| ||||||
近日為「淫照事件」作供及新片《神鎗手》宣傳而再度活躍的陳冠希,繼月中接到子彈恐嚇信後,其姊陳見飛於本週一(三月二十三日),主動踢爆多年來常被入稟追數,債台高築的父親陳澤民,將在今個星期申請破產。 金融海嘯令銀行收緊信貸,陳澤民被銀行多次入稟追近三千萬欠債,加上開賭廳、炒燶股及炒燶樓而未被公開追收的欠款,估計過億,令他走投無路。 至於多年來一直有經濟支持父親的Edison,去年爆出「淫照事件」令工作收入近乎零,對父親申請破產一事,他非常無奈:我真係撐唔住!入行還債 陳冠希○○年出道以千萬身價簽約英皇娛樂,被打造為富家子弟形象,全身名牌,出入有司機同名車接送,租住羅便臣道三千呎豪宅,但其時父親陳澤民的公司已開始欠債,靠數冚數撐住。 「陳澤民當時係上市公司主席(駿雷國際現已改名為海王國際),搞企業融資,但其實只係表面風光;到Edison入行,頭三年就拍咗十幾部戲,有能力幫老豆,嗰陣陳澤民都好多搞作,諗住翻身。」知情者說。 其後,陳澤民多次帶住已離婚的老婆、Edison及兩女兒出席公司與其他中資機構合作的記者會造勢,可惜全部合作最後都不了了之,五年內公司多次進行上落過億的集資、配售新股及供股,最終仍是捱不住,陳澤民更於○六年六月辭去前駿雷國際執行董事兼董事會主席職務。 曾擁有多部名車包括法拉利(左圖)的陳澤民現仍持有四部座駕。出入的Jaguar房車,由馬姓友人持有;其餘兩部分別是紅色(右圖)及灰黑色勞斯萊斯,以及灰色平治S320L,全是其名下持有,破產後有可能被變賣還債。 欠債纍纍 陳澤民過去炒燶樓蝕近三千萬,炒燶股票、搞賭廳及在北京開經理人公司等生意亦瓣瓣蝕,多年來被入稟追債三千萬,相信只是冰山一角。 1/03前駿雷國際遭中環中心入稟追討租金、雜費連利息。$97萬 5/03前駿雷國際遭朗盈證券入稟追討孖展欠賬,但後來原訴撤銷訴訟。$648萬 10/03Shine Faith Limited入稟向陳澤民追討欠款及利息。$300萬 9/04被指開出空頭支票,遭 Karfoon Limited入稟索償。$100萬 同月前駿雷國際被指為附屬公司Great Well Global Ltd.做擔保人租用中環中心單位,惟對方違反租約,被The Center Ltd.入稟追討。$320萬 7/08陳擔任董事及貸款擔保人的Skillion Properties Ltd.(陳用作炒樓),被中銀(香港)入稟高院追欠款。$1,938萬 賣衫賺到 與 此同時,Edison因不與英皇續約而被雪藏,及後轉會東亞娛樂,Edison得新老闆林建岳泵水支持,開設多媒體公司Clot Media Division做CEO,除簽約農夫為旗下藝人,Clot品牌分別與Neighborhood、A Bathing Ape、Levi's及Nike等名牌合作出潮服,旗下的Juice分店更到上海開鋪。 Edison有生意人頭腦,可惜其父的財政危機卻愈 來愈嚴重,尤其是○二年仙股除牌風暴,令陳澤民手頭股份大縮水,賬面唔見一億;公司(前駿雷國際)○三年被入稟追收欠租,並遭證券公司入稟追討孖展欠 賬;○四年,又曾開出空頭支票遭入稟索償,去年他任董事及貸款擔保人的Skillion Properties Ltd.亦遭中銀(香港)入稟追數。 公司資不抵債,投資亦同告失利。由八九年至今炒賣六個單位,其中西環單位變銀主盤。 於九六至九七年樓市高峰期購入四個灣仔會景閣單位,亦於○二年全部出售,當中兩賺兩蝕,炒樓合共蝕近三千萬。 一味靠充 陳冠希出道以來,衣食住行樣樣豪,但老豆陳澤民十個煲得七個蓋,終於破產收場。 衣:西裝骨骨的陳澤民,衣著打扮離不開LV、Versace;而陳冠希自出道亦一身潮爆打扮,由早期的bathing ape、限量版Nike波鞋,到近日以comme des garcons恤衫在新加坡接受電視台訪問,件件唔貴唔著。 食:好景時,陳澤民屋企僱有四位廚師,經常宴請親朋。 住:陳冠希入行後,陳澤民以八萬租住羅便臣道三千呎大屋,作為一家三口的安樂窩,及後陳冠希越住越豪,以十七萬租住山頂馬己仙峽道,而老豆亦以超過十萬租住加多利山獨立屋。 行:高峰期陳澤民有九架靚車,包括兩部勞斯萊斯、兩部Benz、一架寶馬Z3及法拉利,車牌全是「369」,單是車牌費用已經過百萬。 玩:上等人自然要有上等人玩意,陳澤民先後在港澳、星馬及英國飼養馬匹,每匹馬每月平均使費高達百二萬,不過○一年其愛駒「駿驊」退役後,他便無再買馬。 點都死頂 十煲七蓋,陳澤民○六年辭退上市公司職銜,自此甚少在金融界露面,生活變得低調的他自稱在內地及美國做生意,有指他在澳門經營的賭廳生意,去年亦告結束。 「其實佢(陳澤民)一路都有還錢,亦有同銀行研究點樣重組債務,但自從金融海嘯,銀行全面性逼倉,好多做生意嘅人都唔掂。」知情者說。 頭頭碰着黑,Edison去年初爆出「淫照事件」,演藝工作全面停頓,兩父子同陷困境,陳澤民終頂唔住申請破產。 「Edison 舊年無做嘢收入少,幫唔到老豆,佢覺得係因為自己做錯(淫照事件)牽連太大。就算有新戲上又接到恐嚇,隨時會影響到傾緊嘅工作都無埋。而家佢老豆破 產,Edison好自責,但自己現階段真係撐唔住,但佢話點都會盡力搞好時裝生意,頂住過呢關!」Edison友人說。 生活無變 除 了下月初會到新加坡出席《神鎗手》首映禮,Edison亦正與在東南亞各地有近百間分店、有意於上海開店的Carl's Jr漢堡包店洽談做代言人。對此,Edison所屬的東亞發言人說:「之前已經擔心子彈恐嚇會有影響,點都好,我哋會努力幫佢傾嘢。(會否全面復出?)暫 時未有呢個計劃,只係傾緊海外工作。」 至於陳澤民,在週一晚坐住司機駕駛的銀色Jaguar座駕,離開加多利山寓所到銅鑼灣利苑晚膳。面臨破產,生活依舊的他接受訪問時說:「希望我呢個決定唔會影響到我個仔,作為一個父親,我已經將實情告知仔女, 相信若然仔女有能力,應該會照顧我日後嘅生活。」 做賭起家 與 妻子離婚多年、現年五十六歲的陳澤民除了兒子陳冠希,還有兩女(麗華及見飛),在加拿大讀商業管理的他,曾做過廣告燈箱及茶葉生意,後來靠經營澳門賭廳起 家。九十年代初,陳澤民曾任「街市偉」(吳偉)財務顧問,後返港發展,並於九三年開設金融公司,大量投資物業,後因樓市爆煲,身家大縮水。 ○一年,陳澤民購入上市公司德智股權,後改名為駿雷集團,出任主席,主要經營電器生產及證券買賣等生意。任職主席期間,他又成立了經理人公司「北京世紀元素」,簽下黃曉明及閻清等藝人。○六年,陳澤民辭去主席一職,轉到內地從商,更有傳他因在澳門賭廳投資失利而欠下大量街數。 |
2009-05-26 AppleDaily
| ||||||
大 行報告錦上添花與落井下石嘅威力,大家唔難耳聞目睹,問題係呢條咁十拿九穩嘅財路係點樣鋪成,就係用散戶血汗錢層層堆砌而成。本來大行報告內容分析理據及 財務模型,例如DDM、DCF及WACC等等,係重要盈利預測工具,初入行寫分析報告,真係當佢係寶,睇番十幾年前嘅大行報告,明顯有份量兼正經好多,當 年嘅分析員睇每一間公司唔只實地考察,仲會加入好多行業分析比較數據。今天大部份人睇報告,只側重於目標價,題目少有以往語帶雙關之幽默感,多數單刀直 入,例如「大美人」新鮮滾熱辣嘅地產股報告,題目就話明新地(016)係「地產發展股嘅Prada」,既然題目一點就明,睇埋印於當眼處之目標價97蚊, 你就會有如條件反射般死跟。部份大行嘅研究報告,寫到明只供內部參考,冇理由咁快就唱通街,但係越話保密,就越顯得資料矜貴。 搭順風車要識落車 近 年最奇怪現象就係市場出現先知式預言股價報告,基本分析內容與理據輕描淡寫甚至欠奉,唔知係唔係趕住攞生意,唔得閒堆砌。投行打開門做生意,最緊要係班客 肯俾你牽住鼻子走。班客知道自己報告睇先,明知市場短期表現講情緒而非理性,明知大部份呢類報告會快速自動流落街頭,甚至被媒體廣泛報道,製造市場情緒指 標,即係話自己作為大行客戶,每每捷足先登,後面有人護航,自然會跟住報告買。至於散戶,當你見到幾家主要大行不約而同調升內銀股、內房股或本地地產股、 收租股目標價後,股價如有神助,你話情緒會唔會不被影響?於是報告就產生「自我完成」現象。究竟分析員係唔係真睇好樓市是另外一回事,大家都係做番場大龍 鳳啫,將來你唔識落車輸番出去,都唔可以怪佢哋,皆因願者上釣,冇人迫你跟佢買。可能下個星期佢哋又不約而同睇淡同一個板塊,大家都係睇住資金做嘢,搭得 順風車,真係冇數得計,唔怪得連分析員都懶得去計,整個確信買入、沽出,或者搞吓評級升降,搞掂就出街。胡孟青 | ||||||
Alcatel-Lucent (ALU)高追鳥,呢一刻仲插緊接近9﹪
如果,呢排嘅急升係因為speculate nokia (NOK) 會買ALU,我會轉VIEW,唔會買或者唔會買咁多。
唔知佢今日插得畀人勁係咪因為佢個裁員計劃,全球要裁一萬人。(Alcatel-Lucent to Reduce 10,000 Jobs as Losses Mount)
我個人LONG咗ALU可能有BIASE啦,但係我覺得裁人對公司係好事喎。佢話裁都係2G/3G嘅部門,落後就剪,一次過痛好過半死不活。壞處咪又要畀錢做restructuring,咁要畀就唔該一次過畀曬佢,股價要重新上路就一定要放手一搏,來個大整頓之後先可以重新開始,失敗咪又跌返1蚊,依家3.50,但成功嘅話,唔好講重返高峰(試過85蚊以上⋯⋯),高峰嘅10分1都8.50啦。
ALU依家重點係去返LTE加雲端,仲有佢搞埋海底電纜,我無乜研究,但聽落都好似好勁咁⋯⋯ANYWAY,ALU咁慘主要係因為被華為等強勁中國對手打到無咗好多市場,華為PLAN咗嘅R﹠D已經多過歐洲啲對手,曾經睇過有網友分享,中國工程師平過西方國家咁多,3,4個中國工程師鬥你一個鬼佬,你點夠佢鍊?依家仲要燒錢多過你,分分鐘係5個鬥你1個。
集中火力,攻有前景嘅市場,資源集中嘅話,如果從細分領域睇,就未必係5個鬥1個。
智能手機爆發,的確為呢尐網路基建設備製造商提供好大嘅商機。市場係有,個餅應會繼續大落去,搶到就你驘。ALU呢尐前朝皇者,我相信如果可以搵返自己條路,有大把遺產畀佢可以做到一尐唔係三幾年就做到嘅事,有尐好勁嘅產品,其實係幾樣嘢深耕到一個程度再整合一齊先做得到,仲有係科技嘢唔做先行者就好易踩到人地專利。如果唔肯去擺脫過去,就會好似KODAK柯達,呢間公司係發明數碼相機嘅廠商,但最後競敗在自己開發嘅產品手上。
可能輸到傻咗,吹水吹到唔記得要講乜。
ALU其實在我心目中,佢似Sony。之前有過光輝歲月,又係架構好大,但業績長期唔好,市值跌剩幾分之一,但係背後嘅實力又未必如股價般咁差。以技術實力,真係山大斬埋有柴,SONY咁計,佢地呢幾年嘅影像事業其實搞得好好,手機用嘅SENSOR佢地係全球銷量最高,iphone 5S都用佢。但可惜呢尐公司個通病係搞得太大,你賺返嚟都唔夠某尐部門去蝕。一旦「止蝕」咗呢尐部門,業績將會爆發。
正當小米手機估值去到10b美元,ALU,百年老店,8.5b(當然外加幾b負債同埋一個蝕錢業務,呢個先最大鑊)。諗到呢到,忽然有尐感嘆。但我好明白條數唔可以咁計,尤其係我係「炒」股票而唔係「投資」股票嘅人。(其實我覺得好多炒股嘅人嘅FA底,比起成日開口埋口價值投資嘅人勁好多⋯⋯睇下雪球班高手,要FA去到佢地個程度,我真係諗唔到點追上去)
老實講,ALU我係見個圖吸引,又有故事講,我先衝入去。4G LTE加雲端,就係新CEO個THE SHIFT PLAN所講嘅嘢。覺得吸引,就下註。FA嘢要吹,吹到下年都未吹完。
ALU呢尐過氣明星,一旦有新故事可以講,想像空間極大。我相信有尐嘢,係要呢個規模嘅公司先做到。無幻想空間嘅,1B市值都唔買。有嘅話,100B都可以繼續吹,何況,ALU只係一間8.5b嘅公司。佢去年12月headcount 72,000,我當佢已經cut人,再加埋2015年要減1萬人嘅plan,點計都有5萬幾人。一間5萬幾人嘅公司,如果可以重拾正軌,動能一定好勁好勁。
ALU係其中一隻TURNAROUND STORY,SNE都是,NOK都是。
科技公司,等嘅可能係一個大賣嘅產品。做基建嘅ALU都唔例外。睇下佢可唔可以出到個「殺手級」應用喇。
ALU,爭氣吧。無買中興通訊(763)都嚟支持你架。(其實係咪應該買埋763?)
曾蔭權被判監二十個月,話重唔重,話輕唔輕,對一個七十幾歲老人家嚟講,呢個判刑都唔易捱,除非佢得到醫生證明,可以長期喺醫院服刑,咁另計喇。只不過,曾蔭權案有好多手尾係未完嘅,其中一個未完嘅手尾,就係 東亞銀行 會唔會被監管機構照肺,甚至引嚟外國反洗黑錢組織嘅註意,搞到生意難撈。
其實已經有兩單高官相關嘅公職人員行為失當案,係同 東亞銀行 有關,一單係許仕仁案,一單係曾蔭權案,許仕仁案涉及果堆無厘頭無抵押貸款,隨住許仕仁坐監梗係無得還,究竟果筆貸款係點搞出嚟至得,跟住,曾蔭權案啲錢銀嘢,係經 東亞銀行 嘅,連以前做過老廉嘅林卓廷議員都問老廉,點解唔係跟佢以前做調查員果陣嘅規矩做嘢,連李國寶都傳召。隨時喺曾蔭權案重審果陣, 東亞銀行 有更多人甚至高層要上庭作供。
依家世界各國監管機構,對果啲經常處理黑錢,例如政治人物啲唔乾淨錢嘅銀行好敏感,HSBC係咁被人查,係咁被人罰,都係因為呢啲麻煩客戶,搞到依家大家喺HSBC開戶簡直難過登天,仲要依家HSBC搞到咁嚴,都仲發現有戶口懷疑同IS恐怖分子有關,又俾人查過。HSBC都搞成咁,如果香港監管機構對 東亞銀行 一啲表示都無,恐怕都好難同世界其他國家嘅監管機構交代。話雖 東亞銀行 主要業務都集中喺香港同中國,但係反洗黑錢呢家嘢,一向都係全球進行,標準亦都全球一致,唔好唔記得,雖然中國唔係全球反洗黑錢組織埃格蒙特集團(The Egmont Group of Financial Intelligence Units)嘅成員,但香港一直都係,其他埃格蒙特集團成員國,好難當 東亞銀行 喺兩單案嘅作為無到喎。
監管機構如果想認真查 東亞銀行 ,唔該快啲查咗佢,好過搞到外國啲監管機構睇到 東亞銀行 實曬,搞乜業務都麻煩多多,依家 東亞銀行 嘅業務都唔叫靚仔,如果早啲查,至少投資者早啲決定玩唔玩落去。只不過,以近年HSBC同德意誌銀行嘅濕滯經驗嚟睇, 東亞銀行 呢類連案件都涉及啲大案嘅銀行,避之則吉係好一啲,因為監管風險無理由由投資者孭嘅。
讀書札記170612
不當行為31冇可能Work嘅嘢,又真係Work喎!
朝日執筆
除了經典的「股權溢價之謎」以外,「股票市場」(或整個「證券市場」)的「高交易量」,其實也是一個非常值得探討的「謎」!
也許是對「高交易量」太過習以為常,以致於很少人曾經仔細思考過,一個「理性世界」的「效率市場」中,在沒有出現「新資訊」的情況下,證券的交易量應該是極低,甚至是趨近零的。這個「理性推論」被某些經濟學家戲稱為「Groucho Marx’s Theorem」。源於美國著名諧星Julius Henry Marx(藝名「Groucho Marx」)的名句:
“I won’t belong to any organization that would have me as a member!”
「如果有個(讀書)會(cheap到)連我都肯收做會員嘅,我梗唔會加入呀!」
在經濟學的語境中,這句就變成:
「沒有任何理性主體,會願意買進其他理性主體願意賣出的股票!」
與蘋果、橙等「消費品」不同,除非你對某股票有很特殊的「情意結」,否則股票本身並不能對人產生效用。正如$100對所有人的價值都是$100一樣,一股「價值$100的股票」對所有人的價值都應該是「$100」。
情境31a:阿才與阿俊兩位頂級基金經理,在老蘭酒吧不期而遇,飲返杯吹下水自是不免。言談間,阿才說起自己剛打算買一百手「太陽能電筒」;阿俊驚喜說「乜咁啱嘅?」原來他正巧想賣出一百手「太陽能電筒」,不如大家這樣交易好了。他們各自回家後,阿才心中盤算:「阿俊都同我一樣咁醒架喎,點解佢會肯賣出股票呢?唔通……」另一方面,阿俊亦會想:「計正阿才睇股炒股功力都同我不相上下,點解佢會肯買入股票架呢?唔通……」結果,交易取消!
在「效率市場」中,每隻股票都已處於「正確價格」,且未來也將繼續維持在「正確價格」。如果沒有新資訊,市場上又早已經沒有「蛤乸」了,為什麼還要交易呢?
誠然,法瑪大師Eugene Fama提出「效率市場假說Efficient-market Hypothesis」的「正經學術版」論文中,也提到「理性模型」其實也是容許「估值差異」的。然而,所有擁護「理性模型」的經濟學家,也不得不認同,美國股市這個由「5%理性菁英組成的(準)完全市場」中,每月的交易額達到總市值的5%,確實是「有點(出奇地)高」。
「過度自信」是一個不錯的解釋,只要阿才與阿俊二人都覺得自己「醒過對方」,自然就會成交愉快,甚至還有各自為「佔了一個笨實老友的便宜」而有點「良心不安/沾沾自喜」。不過,就算是「神仙過鐵橋」也有機會斷纜,從結果反推並非公平的判斷。因此是否「過度自信」,其實根本不可能「證實/偽」。
有沒有一些「科學」一點的解釋呢?Thaler引用了 康納曼和特維斯基的一項研究發現,作為對「金融市場何以未能成為(近乎沒有交易的)效率市場」的解釋依據。這是一個要求受測者憑手上資訊,逐一猜測一群學生各自GPA(0.0-4.0)的實驗。
情境31b1:第一批實驗對象,得知每名學生在整體GPA分布中,所處的「十分一組別」。即每名學生分別屬於「成績最好的10%」、「成績次好的10%」……「成績最差的10%」,並由此猜測該名學生實際的GPA。
情境31b2:第二批實驗對象,得知每名學生,在整體「幽默感測驗」分布中,所處的「十分一組別」。即每名學生分別屬於「幽默感最高的10%」、「幽默感次高的10%」……「幽默感最低的10%」,並由此猜測該名學生實際的GPA。
第一批受測者得到的,當然是非常有用的資訊。如果你知道 出木杉英才的成績是屬於「第一組別」,GPA就算沒有「爆4」也應該有3.7了。野比大雄的成績是「第十組別」,那麼猜1甚至以下也不算太過分吧!至於「幽默感」,與GPA就算真有關係,相信也不會太大吧!
既然「幽默感程度」是「無關訊息」(或學術一點的「(極)低相關度訊息」),那麼第二批受測者的所作出預測的分布,應該會集中在貼近該校整體學生平均GPA的水平。只有獲得「高度相關訊息」的第一批受測者,才會作出較為極端(極高或極低)的猜測。
圖表11顯示了兩批受測者的預測結果,竟然高度一致。即使只是知道學生的「幽默感」,受測者也一樣會作出的「極端」的預測。他們對「幽默感最高的10%」學生的預測,正好和另一批受測者對「成績最好的10%」學生的預測一樣。這只能說是實驗對象對「(極)低相關度訊息」(幽默感程度)作出「過度反應Over-reaction」了。就正如 朝日吃了蝦蟹會出「風癩(蕁麻疹)」一樣,身體對「本應不相幹」的刺激過敏了。
如果連「幾乎毫不相關的訊息」,也會讓人作出「過度反應」的話,那麼某些「看來好像相關的訊息」,例如「公司過去一段時間的業績」,對預測者不是更有「影響力」嗎?
身兼專業投資者及哥倫比亞大學教授的 格拉漢Benjamin Graham,在1949年出版了經典名著《智慧投資者The Intelligent Investor》。他提出的原理並不複雜,簡言之就是買入「公司市值低於公司內在價值」的「低本益比P/E」股票,然後「等佢升」!不錯,這就是「價值投資法Value Investing」!格拉漢由此奠定其「價值投資之父」的地位。格拉漢在哥倫比亞任教時的學生 巴菲特Warren Edward Buffett,把其恩師奉為一生的偶像,巴菲特的投資哲學、思考方向、基金管理模式,以至一切工作方法,幾乎都源自格拉漢!
根據第廿九集介紹的「效率市場假說」,「所有過去現在嘅嘢,現行股價反映曬架啦!」以公開的財務報表、經濟狀況,甚至政治形勢為基礎的「基本分析Fundamental Analysis」,自然也註定是徒勞無功的。因此,「價值投資法」應該是「冇可能Work嘅」!不過,格拉漢(還有他的高足巴菲特)卻告訴你:「真係Work架喎!」他在1973年修訂了自己在世時的最後一版的《智慧投資者》(後來仍有由其他人編輯的再版),總結了自己一生的「武功心法」。
他自1937年,買下了三十隻「杜指成份股」。然後,他把其中P/E最高的十隻股票編為「高檔組合」;P/E最低的十隻股票編為「低檔組合」。經過1937至1969超過三十年後,投資在「高檔組合」的$10,000,變成$25,300;投資在「低檔組合」的$10,000,變成$66,900。(如果全買三十隻股票,則會變成$44,000。)
「價值投資法」真係Work喎!
點解嘅?點解嘅?真係好打意呀!
31集關鍵字:
Groucho Marx’s Theorem
過高的交易量
GPA預測實驗
過度反應理論Over-reaction Theory
格拉漢Benjamin Graham:《智慧投資者The Intelligent Investor》
價值投資法Value Investing
《不當行為》Richard Thaler著/劉怡女 譯