智取大市：四叔增持有玄機
1 :
GS(14)@2016-09-30 08:07:13睇圖唔睇新聞嘅話，周線圖同日線圖去睇恒指形勢都係好，暫時策略不變，設定跌穿本周低位止蝕，升就且戰且走等超買訊號先沽。玩法變得咁簡單嘅話，要搵股份主力唔難揀，都係騰訊（700）、煤炭股同濠賭股，靚圖藍籌股有國壽（2628）同港交所（388），呢兩隻股價一路守住保歷加通道中軸，呈一浪高於一浪，只要市升，好大機會跑得贏恒指，埋位後就聽天由命，但預咗中途會chok吓。美麗華（071）周四升半成破晒頂，挑戰近十年高位，睇圖好似升到好高，但由今年低位計起，只係升三成鬆啲，交投亦旺番，成交有成683萬蚊已經算好活躍。點解咁犀利，市場上面睇唔到乜嘢消息，只見到近期四叔不斷每日兩三萬股咁增持，慢升一輪，周四忍唔住爆上，憧憬私有化？賣資產？估唔到，總之有勢。衝得十年高位，但估值絕對仍低，市賬率0.6倍，淨現金18.3億銀，資產又豐厚，主力揸住美麗華酒店同商場，以及一大批分散嘅中港商用及住宅物業，淨係放售美麗華酒店商場固然非常和味，但要取其易，連環沽售分散嘅物業一樣能夠體現價值，四叔日日咁買當然有玄機，不妨小注上車。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20160930/19786013