| ||||||
「所謂的大時代，不過就是一個選擇，或去，或留。」《一代宗師》的宮二說。 既然中共已伸出掌控傳媒的魔爪、《信報》老闆李澤楷已投誠，負責「獨眼香江」政治評論版的副總編輯游清源，已沒有留下來的理由，本月初他連同三個下屬，全組集體請辭。 擺脫被閹割的枷鎖，不必再賣新老總郭艷明的賬，他接受本刊專訪時豁出去，大談創立多媒體時事平台的大計，「係玩breaking views，可能會有電台節目，甚至係電視節目，一年大約五、六百萬，有啲投資者初步已有接觸，希望明年一月開波。」 年逾五十，游清源已見自己、見天地，還未見眾生。新媒體是成是敗，游清源沒有多想，反正只有眼前路，沒有身後身。 由「小小超」李澤楷○六年購入《信報》八成股份，到梁振英去年上任後陸續爆出中聯辦干預《信報》編採方針，及至今年八月底郭艷明上場、「獨眼」稿件被「河蟹」，游清源已對《信報》慢慢死心。 本月初游清源拉隊走人，下月一日他將離開埋頭苦幹八年多的地方，只留下空櫈，「聽講『獨眼』會由（新聞總監）楊建興接手，老總都透露『獨眼』會繼續做o架。我仲好善意咁同老總講，如果一個月唔夠，我哋可以等佢搵夠人先走。」郭艷明怎回答？「佢話得o架喇，一個月夠o架喇。我真係好想好嚟好去，呢個環境最好大家開心見誠傾嚇，至於佢哋將會點做，我真係唔知，亦唔到我講。不過我喺《信報》嘅專欄（『頭文字Y'），暫時會繼續寫。」 《信報》不應賣武 專訪中，游清源沒說過《信報》中人半句壞話，但道不同不相為謀的味道，還是嗅得出。「郭小姐有佢自己要做嘅嘢，我會尊重，但未必係我想做嘅嘢。佢可能想將《信報》進一步通俗化，佢覺得出路係咁，但我覺得《信報》係精英報紙，唔需要好高銷量。以前林太（駱友梅）講落，佢唔會教人買邊隻股票，呢啲留番俾《經濟日報》做。我哋係少林寺主持，冇理由做埋（海盜）巨鯨幫、海沙幫嘅嘢。大師係唔需要出嚟賣武，《信報》係要做一代宗師，唔係龍虎武師。」歸根結底，中共把新聞當作是宣傳大國崛起的工具，回歸後，傳媒老闆紛紛向中共低頭。「《信報》，姓李嘅。李澤楷先生有好多生意，其中一個戰略性嘅生意，就係之前盈科數碼動力併吞香港電訊，中國有關方面出咗好多力。佢係一個咁有野心、咁有魄力嘅企業家，佢梗係好想全球都有佢嘅生意，中國係最多商機，呢個毋須否認。」一條腰帶一道氣。既然商人辦報會衍生有形或無形的壓力，主流傳媒的發揮空間有限，游清源索性另謀發展，讓「文人辦報」復興過來，「你問我呢，我都欷歔嘅……今次係一個契機，令我諗番究竟自己適合做啲乜嘢，唯有文人辦報先有機會講真話，同埋有高質素嘅分析評論，呢個原則唔可以妥協，我情願搵少啲、辛苦啲。」 創多媒體平台 一年多前，游清源已在「大班」鄭經翰創辦的網台DBC及現在的D100開咪，以嬉笑怒罵的方式評時政，他的節目《怪獸直播室》在facebook有逾一萬四千個like，是D100最受歡迎的節目，未來亦可能有進一步合作空間，「我其實比較鍾意做啟蒙嘅嘢，新一代係ready for it。」吸取網台經驗，他的鴻圖大計亦已有雛形，初步計劃發展多媒體平台，利用網上空間打造互動新聞平台，最理想是三個下屬一齊過檔，繼續以紀曉風式的文章「賣views」，亦可能加插電台及電視節目吸客，投資及收入來源則參考主場新聞和D100，「有數得計，十個人，每人月薪平均三萬蚊，計埋雙糧一年約四百萬，燈油火蠟加埋約五、六百萬，即係一個月要使五十萬。「投資者可以搵，但先決條件係佢唔可以左右我哋編採方向。呢啲投資者唔係冇，有啲已初步有接觸，佢可能係一個唔願意出名但有啲錢嘅donor，可能每人一百幾廿萬，唔係多，但佢哋樂觀其成。」 自知得罪人多 另一「水喉」則是聽眾和讀者。「香港甚至海外，有唔少人願意俾少少錢支持良心媒體。以D100為例，基本年費六百蚊，特別會員五千蚊，超級會員一萬蚊，但佢哋冇乜著數。大班做得幾成功，佢依家只行會員制，淨會費都有二千幾萬收入，唔係講笑。「我當我收六百蚊，有一萬個會員，就有六百萬，五千個，都有三百萬，人少少夠維皮。第一批投資唔使好多錢，可能搵個千幾二千呎嘅工廠大廈都夠。」他亦打算邀請名人撰文，「可能都會有類似練乙錚、林行止先生嘅文」，讀者須付較高會費才可拜讀文章，「呢度砌啲，嗰度砌啲，係辛苦嘅，係揼石仔嘅嘢，但我情願係咁，去換番多啲自由。」事實上，游清源在九十年代中期至二千年代初亦曾開舖賣外國雜誌、開設出版社等，均失意離場，如今「獨眼」被整治、他離開《信報》，不少行內人「食花生等睇戲」，他卻不以為然，「抵我死嘛？Steve Jobs都係咁樣俾人話，肥佬黎到依家都俾人話啦！一啲人如果喺你心目中唔重要，佢講到幾狠毒、幾惡毒都唔重要。尤其依家習慣咗網絡生態，你一日爆十次血管都得。」游清源自知是不少人眼中的「仆街」，他有如下解釋：「可能係我入世未深，或者一路都唔深，我唔係好避忌去笑人。我唔係話自己好叻，但我係好努力去叻，我潛意識對一啲唔係好努力嘅人，唔係好接受。我近年已經mellow（順和）咗好多o架喇老實講。我以前好怕蠢人，依家唔係好介意。可能係把口衰，得罪唔少人，我都知。」文人辦報精神，游清源唸唸不忘，雖未知會否有迴響，但憑一口氣，點一盞燈，有燈，就有人。 林行止：倉廩足而鹿獨立 游清源這個名字，原來又關林太（駱友梅）事。「八九年就嚟畢業，我去《信報》寫專欄。林太覺得我真名袁耀清好俗，炫耀咩啫，仲要炫耀清高，好矛盾o架嘛！佢叫我諗個筆名，臨時臨急諗唔到，咪將個英文名玩轉，Yau Ching Yuen，不如全部三點水啦，就變成游清源。」下月離開《信報》後，游清源先去台灣旅行，期望十二月多媒體計劃會有定案，明年一月正式開工。突然另起爐灶，游清源的「契媽」林太駱友梅有否指點迷津？「林生林太背後冇資金支持。我積蓄唔多，可以用到一年半載，但我唔會抖咁耐。今次離開《信報》，in fact我係見過佢，佢提點我好多嘢，『唔好諗住抖一排先呀，你要養家o架！』「林生就話要經濟獨立，人先可以獨立，用我嘅語言講，就係我未上岸，未儲夠骨氣錢。骨氣錢就係你想炒你老闆時可以二話不說咁炒佢，嗰嚇都幾爽o架！」你算不算是炒老闆？「咁又唔好咁講，我希望我喺另一個空間更揮灑自如，明知眾生度不盡，偏向紅塵恆拋心，所有人瞓曬，你wake up一兩個都好吖，雖然最新版本係，你永遠唔可能叫醒一個裝睡嘅人！唉！儘量做啦！」 | ||||||