公司越大 人事越複雜主播葉昇瓚：感恩仍無穿無爛
1 :
GS(14)@2015-10-14 02:54:54靚仔主播葉昇瓚（Daniel）喺無綫新聞部做咗3年多，上周五last day，將加盟財經公關公司PR Asia。葉昇瓚由空中少爺去到做新聞主播，再多啲時間照顧家人同4個月大嘅女，決定去做財經公關，11月頭就返新工，佢上周五已喺facebook留言：「終於來到最後一天，心中雖有萬般不捨，但路總是要前行。很高興能與廣大觀眾見面，多謝你們的支持。新聞報道完，有緣再見！」日前喺fb寫道：「最後工作天，不停地與各部門同事合照留念，經過一輪忙碌的發送，轉送和接收相片後，終於有時間安靜下來。」葉昇瓚回想起三年多前，膽戰心驚地進入電視城，皆因各人都對佢講萬事要小心，內裡係是非滿天下，公司越大，人事便越複雜，當時葉昇瓚話冇考慮到有幾危險就向前衝，感恩到現在佢都仍然無穿無爛，說到底做好自己本份就夠。葉昇瓚於fb續道：「還記得第一次報道新聞時正值颱風「杜蘇芮」襲港，打風人手不夠吧，我便要臨時頂上，晚上接個電話，簡單地填填肚便出發往公司了，完全沒有空閒時間去緊張第一晚的表現......幸運地，當晚表現亦不過不失，總算有個好開始。」葉昇瓚回想呢三年多時間裡，經歷咗無數嘅變遷，包括人手變動，節目改動，亦曾經歷過唔少大新聞，如衝擊立法會，反國教，佔中等，佢形容呢啲美好回憶必定銘記於心，昐望各人都努力為理想打併，追求卓越，或許將來能喺職場上再相見。
來源:
http://hk.apple.nextmedia.com/entertainment/art/20151013/19331401