【專題籽】政改奸人組 官唔落區我哋落
1 :
GS(14)@2015-06-15 00:55:29如非爭取真普選，假日在家瞓吓覺好過啦，烈日當空，難得他們頂得住，還很精靈。(左起：阿羊、Peter仔、阿龍)
【專題籽：港情港趣】之前高官落區宣傳政改，釀成公關災難騷，推高花生價格。高醫生小學雞式「講完」就閃人、飲茶阿姐妙語K.O.唔介意中央幫佢揀老婆的陳智思與人形垃圾筒，不過最迷離的要數政改三人組花車巡遊式落區，真係時運高先望到。仲有幾日，政改方案就於立法會表決，呢三個「奸人」盡力向市民解釋假普選之禍，腳踏實地落區派傳單。你話，邊個先係真心奸？尼采話好多真理都是以笑話形式講出來。特區政府先天缺乏幽默感，高官那種令人失笑的是低智鬧劇，不是笑話。「大專政改關注組」與「青年重奪未來」兩個社運組織成員醜化自己扮高官，組成政改奸人組，用假身份諷刺假普選，希望笑聲笑聲傳達真理。「我哋想用輕鬆方法拍片諷刺政事，吸引相對冇咁嚴肅的群眾。」他們模仿「有商有量」宣傳片，改對白照辦煮碗拍一條，好鬼抵死。
高巴坐巴士落區，你估你哋來觀光？
（上）殘廁源、行騙月娥、強國猿；（下）譚志源、林鄭月娥、袁國強。 圖片為短片截圖
早前他們仿效政府宣傳片，拍了一條設諷刺片，當中所有角色都由他們三人包辦，網民好like，大讚夠晒「小圈子」。圖片為短片截圖
這天晨早8點，他們已在化妝，準備變身殘廁源、行騙月娥及強國猿堅落區。眼都未開的我望見三人眼仔碌碌，慚愧又戥他們辛苦。讀緊大學的Peter仔笑時有酒渦，所以被委派扮林鄭。戴胸圍、着絲襪、笠假髮，穿高跟，佢話體會到女人之苦。要林鄭上身，佢話最緊要眼睛周圍碌，時不時一邊嘴角揚起奸笑，兼偶爾黑面。扮殘廁源的大學生阿羊一樣慘，黐頭套熱到核爆，扮完要撕番出來扯到皮都甩。重點是因為經費問題，濕夾臭的頭套要重用再重用！「佢哋個個都建議我剃頭，但我還是覺得有頭髮比較好，因為將來大把機會沒頭髮。」相對起來，扮演強國猿、做文職的阿龍較輕鬆，妝髮簡單，再戴副老花眼鏡就搞掂。三人化妝整頭搞足兩個幾鐘，真係殊不簡單。
Peter仔說扮林鄭才第一次化妝，但他皮膚敏感，每次都勁辛苦。
加深笑紋，戴埋假髮已經有六成似。
頭套焗住頭皮很熱，阿羊每次都流極多汗，最慘係頭套起碼要用三四次才會換新。
黐完頭套還要用粉底均勻顏色，以及用黑色筆畫番個地中海髮型，搞足半小時有多。
認真過班官
攝氏34度的正午，穿短袖衫的我幾乎熱到溶，着西裝及套裝的他們卻面不改容，在深水埗排檔揮手say hello派「2017靠佢死得」傳單。以為只有年輕人才支持他們，當日見到不少大嬸、阿叔都跟他們合照講加油。年輕的溫先生有看過他們的短片，他說：「咁曬咁熱，佢哋腳踏實地喺條街度行，嗰班官坐架旅遊巴，離地咁遠，佢哋真係辛苦好多。」A貨聆聽民意，真身只懂漠視，世道實在荒謬。他們落區會遇上支持市民，但同時也會被撐政府的人罵。當天就有一名檔主對他們講粗口。奴性強店主話「唔應該忤逆阿爺」、「我為甚麼要提名？台灣也有選舉，一樣選出大貪官。」、「叻人統治蠢人係應該」、「梁振英同曾蔭權都做得好好。」我表示膠都費事派。他們EQ高過高醫生好多，堅持耐心說道理，至對方開始無理取鬧才離開。阿龍說：「落區是為了引人注意，但如我哋沉唔住氣，同佢哋謾罵，效果就唔理想。」Peter仔補充：「我們關注組經常『洗樓』解釋政改，成日都接觸到藍絲市民，久經訓練，慣晒。」
街坊溫先生有看過他們的短片，還能說出他們的名字。他說離遠看三人扮相「幾似，冇得彈。」
有檔主要求合照，還替他們辛苦。
「政改奸人組」早前巧遇香港廣東社團總會，他們與巴士合照，車上長者誤當他們是真高官，竟然跟隨他們大叫：「2017，一定死得」，笑死人咩。圖片來自大專政改關注組facebook
問他們家人朋友有冇睇片兼笑到反轉，Peter仔笑謂：「同學都唔認得我，有次朋友在WhatsApp group分享咗我哋條片，都冇人發現係我。反串look唔敢畀阿媽睇呀，佢可能會笑到爆炸，但也可能會爆血管。」食住條水，搵人扮埋689、經常指指點點的王光亞、李飛等，玩得更大，可能抽得仲應。「其實我男扮女裝，都唔知大家係咪接受到，街上有些人會話我人妖，唔知係講笑還是真係覺得嘔心，我哋仲測試緊市場口味。」看過他們之前拍的一條短片，形容假普選唔只有篩選，仲係「阿爺吮完畀你吮」，片中Peter仔飾演的行騙月娥在吮二手雞骨，同而家個方案一樣咁核突！香港人，袋，你就輸一世呀。記者：葉青霞攝影：潘志恆
來源:
http://hk.apple.nextmedia.com/su ... t/20150614/19183428
市民攝太歲盼「啲官唔好搞到咁嘮嘈」
1 :
GS(14)@2017-01-31 15:53:53■關小姐及張先生均希望找到好情人，惟互稱不考慮對方。陳善南攝
【本報訊】昨日大年初三赤口，不少市民為避拜年，都會到車公廟參拜或去圓玄學院等「攝太歲」，祈求新一年順風順水。昨日廟宇人頭湧湧，早上已擠滿善信，香火鼎盛，新年願望五花八門，有父親笑指希望兒子少點頂撞自己，有年輕男女則希望新一年可以愛情事業兩得意。犯太歲者，即出生年的地支與流年地支不配合，運程或有變化，今年屬雞者犯太歲，兔沖太歲，狗害太歲，鼠刑太歲，傳統都需攝太歲化解。圓玄學院昨早8時已擠滿善信，有職員指吸取以往經驗，今年將人潮分流，又增設布幕為市民遮太陽擋雨。雖然依舊人頭湧湧，但並無混亂。今年院內售賣的太歲衣維持23元一份。職員表示昨天無來的市民也不用擔心，今年初七和初八都是攝太歲好日子。
■大批善信昨到圓玄學院攝太歲。
單身者望愛情事業兩得意
今年犯太歲的黃小姐早上10時到場，約花2個小時才完成整個程序，希望求個心安理得，她讚賞大會今年新增的分流做法，又指新年願望是希望世界和平以及「啲官唔好搞到咁嘮嘈」。同樣是單身的張先生及關小姐亦相約攝太歲，兩人都稱希望新一年可以找到好工作及好情人，被問到會否考慮對方時，關笑說不會考慮，強調大家只是舊同學，張也笑稱不考慮。10歲的李小朋友今日跟隨父母來攝太歲，他說今日大約等候了半個多小時，「都幾辛苦㗎，好熱呀呢度」，希望新一年學業進步，可以升讀Band1中學。父親李先生則說最大願望是兒子「聽話啲」，「唔好成日當我係太歲咁沖住我，哈哈」。昨日車公廟也是人山人海，華人廟宇委員會指截至5時半，逾6.5萬人到廟內參拜，委員會為控制人流，規定每名善信只可帶備3支細香進入大殿，有手持大香入內善信被攔下，僅可在大殿外上香，工作人員則在一旁加緊清理「常滿」的香爐。有善信輪候擊鼓、轉風車，期望新一年香港換特首轉運、「點都好過舊年啦」。■記者陳建平
市民心聲
李先生
李先生：「最大願望係個仔聽話啲，唔好成日當我係太歲咁沖住我。」
黃小姐
黃小姐：「希望求個心安理得，新年願望係世界和平。」
來源:
http://hk.apple.nextmedia.com/news/art/20170131/19913616