慈父麥包脾氣差 下令40歲先俾拍拖
1 :
GS(14)@2017-06-18 22:07:10成日都話囡囡係爸爸前世情人，無論阿女做乜，阿爸都會咁緊張。去年麥長青（麥包）大女淳琳第一次同三個女仔去日本旅行，麥包話同老婆開咗幾次家庭會議先批准。提到子女感情事，琳琳笑住爆料：「阿爸以前話18歲可以拍拖，之後推到23歲，再推到25歲，之後應該會加到無限期囉，咁簡單啲40歲先俾。」麥包搶住解釋：「你誤會喇，我會睇你成熟期去到幾多。其實父母一定走先過你，無論幾錫，終有一日都要送出去，最希望你可以搵到個可以包容、愛護你嘅人。」麥包與囡囡經常鬥嘴，但看得出父女感情好到似朋友一樣，麥包：「太朋友喇，冇咗父親嘅威嚴，好嬲！」琳琳：「一直friend開，突然好惡，會嬲囉。反而媽咪永遠都係啱，係我哋屋企嘅神。」琳琳直言爸爸最差就係脾氣，試過發惡掟碗，琳琳：「佢嘅脾氣超差，但我都會諗，或者爸爸外面受完氣，呢啲係親人先頂得住。」麥包亦有即時檢討：「其實做完《關你家事》後，都發現自己做得未夠，有時我係火爆易着，o依家改緊。」而琳琳最開心，係父母俾佢同弟弟好大自由度，讀書永遠唔求A，反而要B，令佢哋可以快樂成長，琳琳：「我以前係讀傳統名校，考包尾，但見身邊同學，有啲一星期七日都係要上興趣班或補習，真係好叻考第一，但一啲都唔開心。」明年琳琳就要考中六DSE，然後準備大學選科，目標係被喻為好難搵食嘅科目，琳琳：「我鍾意電影，但同爸爸完全冇關。係後來升中學，我開始喜歡睇戲，雖然身邊人都話讀電影搵唔到錢，但我覺得興趣最重要，加上讀完都未必做嗰行，起碼讀一科同我夢想嘅科目。」問到父親節最想做乜？麥包要求好簡單：「希望同父母子女一齊吃飯就足夠喇，禮物唔去諗先有驚喜。」
來源:
http://hk.apple.nextmedia.com/entertainment/art/20170617/20058823