📖 ZKIZ Archives

三十多歲的藍穎詩（阿詩）○二年成立男裝品牌Cubic，獲丈夫蔡銘賦（Patrick）「瞓身」支持，婦唱夫隨，合力經營，現有七間分店。這盤生意，不但幫他們還了四百多萬負資產，還能住名城、揸靚車。成功的因素，有從小耳濡目染的街頭智慧，包括在生意最旺的地區，多開幾間分店，「霸得就霸」；另外，就是摸通做自家品牌的竅門，透過包廠掌控生產流程，再開鋪散貨。除新開未賺錢的荃灣店外，其餘每間鋪每月只賺約兩萬元，但六間加起來已有約十二萬落袋，跑贏不少行家。

在旺角人流最旺的西洋菜街（行人專用區）附近，Cubic便有四間鋪，包括瓊華中心和對面街的Chic之堡，街尾的潮流中心，以及朗豪坊，全都是在○二至○五年間開的。「香港後生男仔買衫都首選旺角，呢四個商場賣嘅嘢可以話係佢哋嘅潮流指標。」一身中性打扮的阿詩表示，公司的貨倉亦租在旺角女人街的商業大廈內，方便出入貨。「旺角塊餅咁大，就算四間鋪隔得咁近，都唔會自己打自己。」阿詩自信道。

街頭智慧

這是她從媽媽身上學來的做生意竅門。「媽咪九十年代初已經喺女人街擺檔賣衫，當時女人街除咗做遊客生意，仲有好多香港人會去執平嘢。佢開第一檔時，一個月賺到三﹑四萬，但競爭大，貨品相似，生意難再有增長，所以佢就諗到開多幾檔。」阿詩指，女人街有三個街口，媽媽就在不同街口內租下三個檔口賣衫，每月收入增加至十萬元，更可供阿詩去澳洲的大學讀工商管理。「道理一樣，以前喺三個街口做三檔就會有三檔收入。講到爭生意，都只係同隔籬檔爭﹗」阿詩解釋。因此，她集中火力攻旺角區。「男仔來旺角，通常都會行勻呢四個商場，比較一輪，先做決定。每間鋪門面擺設嘅衣服都唔同，令客人既熟悉又有新意。而且，男仔行街懶得返轉頭，分店多亦方便佢哋。」阿詩指。

包 廠

Cubic的出品八成是自家設計，再於虎門承包的工廠生產。這是阿詩花了十年時間才定下來的模式。○二年，阿詩獲媽媽打本，在瓊華中心開設第一間Cubic。「個名係個行家唔做俾我嘅，我見簡單易記就拿來用。」當時她學媽媽向批發商攞貨，但發現難以突圍。「喺女人街做生意，成條街賣嘅嘢差唔多，主要係鬥平。但商場唔同，行得商場就係想搵較個人或特別嘅款式。」阿詩表示，向批發商攞貨，不但會同其他店鋪「撞衫」，還要硬食一些不喜歡的款式，「變相將責貨風險俾咗我﹗」所以，她開始在服裝上加入自己創作，如要求轉吓顏色或配件。」阿詩指，批發商會多收取約一成五的服務費。至○五年，Cubic大部分款式衣物都由阿詩設計。「我無讀過設計，只要周圍睇吓興啲乜，睇多啲雜誌，再搵師傅畫紙樣就得。唔使直接抄款，通常換咗布料、顏色，或將圓領變尖領，就變成一個新款。」為節省批發商的服務費，阿詩開始四出找廠做衫。「透過批發商將設計交俾廠做，隔咗一層，自己搵廠，成本可以慳一至兩成。例如從批發商攞件二百蚊嘅衫，我哋會賣四百蚊，直接搵廠做，成本只係一百八十，咁咪賺埋嗰二十蚊。」阿詩分析。

統一生產線

○九年之前，Cubic有九間鋪，兼賣男女裝等。為方便生產，她決定不賣女裝，「男裝款式較簡單，重視用料，生產上較易控制；而且近年男仔愈來愈貪靚，街上嘅男裝仍以T恤牛仔褲為主，我希望走斯文休閒路線。」其間，她先後關了四間生意較差的分店，節省資源找工廠，試過同時用幾間廠，分布廣州﹑中山及江門。「在內地生產一定要自己去檢驗，但生產線分散，無咁多時間兼顧，試過遲交貨、做錯貨。有次訂咗批鮮紅色布，但布廠送咗棗紅色，加工廠就用批布做咗成批貨出來，咁就蝕咗﹗」阿詩嘆氣。最後，她透過朋友介紹，在虎門包了一間十數人的細廠，派遣一名跟單員工長駐廠房。「包廠可將錯誤減到最少，做錯貨都可以免費改，最麻煩係內地成日停電，搞到遲出貨。」阿詩說。包廠雖方便管理，但每個月都要「硬食」二十萬貨，所以分店要夠多才可散貨。

商場散貨

為節省開店成本，阿詩瞄準商場鋪。「地鋪租貴，仲要花錢花時間裝修，開一間鋪起碼要幾十萬，商場鋪唔使點裝修，最大支出係租金，俾完三按一上，擺少少貨，只要十幾萬，好快便開到鋪。」今年九月及十一月，阿詩分別於銅鑼灣地帶及荃灣悅來坊加開兩間分店。「近年地區商場開始旺，改變咗港人消費模式，好像沙田新城市廣場，吸走咗一班地區客。」阿詩說。商場鋪面積小，Cubic的分店沒有用人形公仔，只是用衣架展示產品。「除了慳地方，還容易轉款，鋪頭有咁多衫褲，就算一日轉三次display都無問題。公仔一般較高大，咁身形較細粒嘅男仔見到就未必會入來。」現在，鋪頭每日都會轉一次擺出來的衣服。每間店只安排一名員工，阿詩傾向請新人，她解釋﹕「試過請喺大公司出來嘅，有啲大公司會叫sales唔好主動sell客，但我哋呢啲細鋪頭，一定要主動銷客。」

夫婦孖咇做生意

訪問時，總是阿詩在回答，丈夫Patrick一直只是陪伴在側。二人如影隨形，無論巡鋪﹑看布料等，都在一起。第一次見阿詩，丈夫還沒到，她講起話沒什麼自信，老重複﹕「我講得唔好，都係等我老公來啦。」有Patrick在旁，她即侃侃而談。二人自中學相戀，拍拖十八年，兩年前才結婚。Patrick開過酒吧，做過保險，○九年阿詩媽媽患病，他便辭工幫阿詩打理生意，成為公司的模特兒兼設計師。大學主修會計的Patrick話不多，他表示﹕「唔一定要係設計師先可以做自家品牌。Cubic走大眾化路線，款式或顏色太特別，一般客人反而接受唔到，不如用自己一個普通用家嘅眼光去改款同配搭，仲貼近市場。」為取得設計靈感，二人經常一起逛街，看時裝雜誌，或到日本、韓國旅行兼取經。「見到件衫靚就會買返來，睇吓可以點加入自己創作。喺雜誌見到靚衫，會撕下來俾廠家睇吓點做。」Patrick補充。他們亦會去深水埗布行發掘新布料，「男裝款式改變不大，唯有喺不同布料嘅配搭及撞色方面下功夫。」現在，夫婦倆做任何決定都會問對方意見，阿詩媽媽去年因病去世後，Patrick便成為她的倚靠，她挨着丈夫甜笑道﹕「全靠媽媽我先有今日，未來我希望在全港各區都有Cubic分店，唔會辜負佢教我嘅所有嘢。」

開業資料10/2002

工具：$20,000裝修：$30,000租金：$96,000*雜項：$15,000總投資：$161,000*三個月按金，一個月上期

營業資料

11/2012

營業額：$120,000

人工：$18,000 △

入貨：$42,000

租金：$40,000

水電：$800

雜項：$1,000

盈利：$18,200

△一全職，一兼職

不少真正MK人的集體回憶、在黑布街冷巷經營了三十年的「龍記麵家」，去年七月租約滿，老闆龍哥乘機退休。結業當天，大排長龍，半日內已將店內所有麵食清倉！

上月，龍哥的十弟賴義芳（阿細），在舊檔對面重出江湖，改名「大隻佬麵家」。已五十歲的阿細，講明「一做，就要發大嚟做！」目標是一變二、二變四、四變八……，跟著搞特許經營；他最後的夢想，又怎會不是《食神》般將牛丸雲吞搞上市？阿細認為第一步先要打入後生仔市場，故實行了多項改革。其中一樣，就是將其谷盡四十吋巨胸「炒炸醬」及出力以十五吋老鼠仔「攪豬手」的秘技，作為其生招牌。

新店三月開張，阿細擔心無客，不斷WhatsApp老友幫襯。一開舖，不少舊客專程支持，開業第一個月，已賺五萬元。不過阿細未敢鬆懈，他每朝七點半便衝落樓，走到屋企對面的鋪頭開門，「原先睇咗好多鋪，後來喺屋企望見對面有吉鋪，即刻問價。而家真方便，禮拜日都可返工！」回鋪首要任務是煲湯，「啲湯起碼煲四個鐘先夠味！」阿細邊說邊將十五斤豬骨、八條燒香的大地魚、幾塊果皮等放入不銹鋼煲內，裡面還有浸了一晚的冬菇水。「其實呢啲材料唔係秘密，老師傅個個識做，睇你願唔願花咁多功夫！有啲落味精就算。」除了煲湯，阿細還要洗菜、切蔥、炆豬手、炆牛腩、炒炸醬等，全部工序趕在十一點半午市前完成，分秒必爭！「出面師傅返足十個鐘就收工。好多嘢要自己跟番。」說時遲，那時快，阿細又一手拎起一袋重五十磅的豬手，倒進大煲內汆水，「啲豬手要汆水，加埋柱侯醬、花椒、八角等調味料去炆，炆一個鐘再放一晚等佢入味。」為令豬手均勻受味，阿細必須用其「強而有力的臂彎」攪拌。年輕時，阿細愛玩健身，練得一身肌肉，加上誇張的紋身，吸睛指數爆燈，「當年去沙灘，實有人吹口哨！」那時他要威，肌肉愈練愈大隻，紋身也愈來愈多，「你舉啞鈴舉一百磅咩？我就舉夠百五磅！唔輸得呀！」到現時五十歲，他一身肌肉依然結結實實，做生意同樣野心不小，但因此亦將生意「風險」浮了上面。

風險一：租約三年又三年

阿細身上，是典型的基層香港人故事。他做製衣出身，但七十年代行業式微，他轉幫做雲吞麵、豬手麵的大哥手，在大哥的龍記麵家幫手。他最擅長煮麵，執麵及計算烹調的時間。一煮，便三十年。阿細極重視兄弟情，這個大哥與阿細一樣練到周身肌肉，志趣相投，「只要大哥一直做落去，我就會一直幫佢o架！」直至大哥退休唔撈，阿細才決定另起爐灶。龍記三十年老招牌，積落名氣，「商譽」有價。開舖前，不少人向阿細主動招手，「香港、大陸都好多人搵我開舖，有啲連鋪都搵埋，只要我俾個名出嚟就得。但做生意始終顧慮好多嘢，又驚人哋食咗你嗰份！」最終，阿細決定肥水不流別人田，和三哥再組兄弟班開舖。阿細第一次自己做老闆，未開舖已諗定生意做大之後的情景：「我想香港人個個都識我！目標係開好多連鎖店！」單是揀鋪，阿細已走勻港九新界，「沙田、元朗、大埔、佐敦、銅鑼灣，通通睇曬！」最終阿細撲槌以月租十萬元，租下舊鋪對面一個約一千呎舖位，「之前做龍記，為方便工作，買埋樓上單位住。而家可日日對住新鋪，仲可以吸納之前班熟客！」阿細打算長線投資，為免好像其他老店一樣，因加租而被迫結業，他特地簽下長約，「三年生，三年死。總之三年又三年！」雖然這樣可限制租金加幅，但同時香港經濟差他亦未能減租；萬一蝕錢唔做，要賠的錢更多！為了應付貴租，「大隻佬」每碗麵的價格比「龍記」年代，每碗貴了五元，毛利有七成。

風險二：棄用龍記老招牌

在「麵界」打滾三十年，看盡無數麵鋪起落，阿細知道不能單靠老街坊，而是必須有新客，「我要吸啲後生仔客！老嗰輩啲客人，怕肥膩，quota又細，食碗麵就話飽，叫佢食多碟菜都食唔落。後生仔唔同，唔怕膽固醇，唔怕三高，咩都敢食！」所以今次開店，阿細決定走年輕人路線，棄用擁有了三十年歷史的「龍記」招牌，「叫咩記咩記，個感覺好老土，我個招牌都係得『大隻佬』三個字，特登唔寫『大隻佬麵家』！」不過記者訪問了多個食客，其中六成都是龍記舊客，「認得」阿細才進來。棄用「龍記」招牌，似乎有點嘥。另外阿細亦從裝潢下手，營造「新潮」感覺，「地方要夠光猛，我特登整啲吊燈，仲加咗啲卡位！」阿細滿意地說。為了跟年輕人拉近距離，阿細特地將餐牌卡通化，在餐牌加入WhatsApp的「哈哈笑」等圖案，又在facebook開page宣傳，對一個五十歲的中年人來說，已算是接受了新事物。想令「大隻佬」這個主題深入民心，阿細又在鋪頭張貼不少肌肉猛男照，「我哋個招牌、裝修，全部都搵設計公司整，希望俾人耳目一新感覺！」雖則左搞右搞，但記者仍然覺得格局與一般茶餐廳無異，最基本的落單、結賬，仍然不靠電腦，全人手搞掂，鋪頭又保留傳統，繼續用公雞碗，至於員工方面，阿細依然採用傳統家庭式開店，老婆、姐姐、阿嫂，全家總動員，改革只屬「一半半」。

風險三：用錯力無sell人情味

今次開業，阿細其實期望很高，「壓力很大！始終掟咗過百萬，我想做番啲成績出嚟！」阿細坦言開舖初期晚晚「瞓唔著」，花盡精神和心思改革，但採訪多日，記者覺得阿細力求現代化及新裝潢，但「大隻佬」最殺食的，始終是旺角老街坊的人情味，阿細未有特別把握及下功夫。其實去鋪頭幫襯嘅客人，阿細近一半也叫得出名字。見有記者採訪，一個五十多歲的中年男子食客藉機調侃阿細：「大隻佬好靚仔！我要大隻佬！」阿細靦腆地說：「啲食客好多時落嚟食嘢，都係搵我傾偈，仲有好多後生女話要同我影相，搞到我都唔係咁好意思！」事實上，阿細亦是一個重感情的人，採訪期間，阿細曾以不想公開營業資料等敏感數據為由，拒絕訪問，但經記者多次落鋪傾談，他說：「唔想你俾老闆鬧，令你難做！」最終亦決定繼續訪問。阿細也講笑說：「其實我啲嘢食，做七分已經夠，其餘三分係感情！」「新舊」兩難全，本刊找來兩年間開了三家分店、專做潮人生意的龍鳳冰室老闆暨藝員林子善，點評「大隻佬」，教阿細吸「young」客。

開業資料（3/14）

租金^$400,000裝修$800,000入貨$90,000雜費$10,000總投資$1,300,000^三按一上

營業資料（3/14）

營業額$ 400,000人工#$105,000 租金$ 100,000入貨$ 100,000雜費$ 45,000盈利$ 50,000#包兩名老闆及五名員工

一點意見

1.評裝修、格局「新鋪比舊鋪光猛好多，而且地方闊落咗，以前舊鋪喺條巷入面，啲人又紋曬身，新客真係未必敢入嚟！而家用卡通公仔，牌餐又係，成件事cute咗！叫多啲明星來食，鋪頭出面貼曬啲同明星嘅合照，可以吸引啲後生仔試。」2.評大隻佬主題「大隻佬係阿細哥嘅特色，如果係我仲會放大啲大隻佬相，貼曬成間餐廳，整個大隻佬主題。鋪頭仲可以加番啲食物相，同喺餐牌加番啲英文，吸引外國客。另外，阿細哥要美化facebook，加番啲instagram，有咩免費宣傳方法都要用盡佢！」3.評發大經營「我落嚟食嘢，其實都係為咗同阿細哥傾偈，如果第時要開連鎖店，想同佢傾偈又唔喺度，我諗唔多唔少會流失一班熟客。不過我梗係望人哋富貴，唔通睇死人哋開得一間咩。屆時佢可以喺facebook打卡，講明自己『巡場』時間，方便同熟客見面拉關係。」