，佢地班波既質素，無可否認係強的。不過十個球王走埋一齊，都未必一定能夠贏波，畢竟球員之間既磨合需時。我地響季初第三場就遇上熱刺，其實係好運。佢地班球員仲未夾熟，相比阿仙奴基本上全部係上季既班底，默契方面必定係贏晒的。下一個round再鬥熱刺既時候，幾可肯定，唔會好次呢場咁容易了…都仲未計下次，仲要係人地主場。
呢場波，其實仲給予咗我一個好大既感受：錢，原來真係唔係萬能。有好多嘢，其實都係由時間同汗水，一點一滴咁建立起嚟。錢可能會給予你一個容易一啲既起步，但有更多既嘢，係錢冇辦法可以買得到的。我哋作為一個球迷，會唔會太過習慣將一team人既collective power，太過straight forward咁去計算出嚟？我係一個商業機構既管理人，呢個錯誤其實我時不時都會犯。可能我都係打winning打得太多啦，成日都會不自覺地以為，一加一，就必定會係二。但響一個以人為中心既團體入面，實情係有太多既因素，影響住最後既結果。士氣、團結、默契、性格、隊員之間既chemistry…嘩，數都數唔晒。
*****
今朝起身睇新聞既時候，我幾乎唔敢相信我對眼。奧斯爾轉會阿仙奴？四千幾萬鎊喎？阿仙奴喎？雲加喎？雲加肯俾四千幾萬買一個球員？
當然，呢單交易，好唔「阿仙奴style」。至於點解呢單deal會出現，我有幾個猜測既。一來，阿仙奴真係多咗好多錢響身，二來，球迷對管理層既壓力，亦越黎越大。管理層響球迷心目中，已經越黎越冇誠信。唔做番舖驚天地既大deal出黎，實在難以服眾。
至於咁既價錢買Ozil值唔值？我唔識答，但我個人其實係好喜歡呢個球員的：既有效率又唔花巧，數據上，助攻既能力爆晒燈，值唔值呢個價，或許見人見至，但佢會令到阿仙奴變得更強，我覺得就幾可肯定的。
響外國網站，我睇過一啲評論。評論既內容，係有關阿仙奴同曼聯，響今個summer轉會市場既表現。阿記同曼聯，今年響買人方面既表現，都係為人所批評。佢地既共通之處，係響transfer window既早期，打晒開口牌，但係卻俾自己睇中既獵物，一件又一件咁溜走。結果要拖到轉會窗臨關閉既一刻，先簽到件「大嘢」返嚟。（曼聯都係最後一刻先簽到費蘭尼）
評論係咁講既：今年係阿仙奴，第一次冇大牌球員離隊，而且第一次成為「有錢人」，有機會坐埋檯同其他歐洲大戶「玩」，盡管雲加教咗十幾年，但咁既經驗，對佢嚟講其實還是第一次。做「有錢人」，其實係要學的。有錢大戶之間，有佢地習慣同獨有既交易方式，「新仔」未免係要交啲學費適應一下。同樣既情形，同樣適用於第一次教大球會既莫耶斯身上。都係果句，身上有錢，都唔代表你真係懂得做有錢人的。
呢個講法，唔知大家又認唔認同？
奧斯爾加盟，令我今朝心情興奮咗好一陣。今屆既英超，應該會好有趣。我期待新球員為阿仙奴帶來既衝擊同進步，但老實講，一個Ozil，我覺得其實唔夠的。阿記仲有好多地方，需要有更多既後援作補替。呢個陣容，其實依然係單薄。一月轉會窗重開，我期望會再有新人加入。否則，四大皆空既咀咒，還是會繼續向我們招手的。
阿仙奴週記：同三年前一樣，我們今日在榜首。 人在中環
http://manincentral.blogspot.hk/2013/09/blog-post_23.html呢個標題，本來打算係上個禮拜用的。不過上個禮拜打贏新特蘭之後，儘管一樣上咗榜首，不過利記打少一場。利記贏波之後，榜首之位就要再次讓出。直至今個星期，響利記失分之後，阿仙奴先至係真真正正咁坐穩，本週榜首既位置。
你一定會話，開季只係打咗五週，呢個所謂「榜首」，其實冇意義的。但係作為一個阿記Fans，對上一次球隊能站在聯賽榜頂點既位置，以經係接近三年之前。睇住一個又一個球星唾棄阿仙奴，過去幾年球隊不斷響爆煲邊緣掙紮，事隔三年，再一次企響榜首之位，其實都幾感觸。
呢幾年做阿記球迷其實幾冇癮的，八年無冠，俾人笑到面都黃。你睇一套《衝上雲宵》都可以抽阿記咁多次水，就知道阿記近年既形像，係幾咁惡劣。不過今時今日公眾既評論，風向可以轉得快過「天兔」登陸，假設今年真係好彩俾阿仙奴有杯落袋，雲加又會由俾人柴台，忽然再被捧為天才，而過去被人鬧孤寒刻薄既球隊管理層，亦會得到大平反。
咁到底係公眾既評論，一直以嚟都太武斷，還是領隊同管理層真係作出咗改變？
我自己作為商業機構既管理人員，感受係管理既路上，總係會有起有落。要令自己既管理能有所作為，首先要夠韌夠面皮厚，唔好被人炒魷，位置要企得穩先得。In the long run，如果你係有料到的話，當天時地利配合時，自會做出成績。
當然個大前題係，你要真係有料先得。雲加嘛，雖然大家笑佢係「雲膠」已經好多年，但我心底裡面，還是向佢投以信心既一票的。
然而社會上大部份面皮夠厚又疑似好韌既管理人，都係唔多夠料，但又以為自己好掂的居多。這種人，近年既香港地，似乎變得特別多。
*****
今日既社會，節奏越黎越快，對一個人有幾多能力既判斷，亦越黎越武斷。
例如藍斯，又例如基奧特。
唔好扮嘢，上年呢個時候，你有冇份鬧藍斯唔夠班，基奧特好廢？
我得承認，我有份。見到藍斯帶住個波扭嚟扭去都交唔出，搞一大輪俾人拍甩；基奧特大大舊又論論盡盡咁響前面冇啲作為…仲話靠佢接替雲佩斯？睇到眼火爆呀真係。
今屆打咗五場，最好表現既就係佢地兩個。
佢地兩個既技術係咪進步好多呢？我諗又唔係。佢地真正既進步，係佢地既腦筋。簡單講，係佢地開始「捉到路」，應該點樣可以踢得聰明啲，踢得有效率啲。
年輕人就係有咁既特質，只要「開竅」，就能夠進步神速。佢地有機會接受「開竅」，只因佢地仲未成型，仲未被守舊同固執佔據佢地既靈魂。
老屎忽之所以冇進步空間，正正係佢地已經拒絕「開竅」。佢地以為自己睇通全局，洞識世情，仲要睇唔起班後生既。於是乎，佢地既將來，只能夠走下坡。
未成形既年輕人，總係有無限可能，睇死佢地，係最愚蠢既事。
我希望阿仙奴下個「開竅」既球員…係禾確特就好啦。
*****
打風既晚上，曼市打比果場波，直頭慘不忍睹。
我這個阿仙奴球迷，自然唔會太喜歡曼聯的。但相比之下，我其實更唔喜歡用錢堆砌出嚟既曼城。
只係換咗領隊，曼聯就即時走樣成咁。
賽後，個個都圍插莫耶斯唔夠班帶曼聯。如果你問我，我都會覺得，呢一刻既莫耶斯，的確係唔夠級數的。不過冇人一出世就夠班教大球會的，凡事都總有個過程。觀乎佢響愛華頓多年既成績，我覺得佢應該算係有料的。有足夠時間俾佢既話，我估佢會做得好的。只係今天呢個節奏急促既社會，大家會有幾多耐性俾佢？
車路士怕且係對領隊最冇耐性既英超球隊。過去幾年，領隊換完又換，結果換來甚麼？兜兜轉轉之後，還是要搵返摩連奴返嚟。假如摩連奴當初冇被炒，一直執教，車仔會唔會比現在強大許多？
當然呢個世界，係唔會有如果的。
費格遜退休之後，今年睇英超總係覺得差咗啲嘢咁。假如連雲加都唔響度既話，睇英超既趣味，應該會再減少一啲。
阿仙奴週記：天上凡間原來只是一線之差 人在中環
http://manincentral.blogspot.hk/2013/10/blog-post.html星期六晚的英超賽事，阿仙奴四比一大勝諾域治。韋舒亞所入既第一球，所展現出既組織同流暢程度，肯實係世界級的。及後藍斯連扭兩個射入果球，唔睇樣真係會以為係施丹上身。
睇完呢場波之後，我心裡面不自覺地講咗一句響少林足球出現過既對白：「班師兄弟終於番晒嚟啦！」
這種飄飄然既感覺，直到禮拜二晚，球隊以臨天光賴尿既方式輸俾多蒙特之後，變得蕩然無存。鬼佬評論話，呢場波係一次對阿仙奴既reality check，證明阿記今年既實力並唔係想像之中咁強。開季一直至今既好成績，只係有賴一眾對賽既對手水皮，實屬虛火。
一場波，就由天上跌落凡間了。
*****
當好多評論員同專家，用「實力」一詞去解讀前列球隊既表現時，我總係覺得唔係好妥。
如果「實力」係泛指球員既能力總和，再加上默契和隊型的話，我的確係覺得解釋唔到當前既英超形勢的。例如曼聯…OK，我明白今季佢地響轉會市場上，實在表現得太過論盡，但佢地既人腳，基本上同上年唔係好大出入。以上屆幾乎贏足成條街既球員班底，即使冇乜新血加入增強「實力」，點都冇理由可以插到落去咁既地步掛？當個個都話，曼聯欠缺一個具創造性既中場大腦，所以唔掂，但呢個「大腦」，上年都一樣冇丫，但上年佢地卻能贏到開巷喎。
情況好似過去兩屆既阿仙奴一樣。冇錯，佢地每年都賣走件球星，但係賣走咗一、兩件球星，大部份既球員其實仲響度，點都未至於要響季初跌到落去護級區邊緣，點都未屎波到，要輸八粒俾曼聯掛？
我傾向相信，呢幾隊前列球隊，「實力」其實並唔係球迷同有些所謂「專家」所講既分別咁大。真正令佢地既表現有天淵之別既，其實係信心同氣勢。早兩屆，搞一大餐之後賣走隊中球星，對球隊最大既影響，其實係信心。阿仙奴只係冇咗雲佩斯就係咪就會差到，連護級隊都打唔贏？肯定唔係，但當四周圍所有人，都響度懷疑，你賣走咗隊中球星之後，「實力」會大幅削弱之後，你落場果一刻，心裡面就不其然對自己會有一點懷疑，球員既每個動作、每次傳送，腦袋裡面就會出現多一丁點既無謂思考，那怕只係一丁點，響節奏急促球場上面，勝負就係取決於此。同樣，奧斯爾加盟，係咪真係令實力提升咗咁多？我其實好喜歡呢個球員，但問心講，除咗頭兩場交出咗幾次助攻之外，我查實又真係未覺得，奧斯爾響「實力」上既作用，真係大得咁厲害。當然，以佢既質素，當佢同班隊友夾得再耐啲，效果肯定會更加明顯的。只係響呢一刻，我覺得奧斯爾既加盟，響士氣同信心上既作用，比在「實力」層面上還要大得多。
信心同氣勢都係無形的。球隊因為有信心，所以走勢凌厲；走勢凌厲既球隊，同時又會散發出讓對手畏懼既氣勢。當球隊係咁贏係咁贏，對手還未落場踢，心裡面就會諗：「我係咪真係有能力成為例外，打低面前呢隊長勝球隊？」所謂讓人怯既氣勢，往往響未真正開波既時候，就已經將對手擊敗了。上年既曼聯，我覺得正正係有呢種攝人既氣勢，即使上半場落後幾多球，大家都「形住」會俾佢追返上黎。今年呢？換一換領隊，一切氣勢都唔見晒。有朋友寫話，今年既阿仙奴同曼聯，好似交換咗身份咁。實力差別可能唔大，只係信心同氣勢，隨住重心人物既去留，而出現咗此消彼長既變化。
輸俾多蒙特，係咪世界末日？一場波既勝負，影響冇咁大既。不敗既氣勢被打斷，卻係肯定的。然而信心係贏波既重要元素，但過份自信卻會引來敗陣。呢場波點解會輸，如果你問我的話，「過份自信」會係我既答案。失第一球，係藍斯響唔應該控球死扭既地區被人偷甩而間接造成，至於第二球，更係響全隊上下不斷進攻，被人一個反擊而輸掉的。如果星期六既英超比賽，唔係行雲流水地入咗幾球靚波，信心水平未升到爆燈的話，禮拜二晚既戰果，你估會唔會有所不同？
雲加話，呢場波，係輸在球隊太「naive」。
我認同，你呢？
越黎越覺得，做領隊所牽涉既智慧，實在複雜得難以想像。冇信心既球隊必死毋疑，信心太強同樣會物極必反。領隊作為一個自己響比賽當中「冇份落場」既人，所能做既，就係不斷調節隊員之間既信心水平，當中既困難，相信係好似我呢亭只懂響打winning時將球員既能力值加加減減，就以為自己好懂得足球既傻仔，永遠都冇辦法感受得到的。
阿仙奴週記：悶贏，和雲佩斯的慶祝 人在中環
http://manincentral.blogspot.hk/2013/11/blog-post_25.html第十二週英超比賽，阿仙奴主場二比零贏修咸頓。
場波我覺得其實幾悶的。阿仙奴既發揮，也許比上週對曼聯既時候爽了一點，但同「高峰」相比，卻肯定有一大段距離。兩個入球，都唔係特別漂亮，而且主要係因為對手犯錯所致。如果唔係主隊球迷，要忍得住九十分鐘唔樁眼瞓，其實都有啲難度的。
不過，我卻喜歡呢一場勝仗。咁樣既勝利，我反而覺得更紮實。
係人都知，阿仙奴如果狀態好既時候，球員打到好似上身一樣，乜隊都打得贏的。問題係，「上身」既日子同見到陳妍希變番索女既機會率其實差唔多，都係好似買大細一樣。一隊波，排面陣容幾強都好，成個球季流流長，肯定係有一定數量既比賽，係冇辦法「上到身」的。如果隊波上唔到身，就贏唔到波的話，咪話贏咩錦標啦，前四都危呀。
上一季既阿仙奴，就肯定係屬於「一唔上身就冇把握贏」果類。佢最後既成績亦「有目共睹」。今季響呢方面，係明顯有改善的。其中一個原因，早幾個禮拜寫過，應該係因為由新球員加盟所帶來既信心；另一個原因，我覺得係一個成熟咗既龍門。列文之後，阿仙奴試過用唔少門將把關，當中既共通點係「唔夠班」。現在企穩正選既施錫斯尼，上季尾比雲加雪咗幾場之後，當堂個人好似醒番咁。或者以佢既資歷嚟講，佢既級數都仲有待提升，但今季so far佢既表現，最起碼做到唔應該輸既波，佢就真係唔輸。雖未至於拍案叫絕，但話佢算得上係穩健，應該冇人會反對吧。
龍門往往好似屋企裡面既女人一樣，假如佢能打理得屋企井井有條既話，男人先能夠無後顧之憂咁出去搏。大家不妨「回味」吓之前幾季，阿仙奴個龍門係點樣？真係前面贏幾多都唔夠後面輸。
*****
贏修咸頓之前，卻「再一次」輸俾曼聯。
唔知大家同唔同意，但係果場波，只係開波五分鐘，大概我地就已經feel到，呢一場，贏唔到的。又係果個講咗N次既argument，對曼聯，過去幾季既對賽往績令到「信心」方面輸咗幾條街的，即使今季對手已經今非昔比，但心中既恐懼，我諗係必須有一次乾淨利落既勝仗才能克服的。再加埋幾日前先硬撼完多蒙特，班球員搏到七七八八，果場波，要贏都真係幾難。
贏唔到，但和都守唔住，原因又係因為雲佩斯。其實轉會之後既雲佩斯，對親兵工廠都有波入的。分別係，之前兩次佢都仲肯「守孝」唔慶祝的。今次入波，卻興奮到忘晒形。
對母會入波唔慶祝，唔知係由幾時開始流行既「習俗」。我比較有印像既，係好多年前，阿根廷名將巴迪斯圖達，由效力多年既科倫天拿轉會羅馬，倒戈入球之後，忍唔住掉下眼淚既畫面。那一刻，感覺好真，亦真切地感受到，球員對母會嗰份情。時而勢易，足球圈亦變得越來越商業化。球員對一手栽培自己既母會，其實真心講有幾多感情？好多球員倒戈入球之後刻意唔慶祝，有幾多係出自真心？還是只出於公關考慮？
雲佩斯倒戈入球慶祝，我雖然不覺得這個個畫面太順眼，但倒覺得其實沒有甚麼大不了。球迷總是要move on的，有些球員走了，就真的是走了。大家也許曾經有過美好的時光，但人家就像變了心的女朋友一樣，心也不會再在這裡了。
唯有期望沒有他，我們的日子，反而會過得比你在時還要好。
阿仙奴週記：那隻杯仔為何讓我感動 人在中環
http://manincentral.blogspot.hk/2014/05/blog-post_19.htmlokok，我知道足總杯既份量早已今非昔比，我亦知道決賽嗰場波，即使面對次級對手依然贏得咁險唔係啲咩上佳表現，我更加知道，贏咗呢隻杯仔返嚟，唔代表隊波實力好強冇問題，我當然知道，呢支所謂足總杯冠軍隊，同早排吞咗車路士六隻光蛋係同一隊人。得得得，我們其實都係現實的，隊波仲係未掂，我哋每一個阿記既球迷其實都心裡有數，但經歷九年無冠之後，今次捧杯，我還是覺得有點感動的。
阿仙奴管理層響呢九年既方向正唔正確，領隊雲加究竟做得好唔好，坊間意見好分歧。但姑勿論意見如何，如果我話，過去九年，阿仙奴呢間球會其實係「捱」緊，我諗唔會有太多人會反對。球員被有錢球會撬走，建新球場讓球會負債纍纍…你可以質疑佢地可以處理得更好，但佢地要面對重重既困難，倒係鐵一般既事實。
近年響比賽場上面見到既阿仙奴，係一隊嚴重缺乏信心既球隊。球隊從前打法水銀瀉地，現在既打法呢，即使面對低自己幾皮既對手，都不斷地打橫差嚟差去。得得得，我知你想串我唔識嘢，呢啲打法叫做possession，但sorry，打possession如果打得有信心，「視覺效果」唔會係咁既款的。呢個球季，即使自認作die hard 粉絲既我，有唔少場比賽都睇到我樁眼瞓。遇上強隊例排遲入局；遇上強隊加埋作客=被人大炒。呢隊係一隊充斥住國腳級球員既球隊，球員質素冇可能差過其他強隊咁多。或者你可以歸咎雲加臨場戰述太渣 + 傷兵太多 +板凳深度唔夠呢一大堆理由，但我更相信，球隊以至球員既信心，經過九年食白果之後，係脆弱到近乎不堪一擊。每一場比賽，戰情只要稍為偏離「劇本」，成隊波就會腳軟，然後俾人肆意凌辱。
每個人都總會有一點心魔。但心魔有幾影響你，視乎你將呢隻心魔養到幾大。人同心魔既交戰，永遠唔會完結，像阿仙奴，呢隻心魔養咗九年，一年復一年地「壓佢唔住」，呢隻「鬼仔」，其實已經惡到不得了…甚至有唔少人相信，球會最終會被呢隻「妖怪」殺死，永遠都起唔返身。呢個係一個惡性循環，情況通常只會越嚟越壞，要矯正亦會越嚟越難。今日球會拎返隻杯仔，最大既意義，我覺得係讓大家再一次相信「我地還沒有死去」。心魔縱使很惡很難纏，但鬥贏佢既希望仍然存在。
呢幾年，我對呢隊球隊既「沉迷」程度，一年比一年嚴重。我認識有唔少同我一樣既小生意人，居然都同樣係阿記既粉絲。做阿記既球迷，肯定係唔過癮的，但我地對球隊之所以不離不棄，我主觀地覺得，球隊過去既有些處境，總係會讓我們有點感同身受。在這支近乎「落難」既球隊身上，我們多少看到一點點自己。
幾個月後，球隊在新球季裡好快又要再跟這個心魔惡戰了。大家都明白，一次勝利代表不了甚麼，但凡事總有開始，而人生也總需要好幾個轉捩點的。
阿仙奴週記：風水總會輪流轉 人在中環
1 :
GS(14)@2013-10-01 12:13:30http://manincentral.blogspot.hk/2013/09/blog-post_30.html
英超第六週，阿仙奴作客2-1打贏史雲斯。
賽前既評論普遍預期，呢場會係一場so call「技術型」既高水準較量，原因係兩隊都擅長打地面戰，唔喜歡傳統英式既高Q大棍。講到咁，場波應該有啲睇頭啦掛？說實話，場波響下半場開紀錄之前，我幾乎悶到瞓著。我明白大家都係技術型，大家都擅長地面傳球，大家都著重控球…不過上半場俾我既感覺，係響四十五分鐘內不停響中圈附近傳黎傳去，如果唔係睇緊電視直播，仲以為班球員響度玩緊馬騮搶波。
我知道我呢個講法係膚淺的，possession呢樣野，響足球比賽上係極具戰略意義。不過俾咗幾舊水NOW去睇直播，自然想得到多一點觀能刺激…縱使我明白，阿仙奴不嬲其實係喜歡傳個波入網多過用力射入去的。
*****
場波打得好嗎？問心講，一般啦我覺得。真正讓我呢亭膚淺既球迷情緒高漲既，係呢場波以外既其他賽果：曼市兩隊齊齊俾相對弱既球隊砌低（曼聯仲要係響死響奧脫福呀大佬…），熱刺同車仔打和各跌兩分，阿仙奴響呢個禮拜既「全取三分」，則顯得特別有份量。
撇除第一場主場慘敗之後，過往果五個禮拜，阿記表現一直異常穩定。呢種穩定可以堅持幾耐？冇人能夠講得準。不過呢一刻，我地站在榜首卻係鐵一般既事實，而呢個暫時既榜首位置，係響有大量原本係正選既球員缺陣底下拿下的；亦因為呢個原因，我覺得份外珍貴。
*****
不久之前，我記得睇過一個非正式既統計，話呢個地球上，最多人談論既球隊，原來係阿仙奴。同阿仙奴相關既blog、twitter、微博等文章，亦冠絕整個球壇。出奇嗎？最多人談論既球隊，竟然唔係Fans更多既曼聯，又或者星光熠熠既皇馬，而係過去八年連杯仔都拎唔到一隻既阿仙奴。點解會咁既呢？
無他既，因為阿仙奴過去八年，真係唔多掂。掂既嘢，因為本身已經冇咩大問題，批評空間自然細。反正佢都已經咁掂，咁仲有乜嘢好評論呢？只有「唔掂」既嘢，先至能夠吸引到公眾既批評。面對住過去幾年既阿仙奴，有心既球迷會寫評論，去解構球隊唔掂既原因；認為自己醒過雲加既所謂「專家」，又會指指點點教球隊應該點做、買邊個又賣邊個；仲未計一班口多多既球迷，得閒抽下阿記水串佢又膠又窮又孤寒，志在過過口癮。加加埋埋，就造就咗佢「貴為」地上最多人談論既球隊了。
睇到呢個統計既時候，我不自覺地諗起有啲本地既政府官員，總係埋怨傳媒評論得佢地太多、太過份太刻薄。唉，理由其實一樣既遮，評論得你多，主要係因為你「唔掂」。當你掂既時候，對你既「批評」，自然會變得冇市場。我只係恐怕，到時你又會嫌傳媒對你既歌功頌德唔夠多了（如果真係咁既一日…）。
「風水輪流轉」這回事，有時真係唔到你唔信的。經過八年無冠既日子，今天領先既，「居然」係過去幾年俾人串爆既阿仙奴。緊隨其後既，則又係另一隊響過去幾年俾人笑到面黃既利物浦。我當然明白，響季初，一切都係言之尚早，但我隱約還是聞到一點，十年河東十年河西既味道。
未來幾年，最多人談論既球隊，唔知會唔會有機會由一隊倫敦球會，變成一隊來自曼徹斯特既球隊？
我們都拭目以待。
着情侶波衫獅城放閃杏兒Phil甜捧阿仙奴
1 :
GS(14)@2015-07-23 01:30:05【好貼身】■胡杏兒同男友Phil喺星期三被讀者發現，喺新加坡拍拖捧阿仙奴，佢話係專登放假陪男友。讀者提供圖片
【爆相爆片】【新加坡】胡杏兒自從公開承認同有「港姐殺手」之稱嘅夜場老闆李乘德（Phil）拍拖，外界一直高度關注呢段戀情，雖然佢哋好多時選擇去外地拍拖，不過仍然逃唔過鏡頭。前日讀者陳先生經過本報「爆相爆片」，直擊杏兒同男友喺新加波着情侶波衫捧阿仙奴。喺呢個星期三，英超球隊阿仙奴去咗新加坡，同新加坡明星隊爭入今晚巴克萊英超亞洲挑戰盃決賽，讀者陳先生亦喺香港去咗當地睇波，佢接受本報訪問話：「當時係喺比賽途中，佢哋喺樓梯搵緊自己坐邊度，之後好快就行咗去第二、三行坐低睇波。」杏兒當時同男友齊齊着住阿仙奴波衫，杏兒紮起咗頭髮，化咗個淡妝，不過陳先生因為同佢哋距離好遠，所以睇唔到呢對拖友有冇親暱嘅表現。結果阿仙奴以4:0擊敗新加坡明星隊，晉身決賽。
【襯到絕】■雖然杏兒唔係波友，但係為咗男友，都專登着埋阿仙奴球衣捧場。
■阿仙奴結果4:0擊敗新加坡明星隊，晉身決賽。資料圖片
■杏兒同男友公開戀情後，經常拍拖過二人世界，點知都避唔過鏡頭。資料圖片
「我唔係好識睇」
噚日本報記者搵咗杏兒求證，佢透過WhatsApp好大方咁承認呢件事，仲話：「呢個新加坡trip係去北京拍劇前已經安排，之後仲要返北京拍劇，主要係陪男朋友啫，我唔係好識睇！」查實近排杏兒喺內地密密賺人仔，工作都排得密麻麻，不過話晒而家都拍緊拖，點都要抽時間陪吓男友，享受吓二人世界，睇嚟今次佢用咗唔少辦法，先可以放幾日假！採訪：張曦彤
來源:
http://hk.apple.nextmedia.com/entertainment/art/20150718/19223490
IS戰鬥分隊策動倫敦橋恐襲「阿仙奴球衣殺手」兩被放生
1 :
GS(14)@2017-06-10 12:40:41■民眾昨天在倫敦橋南橋尾擺放鮮花悼念死者。 路透社
英國釀成7死的倫敦恐襲，「伊斯蘭國」（IS）昨天在網上宣稱是其派遣的「一支戰鬥分隊」所為，當局還未公佈被擊斃的三名刀手身份，然而英國傳媒憑着現場一名相信是首領、身穿阿仙奴球衣的兇徒伏法照片，稱他為「阿仙奴球衣殺手」，並順藤摸瓜追查出他是當地一名巴基斯坦裔激進分子，鄰居曾至少兩度舉報他的激進行徑，但當局沒有採取行動，輿論質疑上周末的恐襲原是可以避免的。
英媒在警方要求下，暫以「阿布茲」（Abz）稱呼他，指他27歲，小時候由巴基斯坦移民，在英國長大，住在倫敦東部的巴爾金區，已婚兼育有兩名孩子。
■目擊者所拍的刀手施襲片段，可見其中一人身穿阿仙奴球衣。
■阿布茲（箭嘴示）曾出現在一齣有關英國聖戰士的紀錄片上。
看聖戰片入魔 向小童洗腦
兇案後當局搜查過他的寓所，街坊奇布向《每日郵報》記者表示，幾乎肯定相中死者就是阿布茲，事關在案發前約7小時，「他過來找我，表現得很雀躍，當時他正是穿着那件阿仙奴球衣，查問貨車事宜，他想知道哪裏租車和費用多少，說計劃搬屋。」上周六恐襲中，阿布茲等三人先在倫敦橋駕駛貨車撞倒途人，再落車見人就斬。曾在肯德基家鄉雞餐廳和倫敦交通局工作的阿布茲，在社區內的風評頗為極端，有鄰居形容他是一位有禮兼樂於助人的開心果，會放心讓孩子跟他一起玩耍，平時大家亦有傾有講，分享阿仙奴「波經」；不過，阿布茲近年變得激進，有女街坊向當局舉報他常在公園內以派糖派錢的方法，向其他小孩「洗腦」，宣傳IS的激進思想；亦有人表示在英國聖戰分子的紀錄片上，見過他展示IS旗幟。阿布茲太太的親戚透露，他前年甚至計劃赴敍利亞打聖戰，但適逢太太懷孕打消了念頭。一名不願透露姓名舊友向英國廣播公司表示，阿布茲是在YouTube瀏覽聖戰片段和美國激進伊斯蘭教士賈布里勒的宣傳片後踏上成魔之路，他說：「我致電過反恐熱線，跟警方講我與阿布茲的對話，相信他思想已激進化了。」後來，當知道阿布茲沒有被捕，甚至連護照也沒有被沒收，這名男子坦言無奈，「我盡了本份，也知道許多人舉報過，偏偏當局沒有跟進。」
剛調低警戒級別 反恐失職
上月22日，英國曼徹斯特受到自殺式炸彈襲擊，首相文翠珊一度將警戒級別提升至最高的「危急」級別，但五天後降回第二的「嚴重」級別，反映出英國情報機關對上周六的恐襲事前沒有掌握任何消息。巴金爾區街坊的投訴，更顯示英國反恐部門有失職之嫌，讓阿布茲這條漏網之魚偷襲得手。另外，愛爾蘭國營廣播公司RTE引述當地警方消息報道，英國警方發現三名兇徒中，其中一人身上有愛爾蘭身份證明文件，是一名摩洛哥裔的愛爾蘭人，太太是蘇格蘭人，住在首都都柏林已有一段日子，無犯罪紀錄，因此並非當局監視的目標。愛爾蘭政府暫時未有回應。倫敦市警長迪克指近期多宗恐襲很大程度都是本土策動。警方繼前天拘捕12名懷疑涉案人士後，昨至少在倫敦搜查兩住址，拘留多人。英國《泰晤士報》/《每日郵報》/路透社
來源:
http://hk.apple.nextmedia.com/international/art/20170606/20045849
Next Page