|
||||||
|
N先生係老派生意人，早已上岸，退休仍做生意，只為過吓日辰，維持對外聯繫，等精神有所寄託而已，況且一旦退休，日日打波，好容易思維慢半拍嘅啫。早年N先生在體育界出錢出力，用錢冇計，從不問回報，事實上亦從來冇回報，在香港，搞體育要有付出、奉獻嘅精神先至得。 跑 完打吡翌日，N先生請一班老友到鏞記四樓，叫齊鏞記小吃之寶如豬丸、豬心蒂、豬肚、海參、鵝紅、清湯腩、雲霧肉，鵝乸仔（未生蛋之鵝乸）、雲吞麪等等，味 味精彩，食到大家捧肚離開。左丁山特登由鏞記行到去恒生銀行過IFC，再由IFC行返去中建大廈，行咗二十分鐘以助消化。印刷L話：「我都嚟過鏞記唔少 次，點解今日仲係食到新款菜式嘅？」哦，呢啲小吃，menu未必有嘅，N先生笑云：「鏞記係一間地鋪嗰陣，我已經幫襯o架嘞。」 馬主N在 座，講起打吡大戰，「軍事攻略」苦拼不敵「雄心威龍」，認為千萬金元買馬難贏一隻平價自購新馬，冇得好講，馬主最緊要有運。講起呢樣，馬主N就嘆冇運，佢 嘅賽馬團體有一隻新馬，血統不俗，但第一次出賽就出閘時扭傷背部，後來驗出盆骨受傷，唔知幾時先至好得番，馬主N怏怏不樂，養馬就是這樣的，人算總係不如 天算。奈何！
近期話題離不開日本地震海嘯與核電危機，溫總理講咗暫停核電項目之後兩日，中國核電界就有不同意見，似乎與溫 總對着幹，中國好興總經理說了才算，核電係大項目，大投資，點可以俾佢停吖。江總乖孫江志成可以在哈佛畢業，在香港與人合夥打正旗號搞私募基金搵真銀啫， 其他人搵銀要講路數。N先生講：「以我咁多年經歷，香港係做生意最廉潔嘅地方，絕無官商勾結。在任何其他地方，商人都有方法搞掂，在香港一定唔得。中國貪 污呀，梗係有啦，但並唔係最嚴重嘅國家。」中國係有貪污，但未至到入境時，移民官明目張膽咁要美元「過關費」，N先生在東歐某國入境，攞落地簽證，發證者 竟係一間旅行社，收「代支」，俾完錢就可以不經檢查，由特別通道直出接機室，快夾妥，令N先生大開眼界！ |
||||||