📖 ZKIZ Archives

梁振英政府為了壓抑樓市，腦筋不停轉動，成日掛住諗一啲辣招，但講番轉頭，梁振英未上台前，好多分析師與左丁山都錯誤地以為梁振英會不理豪宅呢類與普羅大眾無關嘅天價，會集中力量增加細樓、低價樓供應，令中下樓宇難以加價，令一般人容易啲置業。誰知能吏害人，不知那一位軍師想出一招「五千白表居屋免補地價」，以為討好小市民，咁就觸發咗居屋價大升浪，跟住細單位大升溫（沙田第一城係最佳例子），再引發一連串升浪，於是梁政府手忙腳亂，繼去年八月三十日提出「梁十招」，九月十四日金管局收緊按揭，十月二十六日推出SSD、BSD之後，今年二月二十二日推出印花稅加倍徵收，工商樓宇不可豁免。
前三招都唔掂，中原城市領先指數由2012年7月1日嘅105.46升至2013年2月17日嘅121.58，八個月升咗15.28%，有此往績，第四招（印花稅加倍）是否可以奏效，疑問好大。有咗咁多招數之後，只有首次置業人士買200萬元以下單位，先至完全不受影響，以後其他人買樓嘅交易成本增加好多，申請退稅要辦手續及有時間差，好鬼煩，一言以蔽之，就係特區政府唔想你買樓！唔怪得香港大學地產學系嘅姚松炎在「明報」撰文話：「試想若果今次天水圍天榮站上蓋項目沒有流標，中標的財團以當時的房產稅項和發展限制來估價，然後同意支付標書所指定的補地價金額，政府卻在穩收該補價後，推出新房產稅項和新發展限制，令所餘利潤大幅下降，這豈不是一場騙局？一如盜跖所言？」
梁振英政府隨時改變印花稅，用作調控樓市工具，為地產市場帶來高度不穩定性，對置業人士及投資者構成傷害。我地成班老友吃午飯時為此辯論不休，有一位出題目：「樓價下跌三成，梁特首民望提升三成，試討論之」，呢條係好好嘅通識教育題目，中學老師不妨試吓。樓價跌，梁振英是否變得受市民歡迎？真難講。其實如果真係有心砌跌樓價，好易啫，只要宣佈兩件事，樓價工商舖位價必然下跌：（一）梁特首咁威，可以立即宣佈，禁止所有自由行遊客來港，內地旅客來港，恢復2002年狀態；（二）宣佈解除聯繫匯率，金管局即時將港元利率提升。梁振英敢唔敢？如果佢唔敢嘅話，香港樓市仍有水泡鈎住，頂多浮浮沉沉，難以下沉，梁先生想民望上升，冇咁易。

營業總監C以前住在西貢，後因揸車返工路程遙遠，東隧又愈來愈塞車，於是搬去鰂魚涌租住一個單位，呢日同佢吃午飯，見佢咳個不停，但又唔見有痰，顯然係氣管有事。總監C話：「咳咗成個月都唔好，睇完中醫睇西醫，跟住又睇中醫，吃乜藥都唔掂，慘也。」咁又是否城市空氣有關，佢話：「我都有懷疑㗎，我朝早六點鐘就起身拖狗行街，七點幾返工，朝早屋邨內校車密佈，噴出好多死氣及汽油味，我聞到就咳。返到屋企同狗仔抹腳，先用濕紙巾、後用濕布，抹三次先至唔見咗啲黑色。以前住喺西貢，拖完狗行街，抹腳一次就得嘞，鰂魚涌啲街道係污糟啲嘅。」
咁講法，不如搬返西貢。總監C話：「正有此意，下半年租約一滿，為自己，為隻狗，我就搬返鄉下村屋，以漫長返工塞車時間換取新鮮空氣及乾淨道路！」
香港幾難搵到一個安樂窩，經常係得一樣唔得一樣，魚與熊掌不可兼得，住在鄉郊或住在市區，要睇個人偏好。傾傾吓，有一位夥計走過嚟與總監C打招呼，原來佢以前在鰂魚涌一間日本餐廳工作，啱啱轉過來呢間「唐人館」，轉工好似話咁易。此亦唔奇，上星期同一位業界人士傾偈，佢話一級廚師、星級廚師非常搶手，大酒店好似有實力搶人，但同時大酒店嘅廚師亦會隨時跳槽出外創業開餐廳，故此人工搶到十幾萬以上，前所未見。以此求證餐廳R，佢話只有少數米芝蓮星級廚師先至咁巴閉啫，一般廚師人工冇咁高，但月薪二萬至五萬之間嘅級數，轉工似音樂椅，轉個不停，佢自己都因為缺人而頭昏腦脹，HR俾佢逼得失失慌，話有人應徵嘞，不如請啦，餐廳R要自己見一見，一見之下，方知唯一一位應徵者係一位中年OL，因為厭倦寫字樓工作，自己又鍾意在家煮嘢食，故此寧願減薪，話要辭工嚟做廚師。餐廳R為之啼笑皆非，職業廚師嘅工作量與複雜性點可以同在家煮飯仔相比呀？點請得落手？但HR話：「冇其他應徵者咯噃。」餐廳R為之踢晒腳，短期內不知如何是好。