利字當頭：人真係好短視 利世民
2008-09-24 AppleDaily
前 天鄰居思哲問世民︰「你覺唔覺得人真係好短視？」問題不易答。當然，思哲不是有心刁難世民，只不過「人是短視」這個前置，在過去幾千年來，一直被用來合理 化幾乎任何事情；由支持漢武的平準均輸，到政府禁制股票沽空交易，理由都是一樣︰「人嘛，都是短視的。」思哲直言覺得有點不妥，拿出來集思廣益，希望可以 辯出個所然來。
用作合理化事情
「人何止短視！人嘅念頭直情每分每秒都會變。佛家講嘅『剎那』，就係一念嘅生滅之間。其他唔 講，你記唔記得自己最初買股票，由落盤到抽牌改牌到成交，由信心爆棚到惶恐不安，不斷嘅內心掙扎。你話嘞，人點可能唔短視！」「如果人真係咁短視嘅 話……」思哲沒有預期到世民會有這個答法。「人真係咁短視又點？我知你想問乜。短視同毒奶粉抑或毒金融產品，又有乜嘢必然關係呢？短視等於搵快錢，聽落好 似好有邏輯。問題係，有騙徒都要有苦主肯落叠先得嘅。如果唔係資訊不對稱，又點會可以俾騙徒有機可乘先？再講，如果話人人都淨係識搵快錢，不如去搶仲直接 啦！」「近來連串嘅金融災難，加上毒奶粉事件，我哋企響自由經濟呢邊，好難理直氣壯。」思哲終於問到核心。「冇失誤嘅資本主義，就好似冇原罪嘅宗教 （Capitalism without failure is like religion without sin）。唔係話我幸災樂禍，只不過係大家對問題嘅解決方法有唔同睇法，我就唔信做官嘅就可以有長遠眼光，事實係全世界都係短視，不過市場糾正嘅機會點都 大過政府，速度快過政府。」「咁美國政府出手救金融機構，你點睇呢件事呢？」思哲問。「美國政府出手，真係有用咩？好似小布殊話齋，係起咗太多根本唔應該 起嘅樓。美國樓市只要繼續低沉落去，問題都唔會得到解決。大家都係香港人，都知道政府對樓市，係成事不足，敗事有餘。」
股市跌賴沽貨者
「咁 各國政府暫時禁止沽空交易，你又點睇？」思哲再問。「沽空，本來係鼓勵好友長揸嘅制度。假設你係長遠大好友，但個市近來又唔爭氣，有人問你借貨沽，其實皆 大歡喜。借貨博一鋪嘅，可以賺一筆；想長揸嘅，又可以賺一筆，分分鐘趁對手沽貨時，執番啲平貨；宏觀啲睇，沽貨嘅人始終要平倉，如果撒賴話沽空嘅人令個市 落，實在係搵人食死貓。今次人家暫時禁止沽空，係怕counter-party risk唔受控啫，千祈唔好亂諗嘢。」