過去幾年投行生意難撈，唔少i-Banker跳出嚟自己搵食，正排隊上市的夜場股「高門集團」，在中環經營兩間夜場Volar和FLY。 大股東吳繩祖（Kester Ng）來頭唔小，九五年已加入美林跟隨現時港交所行政總裁李小加，當年是正牌「青年才俊」，三十九歲已是美林中國及香港資本市場部主管，在李小加帶領下喺美林做過唔少大刁專攻大陸，包括中移動（941）配股、中海油（883）上市，單單都講緊幾十億……美金，曾經有段時間美林做IPO威過高盛，後來李小加跳槽摩通，仲挖走埋吳繩祖，與一班同樣出身美林嘅「中國通」，搵過唔少大錢，如方方及梁嘉彰，但成也「中國」，敗也「中國」，去年方方及梁嘉彰二人因捲入聘請大陸官二代已離開摩通；以吳繩祖的背景，搞間奀豬豬創業板上市公司，似乎大才小用，i-Banker生涯都要睇時勢。 安邦難過KYC 安邦這間神秘大陸巨企，在海外策動多宗矚目收購，正籌備把旗下壽險在香港上市，上週《紐約時報》做咗個偵查報導，懷疑安邦真正股東與內地權貴有關，安邦最終由乜誰持股冇人知，大摩已退出上市計劃，呢篇文章在投行內瘋傳，投行口痕友話，其實唔少美資銀行都好難同安邦開戶口；因為過唔到KYC（Know Your Client）呢一關，有些中資銀行都唔敢碰，怕有政治風險，咁呢次睇吓仍有份參與的投行瑞銀和高盛，如何滿足其compliance嘅要求了。 中環寸嘴 工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。 $200樽辣椒油仲想加價！ 嘩，新地個Grand YOHO樓盤，話加價兩成喎，有冇搞錯，又喺度「豪宅化」啲樓價，趁市旺推特色單位，等消費者以為有買要趁手，製造樓市上升假象；七月個零售數據，連續第十七個月下跌，按年跌7.7%，就算有復甦，消費模式都「平民化」，問你「化」未？好似福臨門咁，家陣大劉都唔去，啲闊佬又一個一個升天堂，上面打貪又冇咗大陸豪客，第時都唔好叫「富豪飯堂」，都冇富豪去咯。反而福臨門後街間茶記仲「富豪」呀，標榜重口味添！嗰日走去灣仔譚臣道間茶餐廳整碗牛腩撈麵，呢間嘢同新地「豪宅化」啲樓價不遑多讓，夠膽死賣二百蚊一樽辣椒油o架，我同個企枱講：「嘩，你樽辣椒油仲貴過福臨門賣嗰樽喎，人哋都係一嚿水。」哈，條友仲話：「係呀，遲啲加價添呀！」條友想挑起炒家胃口，等人以為有水位，等如Grand YOHO啲客，一次過買兩、三個單位。好，我即刻就「大」佢：「你係咪呀，加價？係我就搵定架貨van嚟掃貨，買番幾十樽派街坊。」吖，佢當堂縮窒：「要問吓事頭婆先。」咪係，你間茶餐廳喺福臨門（灣仔）後面條街，仲賣得貴過人！唔好話我唔醒你，去福臨門買辣椒油，記得話係楊生要開嗰隻，先至係「手攪」o架！ 翠華部署埋身肉搏 剛獲委任為翠華控股（1314）公司秘書的郭兆文十分興奮，鍊贏咗東亞正放售中的卓佳，攞到翠華呢單生意，翠華搵得郭兆文，估計都會好似東亞股東咁，打一場埋身肉搏戰。郭兆文此君並非「秘書」咁簡單，而係肯擸起衫袖出面同老細「劈」，六年前國浩與東亞的收購攻防戰期間，郭氏連「阿媽」都出埋，由其持有東亞少量股份的母親推選他擔任東亞非執董，當時郭兆文話希望改善東亞企業管治，口吻同早排狙擊東亞的對沖基金Elliot差不多，後來郭兆文更以個人名義買入十股東亞，打算推舉國浩的郭令燦同郭令海入東亞董事局，雖然兩劑都未能順利入「局」，鎩羽而歸，但郭兆文算做響咗朵，翠華股東已紮行馬準備埋身肉搏。 | ||||