少年食神變騙神食埋高海寧
1 :
GS(14)@2010-12-17 18:03:302010-12-16 NM
為無綫主持《為食一條街》、外號「少年食神」的Michael（林澄光），憑住肥頭耷耳外形，及一副識食格，成功入屋。不過鏡頭前人見人愛兼相識滿天下的他，在朋友眼中卻另有真相。「少年食神」唔單只識食，更憑三寸不爛之舌，專呃老友錢，唔熟唔食，受害名單中包括跟他friend過打band的森美，十萬蚊血汗錢幾乎血本無歸！
「少年食神」原來係「少年騙神」，《為食一條街》的Michael，更加出名「o趙完唱」。據知他最愛吹噓自己食盡城中女星，其中晚晚陪佢周圍搵嘢食的拍檔高海寧，亦慘被Michael唱為速食「便當」。扮富豪追女
「少年食神」Michael唔單只晚晚在鏡頭前自認識食，鏡頭後更愛向朋友炫耀自己食盡無數女星，凡跟他交往過的異性，全都成為他口中的速食「便當」。而最新金榜題名的，包括36D無綫新咪神高海寧。
追女平常事，但視女如食店一樣o趙完唱就認真「無品」，據知連少爺占同Donald都睇唔過眼，早前幫《為食一條街》做嘉賓，兩個故意在鏡頭前「求證」 Michael。少爺占同Donald齊質問：「聽講你之前帶高海寧去美國食嘢！」擺明玩嘢，吹水天下無敵的Michael當堂打個突，繼而扮聾過骨，反而被食神Michael背後唱爆的高海寧卻懵然不知，仲傻頭傻腦猛咁問：「講咩呀？」
據知在《為食一條街》開拍初期，食神Michael確實對咪神生螆貓入眼，繼而使出追女吹噓招，討高海寧歡心。
Michael身邊友人爆料：「佢早排溝高海寧，又係用埋同一條橋，同人講佢好多部車，話送部俾高海寧，查實啲車係佢堂阿哥。有次車住高海寧途經大坑道，又話嗰頭好多樓係佢老豆剩落。其實佢只係得何文田俊民苑一個居屋單位，好多女知佢充闊佬之後掉頭走，佢可以厚面皮到同我哋講食咗邊個邊個，最近又話食咗高海寧，仲唱到好易食。」未摸清「少年騙神」真面目的高海寧，近日在微博大晒親手做給Michael的蛋糕，顯然中晒計。
收回冧女車牌
唔止無口德，食神Michael更有鋪追女不遂，強行收回冧女禮物劣行。據知年多前，他一度力追梁敏儀，除每日至少一call，還使出強項，帶她飲飲食食討歡心，吹噓在元朗擁有過百部車的他，更送上至愛的幸運車牌給梁敏儀。知情者說：「佢追梁敏儀時，送咗個lucky車牌CD1009俾佢，但千零蚊轉名費都側側膊唔俾。後來追極唔到手，兩個月後就話攞番個牌。」
事後記者致電梁敏儀，她承認收回車牌一事，她說：「佢之前係話俾我，不過轉頭話要俾朋友用，咁咪俾番佢囉！（聽講係因溝不遂收番？）朋友啫，不過我哋而家無聯絡！」
森美縮沙拒合股
食女「無品」，更當朋友係「羊牯」。據知兩年前Michael經EO2認識商台主持森美，從此努力碼實大碼頭，後來森美安排他在逢星期六晚開咪主持吹水節目《公子會》。獲森美信任後，Michael開始使出伎倆，向對方吹噓郭富城、葛民輝熱捧的灣仔王子酒店東來居火鍋店，他是大老闆之一，氹森美注資十萬入股，實情他只佔火鍋店百分之五股份，屬掛名股東。直至數月前森美才發現真相，加上收到風Michael有呃錢前科，森美即打退堂鼓，搵Michael面對面講數要求退股。知情者說：「森美聽到Michael呃人嘅事，即刻約佢出嚟當面質問，Michael唔想醜事揚出去，所以答應退還十萬俾森美，之後 Michael無再做森美嘅節目。」
呃EO2經理人
至於觸發森美縮沙，原來與EO2經理人文狄成為騙神受害者有關。知情者續說：「兩年前澳門有間叫囍館火鍋店開張，Michael同文狄講佢有份，叫對方夾錢一齊做股東，文狄夾五萬，落疊之後，兩年嚟生意係賺定蝕都無交代，又唔覆文狄電話。有次文狄撞到囍館班大股東，細問下先知Michael由始至終只係夾咗兩萬蚊咁少，班股東仲踢爆Michael幫佢哋入貨買牛肉都從中食價，諗住相識一場先無追究。」
森美：叫佢退番錢俾我
撕破少年食神真面目後，本週一（十二月十三日）森美在記者求證下承認此事，他說：「雖然夾錢之後一路都話生意未回本，但我都好信佢。直至聽到關於佢之前呃錢傳聞，我咪同佢講：『為表示你清白，不如退番晒啲錢俾我。』咁佢又好爽快答應，將十萬蚊俾番我！」記者問森美信唔信Michael呃錢傳聞？他答得巧妙：「總之佢肯退番錢俾我就算，唔理佢係咪呃人錢！」
文狄：幾萬蚊睇清人格
至於EO2經理人文狄，承認被Michael呃錢，且不屑的說：「蠢咗一次唔想再蠢第二次，嗰幾萬蚊當睇清楚一個人嘅人格。」
Michael臭名遠播，與他曾是好友的EO2成員Eddie，更加一提Michael就扯火：「我有聽過佢呃人錢嘅事，因為人哋有單有據無屈佢。我只可以講佢係高級古惑仔，把口呃得吓人。睇見佢做節目就火滾，佢介紹白田邨嗰間茶餐廳，土瓜灣食雲吞，話自己由細食到大，查實嗰啲係我哋班friend幾年前帶佢去食咋嘛！（有無聽過佢四圍唱食咗高海寧？）點止呀，佢唱過好多個啦！不過唔方便講係邊個！」
否認錢銀瓜葛
善於辭令嘅Michael起初否認與森美的錢銀瓜葛：「我同森美係好兄弟，無發生錢銀問題，大家合作無唔開心。（森美都話要求你退番十萬俾佢喎！）森美咁講咩？我係退番錢俾佢，仲係現金咁俾！（點解要退？）佢話要用錢，想攞番啲錢周轉，咁咪俾番佢先。」明顯跟森美說法有出入！至於EO2經理人文狄的瓜葛，他以四兩撥千斤應付：「謠言啫，我俾番佢啦！所有人都收番晒啲錢！（點解成日同朋友夾錢做生意，最後退錢收場？）吓……我開門做生意，總之對得住天地良心。」
至於有傳他對高海寧「o趙完唱」，Michael同樣否認：「呢啲係花邊新聞，我邊有咁講！」而高海寧對Michaelo趙完唱嘅傳聞，她反應愕然：「吓，即係咩？呢啲唔係事實，我唔信佢咁講！」
36歲認少年
230磅的林澄光，年約36歲，屋邨長大，讀陳瑞祺喇沙中學，自稱畢業後接手父親的工程公司。少爺仔要到地盤日曬雨淋，始終捱唔慣，於是轉做光岡日本車代理。鍾意親自揸車安排傳媒拍宣傳照，因而結識唔少圈中人包括森美、王菀之等。01年開始在報紙雜誌寫飲食稿，同時亦拍住森美於903節目《公子會》中開咪，任嘉賓主持講飲講食，知名度大升。中年肥仔靠把口變成「少年食神」，今年仲「升呢」在無綫擔正飲食節目《為食一條街》，日日揸靚車載靚女周圍歎好嘢，擺出一副識飲識食姿態。
2 :
fineram(806)@2010-12-17 18:17:31d 錢係佢屋企比佢, 定係佢自己有法找第一桶金?
3 :
reference(1610)@2010-12-17 18:52:33ai.....nothing to say
4 :
GS(14)@2010-12-18 14:22:502樓提及
d 錢係佢屋企比佢, 定係佢自己有法找第一桶金?
他都是吹大多，邊度有錢
5 :
龍生(798)@2010-12-18 21:58:27得一層居屋咋!!! 睇清楚!!! 真係賤格!
6 :
鱷不群(1248)@2010-12-18 22:13:19我就不信他有本事食盡城中女星
7 :
GS(14)@2010-12-18 22:25:46有時覺得壹傳媒有D精神分裂，覺得他們做新聞多...
http://hk.apple.nextmedia.com/te ... 462&art_id=14778620
黃金視窗：少年食神、高海寧嗒出火
2010年12月18日
(8人)瀏覽人次：22,200回應：0
FacebookTwitter轉寄朋友文章回應
少年食神林澄光，體重 240磅，其貌不揚，左睇右睇都係普通肥仔一個，偏偏他食到紅，主持無綫節目《為食一條街》獲高登女神高海寧、姚子羚和呂慧儀輪流相伴，日日秀色可餐，節目收視口碑雙贏，還要傳他媾掂 34D高海寧。電車男很想要吧。
高海寧爆肥仔有風度又體貼，她不吃的，肥仔頂，連高媽媽都覺得女兒一見肥仔零舍冧。肥仔就欣賞高海寧儍氣可愛有樣有 body，又肯陪他堅擦美食；從她包餃子皮的手勢中，更開發她有做好老婆的賢淑一面。雙「神」情尋色香味有冇下文，你話呢？ 撰文：朱倬誼
林峯因為靚仔而很紅，其實不入靚人之列的也可以很紅，例如蘇施黃，又例如最近熱爆網的少年食神林澄光（ Michael）。這位乳名大 B的 36歲肥仔當然不少年，只是相比食神梁文韜，論年紀論食齡，他便算少年。少年食神今期咁爆，源自主持無綫節目《為食一條街》，戴 AP名錶、坐古董車的他獲高海寧、呂慧儀和姚子羚三美陪伴走勻全港推介平民美食。香車美人你未必有，但食得經濟你一定得，令電車男羨慕又妒忌的少年食神，恍如人肉米芝蓮，加上近日是非多萬箭穿心，被指坤高海寧完唱，又呃老友錢，難怪話題性十足。
高海寧讚紳士風度
《為食》剛播完，但仍令人回味。捐窿捐罅搵美食的肥仔，以伶俐口齒配生動無比的形容詞將美食及好味程度立體化，高海寧吃得投入，哪怕大食鯨吞樣示人。你肯介紹我肯食，兩隻筷子敲得響，於是男的肥了 12磅，女的肥 8磅，今個聖誕節滿 24歲的高海寧和 240磅的肥仔傳緋聞，連肥仔也說，行街都被人八卦他是否和高海寧拍拖。
有人唔抵得肥仔有美相陪，肥仔就哈哈笑：「我做緊全香港男士最夢想嘅嘢，食餐飯全枱美女同我一齊食吖嘛。其實我哋本身都係飯腳，我冇想入非非，大家唔同圈子又坐得埋，都係因為食好嘢先做到朋友。我同高 Ling（高海寧）係做電台節目識嘅，傾偈時覺得佢幾好笑幾過癮，見咗兩次就做咗拍檔。我哋做節目日日食，高 Ling要放棄美好身段豁出去一齊食，我好鍾意佢做嘢嘅態度，好認真。」
高海寧從肥仔身上學識食是必然，「對食腌尖咗，另外係朋友約我食飯，以前係佢哋安排，家唔係啦，『你食咁多間餐廳，去邊度食呢？』又會打嚟問我呢區有邊度好食。」其實她一講肥仔笑不停，還讚他：「佢好 gentleman，例如有次我去西貢拍嘢，唔係好識路，佢特登兜我；我唔係好食內臟，佢話唔緊要，我食，我有乜唔食嘅佢都幫我頂。」肥仔即說：「應該嘅。」
少年食神直認動心
高海寧正斗是網民公認，肥仔直認對她動心：「動心就係動心，當佢拎起餃子皮包嘅時候，係好老婆、好媽媽，佢嘅 character同潛藏內心入面係好家嫂。大家唔好淨係睇佢個樣同 body，佢嘅儍氣係可愛，但其實佢有好賢淑嘅一面。」講到咁好，肥仔不如追人啦，他大笑：「再拍第二輯先啦。」
阿女主持飲食節目，高媽媽集集捧場，高海寧自爆媽咪睇後感是咁的：「阿媽話除咗覺得我介紹啲嘢好食之外，話我望 Michael嘅眼神好溫柔好冧，媽咪笑我呀。其實係我望到佢狂擦，成嚿擺落口，我又大啖大啖咁食，大家係食得開心啫。」
不少港女開餐吃三、五成飽就收檔，高海寧則說：「如果我唔係做呢行，我係絕對唔會喼弗。」她肯吃，肥仔最欣賞，「我欣賞佢乜嘢都擺入口。我最開心係， cut咗機佢仲食緊，『真係好食吖嘛！』觀眾就係鍾意睇我哋最真一面。」
場地：東來居
打邊爐悟大智慧
2010年12月18日
(4人)瀏覽人次：11,233回應：0
FacebookTwitter轉寄朋友文章回應
少年食神係識食唔識煮，「煮到出神入化唔係我，我都係一個為食嘅肥仔嚟嘅啫。」他說。
如果明天瓜得，要吃最後一餐，為食的少年食神會吃甚麼？
「喺屋企打邊爐，番茄薯仔豬骨湯底，肥牛、菜，樣樣都食，或者最唔健康嘅鵝肝，食埋快啲死，無憾。我鍾意打邊爐係因為一班人圍爐共聚，同枱食飯又可以各自修行，自己控制食物生熟程度。最正係就算大家素未謀面，一路滾住話題自然嚟，你有你嘅豬肉，我有我嘅肥牛，呢個係我同朋友嘅 style，會令每一個人都掛住嗰餐飯，所以我覺得米芝蓮嗰班人食懵咗，佢哋覺得打邊爐係 cook for myself，唔係美食類別，都唔知一個湯底背後嘅功力要做幾多嘢，一碟牛肉要點處理先有咁樣嘅效果，打邊爐係香港飲食智慧，全世界最叻 o架啦。」
肥仔靠把口搵食，又牙尖嘴利詞彙到肉，據他說小朋友時期在中環吃到個好味熱狗，已跟同學仔這樣說：「啲醬又多個包又脆，啲腸『啪』！好鬼多肉，啲肉汁射出嚟射親你喉嚨椗個吊鐘㖭呀！」長大後繼續，「好味到拍爛張枱走落街，裸跑嗌好好味呀！」做主持後又會說：「好希望每個家庭觀眾睇緊我同高 Ling個節目，自己扒飯嘅時候，即場揼爛個飯碗，扑爆部電視衝入嚟同我哋爭嘢食。」
食缽仔糕嘆無常
電影《食神》中的史提芬周吃了雞姐的黯然銷魂飯超感動，肥仔也吃過一個黯然缽仔糕。「舊年喺灣仔鵝頸橋街市，有個大約 80歲嘅婆婆搬個箱賣缽仔糕，我食過一次，感動係──『啲缽仔糕係婆婆自己做 o架，你嗒真啲啦，肥仔。』我仲問佢『婆婆，點解之前未見過你？』佢話有緣咪見到囉。之後我一直未見過佢，問番啲街坊，佢哋話婆婆都好耐冇見。」
人生無常，所以肥仔有句話常掛口邊，「最緊要珍惜機會，因為機會一瞬即逝，迎面而嚟要一隻手捉住先。」
Paco酒仙夾食神
2010年12月18日
(4人)瀏覽人次：8,067回應：0
FacebookTwitter轉寄朋友文章回應
少年食神+高海寧=《為食一條街》/緋聞。但，關黃柏高（ Paco）乜事？原來 Paco和肥仔十分老友，一個識飲一個識食，於是一拍即合， Paco還對他很欣賞：「之前有朋友介紹我上東來居（林澄光有份投資之食肆）試菜，所以同 Michael熟絡咗。我做業餘食家接觸唔同飯局，明白好多專欄作家已經係之前嘅年代，係時候有少年食神出現。 Michael夠台型， KO一個食十碗 麪嘅完全冇問題，我就飲酒台型，大家好相夾，我覺得佢將來可以獨當一面，唔單止係專欄食家，而係大家認同嘅品牌，介紹美食畀香港人。」雖然有傳少年食神與友合資食肆數賬不清，但 Paco揚言對他百分百信任，且不排除將來兩人在食方面有合作機會。
網友喜將少年食神和蘇施黃相比，因二人介紹食店兩極，前者講明不彈，後者就彈多過讚， Paco也有看法：「大家都係搵食，其實可以用溫和介紹態度，令大家有改善空間，而唔係下下啄死人哋，錯一次永不翻身，應該畀機會食肆。」
與阿蘇風格各異
肥仔也看過《蘇 Good》，感覺「大家風格唔同，食嘢口味唔同。」但他堅持不踩食肆，「我哋試食嘅應該有個持平態度，唔係我一句唔好食，就叫大家唔好食。」他不諱言香港有超級失敗飲食節目，某主持「形容唔到味道，食嘅嘢冇乜特別。」而他最喜歡的則是《蔡瀾逛菜欄》，「蔡生係食物之外嘅人生經驗之談，佢遊歷過咁多地方，同埋夢想嚟 o架，同香港小姐浸溫泉，喺法國鋪張蓆野餐咁。家我有機會同靚女去街市，又揸老爺車遊車河，我唔係黃宗澤陳豪，我行出嚟唔好睇，不如揸車啦。」