女人仔看 Tec：你 ICQ號碼幾號？
1 :
GS(14)@2011-02-12 16:50:40女人仔看 Tec：你 ICQ號碼幾號？
2011年02月12日
你 ICQ號碼幾號？這個陳年沒有人問過的問題，最近在高絲的 facebook上頻頻出現，好奇查看 ICQ的最新情況，卻發現它這十多年間有很多被遺忘的故事。
還記得一眾 80後的青春期正值科網盛世，當中最能衝擊他們的， ICQ肯定上榜。
那時，交朋友取 ICQ號碼，比取電話更為重要，未有 facebook，要知道朋友的最新情況，全靠 ICQ中的 Profile功能，易於打開又多欄目供填寫，可以說是社交網站的雛形。
由幾個以色列青年於 96年創辦的 ICQ， 98年正值科網泡沫期間，被 AOL收購，當時用戶已超過一億的 ICQ，前途可說是無可限量。可惜瘦田耕開有人爭，更何況這是塊「肥田」， 99年終於有國產貨騰訊 QQ攻打 ICQ中文版，功能完全一樣，甚至加入中國化的元素；同期推出的 MSN更以電郵代替長長的用戶號碼，振動呼喚、動態訊息及即時視像等有趣功能，取得用家的歡心。
後來千禧年科網熱潮爆破， ICQ附加的廣告被用戶厭惡，一沉百踩，幾年後便掉入時代的巨輪，被人遺忘。
復興全靠 iPhone
當高絲以為沒有人記得它之際， 2010年初，此名字又再於朋友間響起，救起它的是 iPhone，原來此時的 ICQ已重新起錨，推出 ICQ7，沒有廣告，又與 facebook動態消息及即時聊天同步。
包裝得美美地賣盤，競投的包括當年有份踩低它的騰訊，最後 AOL以 1.88億美元賣給俄羅斯投資公司 DST。
這朵綠色花花再次於高絲的電腦中亮起，最驚喜的是戶口中的朋友全部健在，看見舊朋友一個一個地重新上線，心中興奮之餘，亦見證了科網世界「鹹魚翻生」的故事。
世事無絕對，不知下一個會否是被人看扁的 friendster呢？
高絲
八方相當年：羅健熙ICQ搞聯署識女仔
1 :
GS(14)@2016-12-27 12:31:03■羅健熙細個圓碌碌，好趣致。羅健熙提供圖片
啱啱連任民主黨副主席嘅羅健熙，大學畢業踏上從政路，但啟蒙佢走上政途嘅唔係白鴿黨創黨主席李柱銘或者前黨鞭司徒華等，而係以性格剛強、政治手腕強硬見稱嘅德國鐵血宰相俾斯麥（Bismarck），佢指中四讀歷史時，讀到俾斯麥憑一人之力改變世界，覺得好有型，之後開始留意時事，預科睇電視主要睇新聞，對政治種下情結。32歲嘅佢憶述考A Level時香港正經歷沙士，佢喺淘大花園自修室溫習，從未見過空空如也、唔使搵位，令佢好享受喺「疫區」溫習嘅寧靜，由嗰時開始寫政論，考完試仲搞人生首場社運。佢話當年覺得考評局拉curve唔精準唔公平，就喺ICQ發起聯署；當年冇咩關注組，用ICQ將聯署一個傳一個唔容易，最後有幾百個學生聯署，令考評局當年都主動約見解釋，係一次寶貴經驗。
同女仔影相企兩丈遠
就讀男校聖言中學嘅佢係怕醜仔，初戀都係網上情緣，中五透過ICQ識人，傾傾吓就一齊，但那些年拍咗幾個月就無疾而終。佢話以前同女仔影相都要企到兩丈遠，所以冇乜「那些年」嘅情節。喺港大社工系畢業嘅佢之後做咗註冊社工，2011年喺南區區議會利東二當選，唔知幾時殺入立法會？
來源:
http://hk.apple.nextmedia.com/news/art/20161227/19878128